كەشە سىبايلاس جەمقورلىققا قارسى ءىس-قيمىل اگەنتتىگى بيىلعى جارتىجىلدىقتا اتقارعان جۇمىسىن قورىتىندىلادى. جيىنعا پرەزيدەنت اكىمشىلىگىنىڭ, باس پروكۋراتۋرانىڭ وكىلدەرى, قوعامدىق كەڭەس مۇشەلەرى, سونداي-اق اگەنتتىك پەن اۋماقتىق بولىمشەلەردىڭ باسشىلىق جانە جەكە قۇرامى قاتىستى.
اگەنتتىك توراعاسى اسحات جۇماعالي ءوز بايانداماسىندا سىبايلاس جەمقورلىققا قارسى ساياسات تۇجىرىمداماسىنىڭ ىسكە اسىرىلۋى, ازاماتتاردىڭ ءومىر ءسۇرۋ ساپاسىن جاقسارتۋعا جانە ەلدى دامىتۋعا باعىتتالعان شارالار, سونداي-اق مەملەكەت باسشىسىنىڭ بىرقاتار تاپسىرمالارىنىڭ ورىندالۋى تۋرالى حاباردار ەتتى. سىبايلاس جەمقورلىققا قارسى قىزمەتتىڭ الدىن الۋ جۇمىستارى اياسىندا بيىل 113 تالداۋ مەن مونيتورينگ جۇرگىزىلىپ, ءبىلىم, عىلىم جانە سپورت سالاسىندا ماڭىزدى ساراپتاما جاساعان.
بيۋدجەتتىك ۇدەرىستەردى اۆتوماتتاندىرۋدىڭ جانە دەرەكتەر بازاسىن ينتەگراتسيالاۋدىڭ بولماۋىنان بيۋدجەت قاراجاتىن جوسپارلاۋ جانە يگەرۋ كەزەڭدەرىندەگى جۇيەلىك تاۋەكەلدەر اسىرەسە ءبىلىم سالاسىندا انىقتالعان. سول ءۇشىن قازىر قوسارلانعان قارجىلاندىرۋ, «جوق جاندارعا» تولەمدەر, ۇستەمەاقىلار مەن تىركەۋلەردى اسىرا باعالاۋ فاكتىلەرى الىنىپ تاستالدى. ال عىلىم سالاسىنا جۇرگىزىلگەن تالداۋ عىلىمي جوبالاردى ىرىكتەۋدىڭ اشىقتىعىنا, ولاردى ىسكە اسىرۋدىڭ فورمالدىلىعىنا, ناتيجەلەر ءۇشىن جاۋاپكەرشىلىكتىڭ بولماۋىنا, زەرتتەۋ قورىتىندىلارىنىڭ تومەن سۇرانىسىنا بايلانىستى ەلەۋلى تاۋەكەلدەردى ايقىندادى. جوبالاردىڭ 90%-ى بەلگىلەنگەن ماقساتتارعا جەتە المايدى, ال زەرتتەۋلەردىڭ 70%-ى پراكتيكالىق ماڭىزى جوق ماقالالار مەن كىتاپتار جازۋمەن اياقتالادى.
«جوعارى جەتىستىكتەر سپورتى» مەن «بۇقارالىق سپورت» اراسىنداعى قارجىلاندىرۋ تەڭگەرىمسىزدىگى, سونداي-اق ونىڭ اشىقتىعى سپورت سالاسىنداعى تەرىس پايدالانۋ ءۇشىن ەلەۋلى تاۋەكەلدەردى تۋدىرعان. سوندىقتان اگەنتتىك قارجىلاندىرۋدىڭ اشىقتىعىن, مەملەكەتتىك قاراجاتتىڭ ءتيىمسىز جۇمسالۋىن, ءونىم بەرۋشىلەردىڭ ۇلەستەستىگىن, ساتىپ الۋ باعاسىن كوتەرۋدى بەلگىلەدى. وسى كورسەتىلگەن تالداۋلاردىڭ ورىندالۋىنا بايلانىستى پرەزيدەنت اكىمشىلىگىنىڭ باقىلاۋىنداعى تاۋەكەلدەردى جويۋ تۋرالى جول كارتالارى ازىرلەندى. ءدارى-دارمەكتەرمەن ساپالى قامتاماسىز ەتۋ ماسەلەسىنىڭ وزەكتىلىگىنە بايلانىستى «سك-فارماتسيادا» تالداۋ جۇرگىزىلدى. كومپانيادا انىقتالعانداي, ساتىپ الۋ جۇيەلەرى ءتيىمسىز قۇرىلعان, قاجەتسىز «توسەمدەر» جاسالعان, كوتەرمە جەتكىزۋشىلەردىڭ كارتەلدىك كەلىسىمى بار جانە ولاردىڭ قىزمەتىنە ءتيىمدى باقىلاۋ جوق. اگەنتتىك جۇمىسىندا جەمقورلىققا قارسى مادەنيەتتى قالىپتاستىرۋعا جانە پاراساتتىلىق قۇندىلىقتارىن ناسيحاتتاۋعا ەرەكشە كوڭىل بولىنەدى. بيزنەستى قورعاۋ شەڭبەرىندە سىبايلاس جەمقورلىققا قارسى قىزمەت «بيزنەسكە جول» جوباسىن ىسكە اسىرۋدى جالعاستىرىپ كەلەدى. بيىل 84 پروبلەمالىق كەيس شەشىلدى, 9,5 مىڭعا جۋىق كاسىپكەردىڭ قۇقىقتارى قورعالعان. مىسالى, تۇركىستان وبلىسىندا فەرمەرلەرگە سۋدى قايتا ساتقان دەلدالداردىڭ قىزمەتى توقتاتىلدى. اگەنتتىك باستاماسىنا سايكەس سۋ جەتكىزۋشىمەن تىكەلەي شارتتار جاسالدى, بۇل اۋىل تۇرعىندارى ءۇشىن باعانى 2 ەسەگە تومەندەتتى.
سىبايلاس جەمقورلىققا قارسى قىزمەتتىڭ وڭىرلىك بولىمشەلەرى بيىل پروبلەمالىق تۇرعىن ءۇي جانە الەۋمەتتىك وبەكتىلەردى سۇيەمەلدەۋدى جالعاستىردى. مونيتورينگتە 156 جوبا بار, ولاردىڭ 40-ى اياقتالدى. سىبايلاس جەمقورلىقتىڭ الدىن الۋمەن ءبىر مەزگىلدە جازانىڭ بۇلتارتپاۋشىلىق قاعيداتىن قامتاماسىز ەتۋگە ۇلكەن كوڭىل بولىنگەن. جىل باسىنان بەرى 876 قىلمىستىق قۇقىق بۇزۋشىلىق تىركەلسە, ونىڭ ەداۋىر بولىگى پاراقورلىق, جىمقىرۋ جانە لاۋازىمدىق وكىلەتتىكتەردى تەرىس پايدالانۋ بولىپ وتىر. ايتالىق, 592 ادام اشكەرەلەندى, ونىڭ 107-ءسى ءارتۇرلى دەڭگەيدەگى باسشىلار بولسا, 329 ادام سوتتالدى. سونىمەن قاتار اگەنتتىك قىلمىستىق توپتاردى, جوعارى لاۋازىمدى تۇلعالاردىڭ قاتىسۋىمەن تۇراقتى سحەمالاردى اشكەرەلەۋگە, جۇيەلى جەمقورلىقتى انىقتاۋعا بايلانىستى ساندىق ەمەس, ساپالىق كورسەتكىشتەرگە باعدارلانعان. بيىل اياقتالعان ىستەرگە قاتىستى 195 ملرد تەڭگە وتەلدى. ال 2,5 جىل ىشىندە قازاقستان حالقىنا 1,07 ترلن تەڭگە قايتارىلدى.