الماتى وبلىسىنىڭ پروكۋراتۋراسى اۋىل شارۋاشىلىعى باسقارماسىن تەكسەرۋ ناتيجەسىندە بيۋدجەتتىك سۋبسيديالاردى زاڭسىز تولەۋ جانە ۇرلاۋ فاكتىلەرىن انىقتادى, دەپ جازادى Egemen.kz.
سۋبسيديا تولەۋ اياسىندا زاڭسىز ۇلەستىرىلگەن قارجى سوماسى 4,8 ملرد تەڭگەدەن اسقان.
پروكۋراتۋرانىڭ قاداعالاۋ اكتىسى بويىنشا شىعىندى وتەۋ پروتسەسى باستالىپ, بيۋدجەتكە 110 ملن تەڭگە قايتارىلدى.
«اۋىلدارداعى الەۋمەتتىك-وندىرىستىك كووپەراتيۆتەر اسىل تۇقىمدى جانۋارلاردى الۋ ماقساتىندا سەلەكتسيالىق جۇمىستارعا ارنالعان 1,2 ملرد تەڭگە سۋبسيديانى ۇرلاعان. ءىس جۇزىندە بۇل جۇمىستار ورىندالماي, قۇجاتتار رەسمي تۇردە رەسىمدەلىپ, وبلىستا اسىل تۇقىمدى مال سانى ۇلعايتىلماعان. وبلىس اكىمدىگىنىڭ ەسەپتىك دەرەكتەرى بويىنشا, اسىل تۇقىمدى مال شارۋاشىلىعىن دامىتۋ بويىنشا بەلسەندى جۇمىس جۇرگىزىلىپ جاتىر. قاعاز جۇزىندە اسىل تۇقىمدى قوي باسى 4 جىلدا 1,9 ملن-عا دەيىن ۇلعايتىلعانى تۋرالى دەرەك جالعان بولىپ شىعىپ, شىن مانىندە نەبارى 367 مىڭ باس ەكەنى بەلگىلى بولدى», دەلىنگەن الماتى وبلىسىنىڭ پروكۋراتۋراسى تاراتقان حابارلامادا.
ماسەلەن, الماتى وبلىسى ۇيعىر اۋدانىندا تىركەلگەن جانۋارلار جوق بولسا دا, 2023 جىلى سەلەكتسيالىق جۇمىستاردى جۇرگىزگەنى ءۇشىن 45,2 ملن تەڭگە سوماسىنا سۋبسيديا العان.
سۋبسيديا العان كەزدە بۇل كووپەراتيۆ ءوزىنىڭ جەكە شارۋاشىلىعى رەتىندە ۇيعىر اۋدانىنىڭ تۇرعىندارىنا تيەسىلى اۋىلشارۋاشىلىق جانۋارلارىن تىركەگەن.
«اكىمدىك مال باسىنىڭ ناقتى ساقتالۋىنا مونيتورينگ جۇرگىزبەگەن, سالدارىنان مەملەكەتتىك بيۋدجەتكە زالال كەلتىرىلگەن. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر, زاڭسىز تولەنگەن سۋبسيديالاردى قايتارۋعا 3 ۇسىنىس ەنگىزىلدى», دەپ قوستى وبلىستىق پروكۋراتۋرا وكىلدەرى.