ەڭبەك جانە حالىقتى الەۋمەتتىك قورعاۋ مينيسترلىگى جاڭا شارت بويىنشا قانشا ەتنيكالىق قازاق كانداس مارتەبەسىن العانىن ءمالىم ەتتى, دەپ حابارلايدى Egemen.kz.
قازاقستاندا 2023 جىلدىڭ شىلدەسىنەن باستاپ «حالىقتىڭ كوشى-قونى تۋرالى» زاڭعا سايكەس, بەس نەگىزگى شارتتى قامتيتىن كانداس مارتەبەسىن بەرۋدىڭ جاڭا تاسىلدەرى ەنگىزىلدى. سول زاڭ اياسىندا 10 563 ەتنيكالىق قازاققا كانداس مارتەبەسى بەرىلگەن.
قانداس مارتەبەسى كەلەسى شارتتارعا سايكەس بەرىلەدى:
قونىس اۋدارۋشىلار مەن قانداستاردى قابىلداۋدىڭ وڭىرلىك كۆوتالارى شەڭبەرىندە قازاقستان ۇكىمەتى ايقىنداعان وڭىرلەرگە قونىستاندىرۋ ءۇشىن (ەڭبەك تاپشىلىعى بار وڭىرلەر);دەموگرافيالىق دامۋعا قاجەتتىلىگى بار دامۋ الەۋەتى بار اگلومەراتسيالار مەن اۋىلدىق ەلدى مەكەندەردىڭ, شاعىن جانە مونوقالالاردىڭ, اۋداندىق جانە وبلىستىق ماڭىزى بار قالالاردىڭ اۋماقتارىندا قونىستاندىرۋ ءۇشىن;
تۇرعىن ءۇي ماسەلەلەرىن ءوز بەتىنشە شەشۋ مۇمكىندىگىمەن (نەمەسە ەگەر ءوتىنىش بەرۋشى تۇرعىن ءۇي يەسى بولىپ تابىلماسا, ونىڭ تۇرۋىنا تۋىستارىنىڭ نوتاريات كۋالاندىرعان كەلىسىمىن بەرۋمەن) ءوتىنىش بەرۋشىنىڭ ءوتىنىش بەرۋ ءوڭىرىنىڭ اۋماعىندا تۇراقتى تۇراتىن قازاقستان ازاماتتارى بولىپ تابىلاتىن وتباسىمەن نەمەسە جاقىن تۋىستارىمەن (تۋىستىعىن راستاي وتىرىپ) قايتا قوسىلۋى ءۇشىن;
جۇمىس بەرۋشىلەردىڭ شاقىرۋى بويىنشا بوس جۇمىس ورنىنا جۇمىسقا ورنالاسۋ ءۇشىن (الدىن الا ەڭبەك شارتىن قوسا بەرە وتىرىپ) نە تۇرعىن ءۇي ماسەلەلەرىن ءوز بەتىنشە شەشۋ مۇمكىندىگى بار ەتنيكالىق قازاقتار قاتارىنداعى دارا كاسىپكەرلەر ءۇشىن;
قازاقستاننىڭ جوعارى وقۋ ورىندارىندا وقيتىن ەتنيكالىق قازاقتار ءۇشىن (وقۋ ورنىنان انىقتامانى قوسا بەرگەن كەزدە) بەرىلەدى.
جاڭا ءتاسىل ەنگىزىلگەننەن بەرى 3 296 ەتنيكالىق قازاق (1 374 وتباسى) جۇمىس كۇشى تاپشى ايماقتارعا قونىس اۋدارۋ ءۇشىن كانداس مارتەبەسىن العان. اگلومەراتسيا اۋماقتارىنا جانە اۋىلدىق ەلدى مەكەندەرگە قونىستاندىرۋ ءۇشىن – 948 ادام (475 وتباسى) قونىستانعان. وتباسىمەن جانە/نەمەسە جاقىن تۋىستارىمەن قوسىلۋى ءۇشىن – 5 655 ادام (2 843 وتباسى), جۇمىس بەرۋشىلەردىڭ شاقىرۋى بويىنشا بوس جۇمىس ورنىنا جۇمىسقا ورنالاسۋ ءۇشىن – 593 ادام (295 وتباسى) كەلگەن. جوعارى وقۋ ورىندارىنىڭ ستۋدەنتتەرى رەتىندە – 71 ادام (69 وتباسى) قانداس مارتەبەسىن العانى بەلگىلى بولدى.
ەسكە سالا كەتەيىك, ەتنيكالىق قازاقتاردىڭ تاريحي وتانىنا ورالۋىن ىنتالاندىرۋ جونىندەگى مەملەكەتتىك ساياسات ەلىمىز تاۋەلسىزدىك العاننان بەرى جۇزەگە اسىرىلىپ كەلەدى. سوڭعى جىلدارى قازاقستانعا 1 ميلليون 137,1 مىڭنان استام ادام ورالىپ, كانداس مارتەبەسىن العان.