قىزىلوردا. 27 ءساۋىر. قىزىلوردادا ەلباسىنىڭ سەنىمدى وكىلدەرى, سىر جاستارى باس قوسقان «تاريح تاڭداعان, حالىق قولداعان» اتتى جەڭىمپازدار فورۋمى ءوتتى. بۇل تۋرالى egemen.kz ءتىلشىسى حابارلادى.
جينالعان 2 000 ادام پرەزيدەنتتىك سايلاۋدا جەڭىسكە جەتكەن نۇرسۇلتان نازارباەۆقا وسىلايشا ءوز قۇرمەتتەرىن كورسەتتى. ءوڭىر باسشىسى قىرىمبەك كوشەرباەۆ سىر ەلى حالقىنا ساياسي ناۋقاندا بەلسەندىلىك تانىتقاندارى ءۇشىن العىس ايتىپ, كەشەگى سايلاۋداعى ەلباسى جەڭىسى بارشاعا ورتاق قۋانىش ەكەندىگىن اتاپ ءوتتى.
«سىن ساتتە سىر بەرمەگەن سىر جۇرتشىلىعىن ورتاق جەڭىسپەن شىن جۇرەكتەن قۇتتىقتايمىن. سايلاۋدى ۇيىمداستىرىپ, ونى وتكىزۋگە ات سالىسقان بارلىق ازاماتتارعا, اسىرەسە, جاستارعا, ءاربىر جەرلەسكە ەلباسىنىڭ اتىنان ريزاشىلىعىمدى ءبىلدىرىپ, راحمەت ايتامىن. سىزدەر قوسقان ءۇن تاۋەلسىز قازاقستاننىڭ تولاعاي تابىستارى بولىپ جاڭعىراتىنىنا كامىل سەنەمىز. ويتكەنى پرەزيدەنتتىك سايلاۋ ارقىلى حالقىمىز بۇگىنىن بايىپتايتىن, بولاشاعىن بەكەمدەيتىن سانالى تاڭداۋ جاسادى. بۇل جارقىن جەڭىسىمىز كوشىمىزدىڭ ءتۇزۋ, كوكجيەگىمىزدىڭ شۋاقتى, باعىتىمىزدىڭ دۇرىس ەكەندىگىن تاعى دا ايعاقتاي تۇسەدى», – دەدى قىرىمبەك ەلەۋ ۇلى.
ورتالىق سايلاۋ كوميسسياسىنىڭ دەرەگى بويىنشا, نۇرسۇلتان نازارباەۆقا سايلاۋشىلاردىڭ 97,7 پايىزى سەنىم بىلدىرگەن. قىزىلوردالىقتار دا ساياسي ناۋقاندا بەلسەندىلىك تانىتىپ, حالىقتىڭ 97,52 پايىزى سايلاۋعا قاتىستى. سونداي-اق, بۇگىنگى جەڭىمپازدار فورۋمىندا قوعام قايراتكەرلەرى, زيالى قاۋىم وكىلدەرى مەن سىر جاستارى جالىندى سوزدەرىن ايتىپ, قۋانىشتارىمەن ءبولىستى.
ەرجان بايتىلەس.
دەرەك, سۋرەت: egemen.kz.