مەملەكەت باسشىسى قاسىم-جومارت توقاەۆتىڭ جولداۋىندا 2025 جىلعا دەيىن 800 مىڭ بالانىڭ زاماناۋي مەكتەپتە وقۋىنا جاعداي جاسالاتىنى ايتىلعان. بۇل باستامانىڭ جۇزەگە اسىرىلىپ جاتقانىنا كۇنى كەشەگى ءبىلىم كۇنىندە ءوڭىر جۇرتشىلىعى كۋا بولدى. تۇركىستان وبلىسىندا قازىرگى تاڭدا قۇرىلىسى جۇرگىزىلىپ جاتقان 49 مەكتەپتىڭ 42-ءسى بيىل پايدالانۋعا بەرىلەدى. ونىڭ العاشقىلارى ءبىلىم كۇنىندە اشىلدى.
مىسالى, سارىاعاش اۋدانىندا 300 ورىندىق باقىبەك مەكتەبى, ال دەربىسەك ەلدى مەكەنىندە 350 ورىندىق مەكتەپ ەل يگىلىگىنە پايدالانۋعا بەرىلدى. وقۋشىلاردىڭ ءبىلىم الۋىنا قولايلى جاعداي جاسالعان 350 ورىندىق مەكتەپتە 52 اۋىل تۇرعىنى تۇراقتى جۇمىسپەن قامتاماسىز ەتىلدى. جەكە كاسىپكەر سەرىك نارباەۆتىڭ ەسەبىنەن سالىنعان زياتكەرلىك مەكتەپتە سۋىق سۋ, جىلۋ جانە سانيتارلىق بايلانىس قۇبىرلارى ورتالىقتاندىرىلعان. ءبىلىم ۇياسىندا كىتاپحانا, بارلىق ءپان كابينەتى تولىقتاي زاماناۋي قۇرال-جابدىقتارمەن جانە ينتەراكتيۆتى تاقتامەن جابدىقتالعان. سپورت زالى, اسحانا جانە مەديتسينالىق بولمەسى بار. ءاربىر بولمە ارنايى قۇرال-جابدىقتارمەن, جيھازدارمەن جابدىقتالىپ, سىرتقى جانە ىشكى بەينەباقىلاۋ كامەرالارى ورناتىلعان. سونىمەن قاتار مەكتەپتە ىشكى باسسەين دە ورناتىلعان. اۋداندا, سونداي-اق سارىسۋ ەلدى مەكەنىندەگى №40 ن.ءابدىروۆ اتىنداعى نەگىزگى ورتا مەكتەپتىڭ 200 ورىندىق وقۋ عيماراتى جاڭا وقۋ جىلىندا پايدالانۋعا بەرىلدى. ال وتىرار اۋدانىندا اقكول ەلدى مەكەنىندەگى 100 ورىندىق ج.ەگەمبەرديەۆ اتىنداعى نەگىزگى مەكتەبىنىڭ, ساۋران اۋدانىندا ءتورت مەكتەپتىڭ سالتاناتتى اشىلۋ ءراسىمى ءوتتى. جاڭا وقۋ جىلىنا پايدالانۋعا بەرىلگەن ءتورت مەكتەپتىڭ بىرەۋى – مەملەكەتتىك, ۇشەۋى – جەكەمەنشىك مەكتەپ. ال جىل سوڭىنا دەيىن «جايلى مەكتەپ» ۇلتتىق جوباسى اياسىندا ساۋران اۋدانىندا 3 مەكتەپ پايدالانۋعا بەرىلەدى. كەلەسى جىلى ىنتالى مەن قۇمتۇيىن ەلدى مەكەندەرىندە 600 ورىندىق ەكى مەكتەپتىڭ قۇرىلىسى اياقتالماق. وقۋشىلاردىڭ ءبىلىم الۋىنا تولىق جاعداي جاسالعان ءبىلىم وشاعى كەنتاۋ قالاسىندا دا پايدالانۋعا بەرىلدى. سوڭعى ۇلگىدە سالىنعان جەكەمەنشىك «Bastau» مەكتەبى 450 وقۋشىعا ارنالعان. ال ارىس قالاسىندا وقۋشى سانىنىڭ ارتۋىنا بايلانىستى جاڭادان پايدالانۋعا بەرىلگەن 300 ورىندىق وقۋ عيماراتى تولىقتاي زاماناۋي ۇلگىدە جابدىقتالعان. ءۇش قاباتتان تۇراتىن عيماراتقا جىلى سۋ جۇيەسى, ويىن جانە سپورتتىق الاڭشالار ورناتىلعان. بارلىق وقۋ كابينەتى جاڭا پارتا-ۇستەلدەرمەن, ينتەراكتيۆتى تاقتالارمەن, وقۋ-ادىستەمەلىك قۇرالدارمەن, ىشكى اجەتحانالارمەن جابدىقتالعان.
تولە بي اۋدانىندا پەش جاعىپ, وقۋشىلارى تۇتىنگە تۇنشىعىپ, تار, توزىعى جەتكەن عيماراتتا وقيتىن مەكتەپ بار ەدى. كورشىلەس اۋىلدارداعى بالالار زاماناۋي تيپتەگى ءزاۋلىم مەكتەپتەرگە بارىپ جۇرگەندە سولاردىڭ قاق ورتاسىندا ورنالاسقان تاعاينا ەلدى مەكەنىندە وقۋشىلار پەشپەن جىلىتىلاتىن, ابدەن توزىعى جەتكەن ەسكى عيماراتتا وقۋعا ءماجبۇر بولعان ەدى. بۇل مەكتەپتەگى جاعدايدى ارنايى بارىپ كورگەنبىز. ماسەلەنى ءتيىستى ورىندارعا جەتكىزگەن دە ەدىك. ءتاۋبا! تاعاينادا تاماشا مەكتەپ سالىنۋىنا اتسالىسقان ازاماتتارعا, ماسەلەنى باقىلاۋدا ۇستاعان «Amanat» پارتياسىنىڭ وكىلدەرىنە, بيۋدجەتتەن قارجى ءبولۋ ۇسىنىسىن قولداعان وبلىستىق اكىمدىكتەگىلەرگە اۋىل تۇرعىندارىنىڭ ايتار العىسى شەكسىز. جاڭا وقۋ جىلىندا تاعاينا ەلدى مەكەنىندەگى 200 ورىندىق مەكتەپ پەن كوكسايەك ەلدى مەكەنىندەگى اۋداندىق ساز مەكتەبى پايدالانۋعا بەرىلدى. تاعاينا جالپى ورتا مەكتەبىنىڭ اشىلۋ سالتاناتىندا اۋدان اكىمى تولەگەن تەلعاراەۆ اۋىل حالقىنىڭ كوپتەن كۇتكەن ءبىلىم ورداسىنىڭ قۇرىلىسىن مەردىگەر مەكەمە «دوس ي ك سەرۆيس» جشس جۇرگىزگەنىن اتاپ ءوتتى. قۇنى 925 ملن تەڭگە بولاتىن مەكتەپتە وقۋشىلاردىڭ تياناقتى ءبىلىم الۋىنا جان-جاقتى جاعداي جاسالعان. اۋداندا توزىعى جەتكەن ءۇش ءبىلىم ۇياسىنا كۇردەلى, ال 33 مەكتەپكە اعىمداعى جوندەۋ جۇمىستارى جۇرگىزىلدى. سونىمەن قاتار «جايلى مەكتەپ» ۇلتتىق جوباسى بويىنشا ءۇش مەكتەپتىڭ قۇرىلىسى اياقتالۋعا جاقىن.
سونداي-اق ءبىلىم كۇنى تۇلكىباس اۋدانىندا 300 ورىندىق جاڭا مەكتەپ اشىلسا, كەلەس اۋدانى قوشقاراتا اۋىلدىق وكرۋگىنە قاراستى بەسقۇبىر ەلدى مەكەنىندە №25 س.سەيفۋللين اتىنداعى جالپى ءبىلىم بەرەتىن مەكتەبىندە 300 ورىندىق قوسىمشا جاڭا عيمارات پايدالانۋعا بەرىلدى. اۋداندا «جايلى مەكتەپ» جوباسى اياسىندا ءۇش مەكتەپتىڭ قۇرىلىسىن جىل سوڭىنا دەيىن اياقتاۋ كوزدەلگەن.
تۇركىستان وبلىسى