سەنات دەپۋتاتى ساعىندىق لۇقپانوۆ اتىراۋ وبلىسىنداعى قۇرمانعازى اۋدانىندا بولىپ, كاسىپكەرلەرمەن جانە اۋداندىق ءماسليحات دەپۋتاتتارىمەن كەزدەستى. دەپۋتات اۋدانعا ساپار بارىسىندا 60 پاتەرلى تۇرعىن ءۇي قۇرىلىسىمەن دە تانىستى.
ايماققا ساپارى بارىسىندا ول ءماسليحات دەپۋتاتتارىمەن كەزدەسىپ, جوعارى زاڭ شىعارۋشى ورگاننىڭ جۇمىسىمەن تانىستىردى, پالاتا قىزمەتىنىڭ قورىتىندىلارى تۋرالى ايتىپ بەردى. سونىمەن بىرگە وتكەن سەسسيا بارىسىندا قابىلدانعان زاڭدارداعى نەگىزگى جاڭالىقتار تۋرالى جان-جاقتى قۇلاعدار ەتىلدى.
بۇدان بولەك, كەزدەسۋ بارىسىندا جەرگىلىكتى تۇرعىنداردى تولعاندىراتىن ماسەلەلەر دە تالقىلاندى. ءماسليحات دەپۋتاتتارى دەنساۋلىق ساقتاۋ جانە جول سالاسىنداعى زاڭنامانى جەتىلدىرۋ, ءوڭىردى اۋىزسۋمەن قامتاماسىز ەتۋ تۋرالى ۇسىنىستارىن ءبىلدىردى.
بۇدان كەيىن سەناتور وڭىردەگى شاعىن اۋىلداردا بولىپ, ونداعى تۇرعىندارمەن كەزدەستى, ەلدى مەكەندەردىڭ پروبلەمالارىمەن تانىستى. دەپۋتات اتىراۋ وبلىسىنداعى اۋىلداردىڭ وزەكتى ماسەلەلەرى ۇنەمى نازارىندا ەكەنىن, ولاردى شەشۋ جونىندەگى جۇمىستى جالعاستىرا بەرەتىنىن اتاپ ءوتتى.