ازاماتتىق تاڭداۋىمدى جاسادىم

ءوزىم بالا كەزدەن 2-توپتاعى مۇگەدەكپىن. تاعدىردىڭ جازۋى سولاي شىعار. دەگەنمەن, وسىنداي قيىنشىلىققا مويىماي, سالىم سۋعا كەتپەي, ءومىر سۇرۋگە ۇمتىلىپ, قوعامنان ءوز ورنىمدى تابۋعا تىرىستىم. سونداي ۇلكەن ارماننىڭ جەتەگىندە ءجۇرىپ سپورتقا كەلدىم. 2008 جىلدان باس­تاپ پاۋرليفتينگپەن كاسىبي تۇردە شۇعىلدانامىن. بۇل تۇرعىدا مەملەكەت تاراپىنان ۇلكەن كومەك كورسەتىلىپ جاتقانىن ايتقىم كەلەدى. 2009 جىلى ەڭ العاش رەت شەتەلگە شىعىپ, مالايزيا ەلىندە وتكەن ازيا ويىندارىنا قاتىستىم. سول جولى ەشقانداي جەتىستىككە جەتە الماسام دا بۇل جارىس مەنى قاناتتاندىردى. ومىرىمە ۇلكەن وزگەرىس اكەلدى. سپورت ارقىلى بيىك بەلەستەردى باعىندىرىپ, ەلىمنىڭ اتىن شىعارا الاتىنىما سەندىم. ءبىر جىلدان سوڭ ازيالىق وليمپيادا ويىندارىنا بارىپ, قولا جۇلدەمەن ورالدىم. 2013 جىلى ازيا چەمپيوناتىندا كۇمىس جۇلدە يەلەندىم. لوندوندا وتكەن پاراليمپيادا ويىندارىنا قاتىسىپ, ۇزدىك سپورتشى اتاندىم. از عانا ۋاقىتتىڭ ىشىندە حالىقارالىق سپورت شەبەرى اتاعىن قورعاپ شىقتىم. مۇنىڭ ءبارى ايتقانعا وڭاي بولعانىمەن, ءىس جۇزىندە كوپ ەڭبەكتى قاجەت ەتەتىن دۇنيە. مىنە, وسى تۇرعىدا مەملەكەتىمىز بىزگە زور قولداۋ كورسەتىپ كەلەدى. شەتەلدە بولاتىن جارىستىڭ بارلىعىنا جىبەرىپ, قارجىلاي كومەك كورسەتىپ وتىر. ونىڭ سىرتىندا الاڭسىز جاتتىعۋ جاساۋ ءۇشىن جاعدايىمىزدى جاساۋدا. مىسالى, جاقىندا عانا جاتتىعۋعا قاتىناۋ ءۇشىن بىزگە ارنايى اۆتوكولىك بەرىلدى. بۇدان بولەك, پاراليمپياداشىلارعا ارنالعان جاتتىعۋ زالى اشىلادى دەگەن دە ­جوسپار بار. سوڭعى جىلدارى ەلىمىز مۇمكىندىگى شەكتەۋلى ادامداردى بارىنشا قولداپ كەلەدى. ولاردى قايتا دايارلاپ, كاسىپكە ۇيرەتىپ, جەڭىلدەتىلگەن نەسيەلەر بەرىپ, كاسىپكەرلىكپەن شۇعىلدانۋىنا جاعداي تۋعىزىپ جاتىر. ءبىز سەكىلدى ادامداردى تاعدىردىڭ تالقىسىنا تاس­تاماي, قايتا بارىنشا قامقورلىق تانىتىپ, قوعامعا قاجەتتى ازامات رەتىندە قالىپتاسۋىمىز ءۇشىن ايانىپ قالىپ جاتقان جوق. وسىنىڭ بارلىعى مەملەكەتتىڭ قامقورلىعى. سوندىقتان, مەن بۇگىن تاڭ سارىدەن تۇرىپ, ءوزىمنىڭ ازاماتتىق مىندەتىمدى ورىنداۋ ماقساتىندا سايلاۋ ۋچاسكەسىنە كەلىپ, ءوز تاڭداۋىمدى جاسادىم. وسىنداي ساياسي دوداعا ەلىمىزدىڭ ءبىر ازاماتى رەتىندە اتسالىسىپ, مەملەكەتىمىزدىڭ كەمەل كەلەشەگىن جاساۋدا ءوز ورنىڭ بار ەكەنىن سەزىنۋ دە ءبىر باقىت. كابيرا اسقاروۆا, ازيا چەمپيوناتىنىڭ كۇمىس جۇلدەگەرى. قىزىلوردا وبلىسى.