«ورتالىق» وڭىرلىك قولباسشىلىعىندا ءوتىپ جاتقان ۇلتتىق ۇلان تاربيەشىلەرى جيىنى قاتىسۋشىلاردىڭ فيزيكالىق قابىلەتتەرىن تەكسەرۋدەن باستالدى. وفيتسەرلەر 100 مەترگە جۇگىرۋدەن سىنعا ءتۇستى. ال ساباقتار 5451 اسكەري بولىمىندە جالعاستى. تالىمگەرلەر ءدارىس وتكىزۋ بارىسىندا پىكىر الماسۋ مەن ديالوگ قۇرۋعا كوپ كوڭىل ءبولدى.
دارىستەر اسكەري قىزمەتشىلەرگە جەكە تاربيە جۇمىسىنىڭ ەلەكتروندى كۇندەلىگىن پايدالانۋدىڭ جاڭا ءادىس-ءتاسىلىن جان-جاقتى ۇيرەتەدى. سونداي-اق ولار كۇندەلىكتى قىزمەت اتقارۋ بارىسىندا كەزدەسەتىن ماسەلەلەر مەن قيىندىقتار تۋراسىندا پىكىر الماسىپ, اسكەري قىزمەتشىلەردىڭ ءبىلىم دەڭگەيى مەن وقىس وقيعالار كەزىندەگى ءىس-ارەكەتىن پىسىقتايدى. ءار ماسەلەنىڭ شىعۋ سەبەبى قارالىپ, ونى شەشۋ جولدارى ۇسىنىلادى. بۇدان كەيىن ءدارىس سايىن اسكەريلەر ءوز ۇسىنىستارى مەن ويلارىن ورتاعا سالادى.
«كەشەلى بەرى تاجىريبەلىك ساباقتارعا قاتىسىپ جاتىرمىز. ونىڭ بارىسىندا نورماتيۆتىك-قۇقىقتىق اكتىلەردەگى وزگەرىستەر مەن اسكەري قىزمەتشىلەردىڭ تاربيەسىنە قاتىستى زاڭنامالارداعى جاڭاشىلدىقتار ءتۇسىندىرىلدى. بۇدان بولەك, ءارتۇرلى اسكەري بولىمدەردەن جينالعان ماماندار ءبىر-بىرىمەن تاجىريبە الماستى. جاس جاۋىنگەرلەردى تاربيەلەۋ بارىسىندا قولدانىلاتىن جاڭا ادىستەمەلەر مەن تىڭ تاسىلدەر دە ۇيرەتىلدى. مۇنداي وقۋ-تاجىريبەلىك جۇمىستارى وسكەلەڭ ۇرپاقتى جانە اسكەر قاتارىندا جۇرگەن ساربازداردى پاتريوتتىققا باۋلىپ جۇرگەن تاربيەشى وفيتسەرلەردىڭ بىلىكتىلىگىن نىعايتۋعا سەپتىگىن تيگىزەدى», دەيدى 5573 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى تيمۋر راحيموۆ.
جيىن كەزىندە ۇلاندىق اسكەريلەر دولينكا كەنتىندەگى ساياسي قۋعىن-سۇرگىن قۇرباندارىنىڭ كارلاگ مۋزەيىنە ەكسكۋرسيا جاسادى. ونداعى تاريحي دەرەكتەرمەن, جادىگەرلەرمەن تانىستى. ودان كەيىن 6505 اسكەري ءبولىمىنىڭ 2-اتقىشتار باتالونىنا ات باسىن تىرەدى. مۇنداعى روتا كومانديرلەرى ءوز تاجىريبەلەرىندەگى جاۋىنگەرلىك قىزمەتكە كىرىسەر الدىندا جانە ونى ورىنداۋ كەزەڭىندە جەكە قۇراممەن تاربيە جۇمىسىن جۇرگىزۋ بارىسىن كورسەتتى. كورنەكى ساباققا قاتىسقان وفيتسەرلەر ءوز پىكىرلەرىن دە ءبىلدىردى.
«كورنەكى ساباقتا قاراۋىل قىزمەتىنە جاۋىنگەرلەردى اتتاندىرماس بۇرىن ۇيىمداستىرىلاتىن تاربيەلىك جۇمىستار كورسەتىلدى. كورگەنىمىزدى وزىمىزدە جۇرگىزىلەتىن جۇمىس ساپاسىمەن سالىستىردىق. مۇنداي ساباقتار ارقىلى ءبىز جۇمىس بارىسىنداعى كەمشىلىكتەرىمىز بەن ارتىقشىلىقتارعا كوز جەتكىزە الامىز. وقۋ-ادىستەمەلىك جيىنىنىڭ بىزگە بەرەر ءبىر پايداسى دا وسى», دەيدى 5513 اسكەري ءبولىمى كومانديرىنىڭ ورىنباسارى باۋىرجان قانسەيىتوۆ.
پىكىر الماسۋ فورماتىندا ۇيىمداستىرىلعان ساباقتار دولينكا كەنتىندە ورنالاسقان باتالوننىڭ جاۋىنگەرلىك قىزمەتتەگى ۇزدىك اسكەري قىزمەتشىلەرىن ۇلىقتاۋ كەشىمەن اياقتالدى. ەكى كۇن بويى ۇزدىكسىز ساباققا قاتىسقان اسكەري قىزمەتشىلەر ساربازدارمەن بىرگە اسەم ءان مەن كوركەم بيگە ەلىتىپ, رۋحاني دەمالىپ قالدى. الايدا بۇل ءىس-شارا جيىن قاتىسۋشىلارىنا دەمالىس سىيلاۋ ءۇشىن عانا ۇسىنىلعان جوق. مۇنىڭ باستى سەبەبىن ۇلتتىق ۇلان باس قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار باس باسقارماسىنىڭ باسشىسى نۇرباي بەكتۇرسىنوۆ ءتۇسىندىردى. باتالوننىڭ جەكە قۇرامىنا ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى ەركىن بوتاقانوۆ پەن اسكەردىڭ باس تاربيەشىسى قايرات ۇمبەتوۆتىڭ العىسىن جەتكىزگەن ول: «بۇگىندە قۇقىقتىق ءتارتىپ اسكەرىنە جاۋىنگەرلىك قىزمەتتى اسقان جاۋاپكەرشىلىكپەن اتقارۋ مىندەتى جۇكتەلگەن. ال جاۋىنگەرلىك قىزمەتتىڭ العى شەبىندە ساربازدار مەن كەلىسىمشارت بويىنشا اسكەري قىزمەتشىلەر ءجۇر. سىزدەر – ۇلتتىق ۇلاننىڭ ابىرويىسىزدار. سوندىقتان دا بۇگىنگى ۇلىقتاۋ شاراسىندا جاۋىنگەرلىك قىزمەتتى ادال اتقارىپ جۇرگەن ۇزدىكتەر ماراپاتتالدى. ال ادىستەمەلىك جيىنعا قاتىسۋشىلار وسىنداي باعدارلامالاردى وتكىزۋ بارىسىن ءبىر-بىرىنەن ۇيرەنگەندەرى ابزال», دەدى.
ءىc-شارا مارەسىنە جەتكەننەن كەيىن دە قاتىسۋشىلار اراسىنداعى ءوزارا پىكىرتالاس جالعاسىن تاپتى.