كەزەكتەن تىس قازاقستان رەسپۋبليكاسىنىڭ پرەزيدەنتىن سايلاۋ بارىسىن ءبىر اي بويى تولىقتاي قاداعالاعان تمد بايقاۋشىلار ميسسياسى ورتالىق سايلاۋ كوميسسياسىندا ءباسپاسوز ءماسليحاتىن وتكىزدى. جيىنعا تمد ەلدەرىنەن كەلگەن بىرقاتار بايقاۋشىلار قاتىستى.
سايلاۋ كەزەڭىن باقىلاۋ بويىنشا ميسسيا وكىلدەرى ءوز جۇمىستارىن اعىمداعى جىلدىڭ ناۋرىز ايىنىڭ وتىزىنان باستاعان بولاتىن. ءبىر اي كولەمىندە سايلاۋالدى جانە سايلاۋدان كەيىنگى جاعدايلاردى مۇقيات بارلاي وتىرىپ, ءبىز بىرقاتار مالىمەتتەردى حابارلايمىز, دەدى تمد بايقاۋشىلار ميسسياسىنىڭ باسشىسى سەرگەي لەبەدەۆ. جانە دە ول تمد ميسسياسى قۇرامىندا سەگىز مەملەكەتتەن بارلىعى 410 بايقاۋشى بار ەكەندىگىن اتاپ ءوتتى.
اتالعان مەرزىم ىشىندە ەگجەي-تەگجەيلى باقىلاۋ جاساعان ميسسيا وكىلدەرى قازاقستانداعى سايلاۋدى ۇيىمداستىرۋ جۇيەسىنە وڭ باعا بەرىپ وتىرعاندىعىن جەتكىزدى. جانە دە سايلاۋشىلاردىڭ جوعارى دەڭگەيدە بەلسەندىلىك تانىتقاندىعىن ەرەكشە ىقىلاسپەن اتاپ ءوتتى. س.لەبەدەۆ بۇل ورايدا «حالىقتىڭ اعىلىپ, كەزەككە تۇرىپ داۋىس بەرۋى ولاردىڭ ماقسات-مۇددەلەرى ورتاق ەكەندىكتەرىنىڭ, بولاشاقتارىنا جاۋاپكەرشىلىكپەن قاراعان قادامىنىڭ كورىنىسى» دەدى.
سونىمەن قاتار, ميسسيا باسشىسى قازاقستان مەملەكەتىنىڭ زاڭنامالىق جاعدايلارى دا جەتىلىپ كەلە جاتقاندىعىن, حالىقارالىق سايلاۋ قۇقىعىنىڭ نورمالارىنا ساي, ءتىپتى كوپتەگەن ەلدەرگە ۇلگى بولارلىق دارەجەدە ەكەندىگىن اتاپ كورسەتتى. جانە سايلاۋ تولىقتاي «سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا سايكەس ءوتتى. داۋىس بەرۋ ەركىن, اشىق جانە دەموكراتيالىق تاڭداۋ قاعيداتتارىنا نەگىزدەلدى, دەدى.
سونداي-اق, ميسسيا وكىلدەرى سايلاۋالدى جانە سايلاۋ كەزىندەگى وبلىستاردىڭ دايىندىعىنا بايلانىستى مونيتورينگ جۇرگىزگەندەرىن ايتتى. 3534 سايلاۋ ۋچاسكەلەرىن ارالاپ, ولاردىڭ ارقايسىسىنا جەكە-دارا ۇزدىك باعا بەرۋگە بولاتىندىعىن جەتكىزدى.
ەلميرا ماتىباەۆا,
«ەگەمەن قازاقستان».