كوكشەتاۋ. 27 ءساۋىر. «كوكشەتاۋ» مادەنيەت سارايىندا «نۇر وتان» پارتياسى اقمولا وبلىستىق فيليالىنىڭ ۇيىمداستىرۋىمەن جەڭىمپازدار فورۋمى وتكىزىلدى. مەرەكەلىك ءىس-شارانىڭ شىمىلدىعى «دوستار» تريوسىنىڭ ورىنداۋىنداعى «قازاق ەلى وسىنداي!» انىمەن اشىلدى. زال پاتريوتتىق رۋحتى اسقاقتاتار انگە تىك تۇرىپ قوسىلدى. بۇل تۋرالى egemen.kz ءتىلشىسى حابارلادى.
جيىندى جۇرگىزۋشىنىڭ: «قىمباتتى دوستار! كەشە عانا ءبىزدىڭ ەلىمىزدە تاريحي ماڭىزدى وقيعا – قازاقستان رەسپۋبليكاسى پرەزيدەنتىنىڭ سايلاۋى ءوتتى. مۇندا بارشا قازاقستاندىقتاردىڭ ۇلكەن سەنىمىنە يە بولعان ءبىزدىڭ ەلباسى نۇرسۇلتان ابىش ۇلى نازارباەۆ ۇزدىك شىعىپ, جەڭىسكە جەتتى. بۇل – ءبىزدىڭ جەڭىس!», – دەگەن سوزدەرى ءزاۋلىم سارايدى «الاقاي» داۋىسقا بولەدى.
ودان كەيىن تورگە ىلىنگەن ەكراننان ەلباسى ەڭبەگىنىڭ ءتالىمدى جولدارىنان ۇزىندىلەر, قازاقستاننىڭ تابىستى قادامدارى, الەمدىك ابىرويى بەينەلەنگەن كورىنىستەر, اقمولالىقتاردىڭ كەشەگى سايلاۋداعى بەلسەندىلىگىن ايشىقتاعان تۇسىرىلىمدەر كورسەتىلدى. ءان-بي اۋەزى, قۋانىشتى قۇتتىقتاۋلار كوڭىل قاينارىن تاسىتىپ تۇردى.
ءسوز قازاقستان رەسپۋبليكاسى پرەزيدەنتىنىڭ سەنىمدى وكىلى, پرەزيدەنتتىككە ۇمىتكەر نۇرسۇلتان نازارباەۆتى قولداۋ جونىندەگى وبلىستىق شتاب توراعاسىنىڭ ورىنباسارى سەرىك اياعانوۆقا بەرىلدى. «كەشەگى 26 ءساۋىر كۇنى ءبىز تاۋەلسىز قازاقستان جىلناماسىنداعى تاعدىرشەشتى ساياسي ماڭىزدى تاڭداۋىمىزدى جاسادىق. مەن جەرلەستەرىمدى ۇمىتكەرىمىزدىڭ سايلاۋداعى لايىقتى ءارى ءبىز كۇتكەن جەڭىسىمەن قۇتتىقتايمىن. بۇل جەڭىس بولاشاعىمىزدى, تاۋەلسىز قازاقستاننىڭ بولاشاعىن ايقىندايدى. بۇل بارشامىزدىڭ, قازاقستاندىقتاردىڭ ورتاق جەڭىسى. وسى ورايدا, اقمولالىقتارعا نۇرسۇلتان نازارباەۆقا ءوزىنىڭ باسىم داۋىسىن, ياعني, 98 پايىزعا جۋىق داۋىسىن بەرگەنىنە ريزاشىلىعىمدى بىلدىرەمىن. ءبىزدىڭ باعىتىمىز ايقىن, بولاشاعىمىز جارقىن! ءبىزدىڭ قۋاتىمىز – بىرلىكتە! ەلباسىمەن بىرگە جاڭا جەڭىستەرگە جەتە بەرەيىك!»,-دەدى ول.
جەڭىمپازدىق فورۋمدارى وبلىستىڭ بارلىق اۋداندارىندا دا وتكىزىلدى.
باقبەرگەن امالبەك.
دەرەك, سۋرەت: egemen.kz