جامبىل وبلىسىنىڭ پوليتسەيلەرى كولىگىمەن 24 كەلىدەن استام ەسىرتكى زاتىن تاسىمالداعان تاراز قالاسىنىڭ تۇرعىنىن ۇستادى, دەپ حابارلايدى Egemen.kz Polisia.kz سايتىنا سىلتەمە جاساپ.
جامبىل وبلىسى ءىىد ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى مەركەن اۋدانىنا قاراستى قۇمدى ايماعىندا «قاراسور-2024» جەدەل-الدىن الۋ شاراسى بارىسىندا KIA ماركالى اۆتوكولىگىن توقتاتقان.
كولىكتى تىزگىندەگەن 28 جاستاعى جۇرگىزۋشى قۇمدى ايماقتان تارازعا قاراي بەت العان. كولىك ىشىندە ءۇش جولاۋشى - 24, 26 جانە 28 جاستاعى وبلىس ورتالىعىنىڭ تۇرعىندارى بولعان. كولىكتىڭ جۇك سالىناتىن بولىگىنەن ءتورت پوليپروپيلەن پاكەت تابىلعان. ونىڭ ىشىنەن جالپى سالماعى 24 كەلى 160 گرامم قۇرايتىن ەسىرتكى زاتى مەن كەپتىرىلمەگەن ماريحۋانا تاركىلەنگەن.
«ەسىرتكى زاتتاردى اسا ءىرى كولەمدە زاڭسىز ساقتاۋ فاكتىسى بويىنشا سوتقا دەيىنگى تەرگەۋ باستالدى. ۇستالعاندار كىناسىن مويىنداپ, مەركەن اۋداندىق ىشكى ىستەر ءبولىمىنىڭ ۋاقىتشا ۇستاۋ يزولياتورىنا جەتكىزىلدى», دەدى جامبىل وبلىسى پد ەققىب باستىعى الىم باجىقباەۆ.