وسكەمەن. 27 ءساۋىر. ەلباسى جەڭىسىنە شىنايى قۋانعان شىعىسقازاقستاندىقتار وبلىس ورتالىعىنداعى اباي ەسكەرتكىشىنىڭ الدىنا جينالدى. بۇل تۋرالى egemen.kz ءتىلشىسى حابارلادى.
8 مىڭنان استام تۇرعىن جينالعان كوڭىلدى كەش, سالتاناتتى جيىن اسقاقتاعان ەل مەرەيىنىڭ كورىنىسى ىسپەتتى. قازاقستان رەسپۋبليكاسى پرەزيدەنتىنىڭ سايلاۋىندا ايقىن باسىمدىقپەن جەڭىسكە جەتكەن مەملەكەت باسشىسى نۇرسۇلتان نازارباەۆتىڭ قۇرمەتىنە ارنالعان جەڭىمپازدار فورۋمىندا جۇرتشىلىق قازاقستاننىڭ كوك تۋىن بيىككە جەلبىرەتىپ, ەكراننان ەلباسىنىڭ سايلاۋدا زور سەنىم بىلدىرگەن شىعىسقازاقستاندىقتارعا ىزگى تىلەگىن زور قوشەمەتپەن تىڭدادى. مەرەكەلىك جيىندا سايلاۋدىڭ جوعارى دەڭگەيدە وتۋىنە اتسالىسقان وبلىستىق جانە قالالىق شتابتاردىڭ مۇشەلەرى مەن جاس كاسىپكەرلەر, ۆولونتەرلەر مەرەكەلىك كوڭىل-كۇيلەرىمەن ءبولىستى.
«ءبىز – ماڭگىلىك ەل ءۇشىن داۋىس بەردىك. ءبىز باياندى جانە بەرەكەلى ءومىر ءۇشىن داۋىس بەردىك. ءبىز ەڭبەك ەتىپ, وركەندەۋگە مۇمكىندىك جاساعان ەلباسىمىز ءۇشىن داۋىس بەردىك. بۇل جەڭىس – بارشا قازاقستاندىقتاردىڭ جەڭىسى! نۇرسۇلتانداي كوشباسشىسى بار حالىق – باقىتتى حالىق. بارلىقتارىڭىزدى ورتاق جەڭىسىمىزبەن قۇتتىقتايمىن!», – دەدى جاس كاسىپكەر بەكزات نۇراسىلوۆ.
فورۋم سوڭى ايتۋلى كونتسەرتكە ۇلاستى. جەرگىلىكتى جەزتاڭداي انشىلەرمەن قاتار, بۇل كەشكە ارنايى كەلگەن «وردا» توبى مەن بەلگىلى ءانشى كامشات جولدىباەۆا جانە تاعى باسقا ەسترادا جۇلدىزدارى وسكەمەندىكتەردى ونەرىمەن تامساندىردى.
دۋمان اناش.
دەرەك: egemen.kz.
سۋرەت: ەسىمحان ورىنباەۆ.