ەلوردالىق جاسوسپىرىمدەر شەكارا قالاشىعىندا جاۋىنگەرلىك شەبەرلىكتەرىن شىڭداپ, اسكەري ءومىردىڭ قىر-سىرىنا قانىق بولۋىنا مۇمكىندىك الىپ وتىر. 18 تامىز – شەكاراشىلار كۇنى قارساڭىندا استاناداعى ميچۋرينو تۇرعىن ءۇي الابىندا ورنالاسقان «Batyrlar» اسكەري-پاتريوتتىق ورتالىعىندا شەكارا قالاشىعى اشىلدى. ەلوردا ىرگەسىندەگى بۇل ورتالىقتىڭ جۇمىس ىستەپ تۇرعانىنا ءبىر جىل عانا ۋاقىت بولعان. سوعان قاراماستان ورتالىققا كەلەتىن تاربيەلەنۋشىلەردىڭ سانى ارتىپ كەلەدى.
«Batyrlar» – اسكەري پاتريوتتىق جانە ىزدەستىرۋ قوزعالىسى رەسپۋبليكالىق قاۋىمداستىعىنىڭ جانىنان بىلتىر اشىلعان ورتالىق. مۇنداعى ساباقتارعا نەگىزىنەن از قامتىلعان جانە تولىق ەمەس وتباسىلاردان شىققان, بولاشاقتا قارۋلى كۇشتەردىڭ, قۇقىقتىق ءتارتىپ جانە قاۋىپسىزدىك ورگاندارىنىڭ وفيتسەرى بولعىسى كەلەتىن جوعارى سىنىپ وقۋشىلارى مەن كوللەدج ستۋدەنتتەرى قاتىسادى. بۇل ورايدا «ارىستان» ارنايى ماقساتتاعى قىزمەتى مەن ۇقك شەكارا قىزمەتى ءبىرىنشى بولىپ وزدەرىنىڭ كادرلىق رەزەرۆىن قۇرۋعا قىزىعۋشىلىق تانىتىپ, ورتالىقتىڭ جۇمىسىنا بەلسەنە ارالاسىپ وتىر.
اسكەري پاتريوتتىق جانە ىزدەستىرۋ قوزعالىسى رەسپۋبليكالىق قاۋىمداستىعىنىڭ توراعاسى امانجول ورازباەۆتىڭ ايتۋىنشا, بىلتىر قاڭتار ايىندا بىرنەشە زاپاستاعى وفيتسەر بىرىگىپ رەسپۋبليكالىق اسكەري پاتريوتتىق جانە ىزدەستىرۋ قاۋىمداستىعىن قۇرعان. ال اكىمشىلىك قوعامداستىقتىڭ باستاماسىن قۇپ الىپ, بۇرىنعى مەكتەپتىڭ بوس تۇرعان عيماراتىن ون جىلعا بەرىپتى. «زاپاستاعى وفيتسەرلەر ۇيىمداسا كەلىپ, ەلىمىزدەگى قارۋلى كۇشتەر مەن كۇشتىك قۇرىلىمداردىڭ بارلىعىنا حات جازىپ, ءوز قالاشىقتارىن اشۋعا ۇسىنىس حات جىبەردىك. ويتكەنى ءاربىر قۇرىلىمنىڭ ءوز قالاشىعى بولعانى بولاشاقتا بىلىكتى كادرلاردى ىرىكتەپ الۋعا مۇمكىندىك بەرەدى. ماسەلەن, ورتالىققا كەلەتىن بالالار قازىردەن باستاپ بولاشاعىن اسكەري قىزمەتپەن بايلانىستىرىپ وتىر. ال ولار وزدەرى ارمان ەتكەن سالاسىنىڭ قىر-سىرىمەن ەرتەرەك تانىسىپ, تەوريالىق جانە تاكتيكالىق دايىندىقتى ەرتە باستاسا, ءوز ءىسىن شىن سۇيەتىن وتانشىل وفيتسەرلەردى تاربيەلەۋگە جول اشادى», دەيدى قاۋىمداستىق باسشىسى.
ورتالىقتىڭ ۇسىنىسىن العاش بولىپ قۇپ العان ۇقك شەكارا قىزمەتى كاسىبي مەرەكەلەرى قارساڭىندا وقۋلىق ورنىنا ارنالعان قالاشىقتى اشتى. بۇل جەردە بولاشاق شەكاراشىلار جاۋ شەبىنە توسقاۋىل بولۋدىڭ ءادىس-تاسىلدەرىن مەڭگەرۋگە مۇمكىندىك الادى. ەڭ باستىسى, استانانىڭ ماڭايىنان شىقپاي-اق شەكارا شەبىندەگى قىزمەتپەن تاجىريبە جۇزىندە تانىسا الادى.
«الداعى ۋاقىتتا ەلىمىزدەگى باسقا كۇشتىك قۇرىلىمدار دا شەكاراشىلاردىڭ ءداستۇرىن ۇلگى ەتەرىنە سەنىم مول. ولاردىڭ دا قالاشىق اشۋى ءۇشىن جەر بەرۋگە دايىنبىز. بولاشاق جاۋىنگەرلەر اسكەري قىزمەتتى تەك تەوريالىق تۇرعىدان ەمەس, تاجىريبە جۇزىندە كورۋگە ءتيىس. قازىردىڭ وزىندە ورتالىققا استانانىڭ ءار جەرىنەن جۇزگە جۋىق بالا كەلىپ ءجۇر», دەيدى ا.ورازباەۆ.
قاۋىمداستىق باسشىسى قازىر بالالاردىڭ ورتالىققا قاتىناۋىن جەڭىلدەتەتىن مەكتەپ اۆتوبۋسى اۋاداي قاجەت ەكەنىن جەتكىزدى. قىسى ۇزاق بولاتىندىقتان بالالاردى قالاعا دەيىن جەتكىزۋ, ولاردىڭ امان-ەسەن ۇيىنە ورالعانى ۋايىمعا اينالاتىن كەزدەرى كوپ بولادى. سەبەبى ورتالىققا كەلەتىن بالالاردىڭ اراسىندا قوسشىدا تۇراتىندارى دا بار.
«ولار اپتاسىنا كەمىندە ءۇش رەت – ساعات ۇشتەن كەشكى جەتىگە دەيىن جاتتىعۋدان وتەدى. ءبىزدىڭ نۇسقاۋشىلار – كۇشتىك قۇرىلىمداردا قىزمەت ەتەتىن اسكەري ادامدار. مىسالى, «ارىستان» ارنايى قىزمەتىمەن مەموراندۋمعا وتىردىق. قازىر اي سايىن ارناۋلى قىزمەتتىڭ جىگىتتەرى بالالارمەن جاتتىعۋ وتكىزەدى. اتۋ, تاكتيكالىق, ساپتىق دايىندىق جانە كولىك جۇرگىزۋ ساباقتارى اتا-بابالارىمىزدىڭ قاھارماندىق تاريحىن زەرتتەۋمەن, سونداي-اق قويان-قولتىق, تاكتيكالىق مەديتسينا جانە جاۋىنگەرلىك درونداردى قولدانۋ سەكىلدى اسكەري ومىرگە قاجەت كۇندەلىكتى ساباقتاردى وتكىزەدى. ەليتالىق ارنايى جاساقتىڭ تاجىريبەلى جاۋىنگەرلەرى تاربيەلەنۋشىلەرىمەن قۋانا اينالىسىپ, جاسوسپىرىمدەر الدىندا ۇلكەن قىزىعۋشىلىق تانىتىپ كەلەدى», دەيدى ول. ايتپاقشى, بيىل قالاداعى قوعامدىق كولىكتەردىڭ بىرىندە جولاۋشىلاردىڭ بىرىنە ورتالىقتىڭ تاربيەلەنۋشىلەرى العاشقى مەديتسينالىق كومەك كورسەتىپ, اجالدان امان الىپ قالعانىن دا ايتا كەتكەن ءجون. ادام ومىرىنە اراشا بولعان جاسوسپىرىمدەر سول كەزدە ورتالىقتا ۇيرەنگەن تاكتيكالىق مەديتسينانىڭ قاجەتكە جاراعانىن جەتكىزدى. سولاردىڭ ءبىرى – ايدينا نۇرعالي.
ونىڭ ايتۋىنشا, ورتالىق تۋرالى ول دوستارىنان ەستىپ-بىلگەن. وتباسىندا ءومىرىن اسكەري قىزمەتپەن بايلانىستىرعان ەشكىم جوق. الايدا قازىردىڭ وزىندە تاۋداي تالابى بار ايدينا بولاشاق ماماندىعىن تاڭداپ تا قويعان. «ەل تىنىشتىعى جولىندا قىزمەت ەتۋ – ارمانىم. سول ءۇشىن وسى ورتالىققا كەلىپ ءجۇرمىن. بۇل جەردە ءجۇرىپ اسكەري ساپتىق ءجۇرۋدى ۇيرەندىم. پوليگوندارعا شىعىپ ءجۇرمىز. مىسالى, 7 رەت پوليگونعا شىقتىق. «ايبىن-2024» اسكەري جارىسىنا قاتىسىپ كەلدىم. كولىك جۇرگىزۋدىڭ تەوريالىق بىلىمدەرىن مەڭگەرىپ جاتىرمىن. وسىنداي تەوريالىق جانە تاجىريبەلىك دايارلىقتاردان ءوتۋ وقۋ بىتىرگەن سوڭ اسكەري اكادەمياعا تۇسكەندە كوپ كومەگىن تيگىزەدى دەپ سەنەمىن», دەيدى ا.نۇرعالي.
جالپى, اسكەري-پاتريوتتىق ورتالىعىنىڭ ەسىگى كەز كەلگەن بالاعا ايقارا اشىق ءارى بەرەتىن ءتالىم-تاربيەسى ءۇشىن اقى سۇرامايدى. ەڭ باستىسى, سارباز بولىپ ساپقا تۇرعىسى كەلەتىن جاسوسپىرىمدەردىڭ جاۋىنگەر بولۋعا دەگەن ىقىلاسى عانا قاجەت. ال ورتالىق ولاردىڭ اسكەري ومىرگە دەگەن قۇلشىنىسىن ارتتىرىپ, دۇرىس تاڭداۋ جاساۋىنا ەرتە باستان كومەكتەسەدى ەكەن. كەز كەلگەن مەملەكەت شەكارادان باستالادى. ولاي بولسا وقۋ قالاشىعى وسكەلەڭ ۇرپاقتىڭ بويىندا ءبىرىنشى كەزەكتە ەلىمىز ءۇشىن ماقتانىش سەزىمىن, ازاماتتىعى مەن ءپاتريوتيزمىن, جوعارى جاۋاپكەرشىلىگىن دامىتۋعا جۇمىس ىستەرىنە سەنىم مول.
قالاشىقتىڭ اشىلۋىنا وراي ۇيىمداستىرىلعان ءىس-شارادا ورتالىقتىڭ تاربيەلەنۋشىلەرى تاكتيكالىق دايىندىعى مەن جاۋىنگەرلىك داعدىلارىن كورسەتتى. سونداي-اق ۇيىمداستىرۋشىلار كەلۋشىلەرگە ەل شەكارالارىنىڭ قاۋىپسىزدىگىن قامتاماسىز ەتۋ ءۇشىن پايدالانىلاتىن ۇقك شەكارا قىزمەتىنىڭ زاماناۋي قارۋ-جاراقتارى مەن اسكەري تەحنيكاسىنىڭ كورمەسىن ۇسىندى. بۇدان كەيىن شەكارا قىزمەتى ءانسامبلى سوليستەرى اننەن شاشۋ شاشىپ, كەلۋشىلەر اسكەريلەردىڭ اسحاناسىندا قوناق بولىپ, سارباز بوتقاسىنىڭ ءدامىن تاتتى.