كەنشىلەر قالاسىنىڭ اكىمى بولىپ مۇرات ەربولات ۇلى بورىباەۆ تاعايىندالدى. جاڭا اكىمدى قالا اكتيۆىنە وبلىس اكىمى بەرىك ابدىعالي ۇلى تانىستىردى.
مۇرات بورىباەۆ 1991 جىلى قارساقباي كەنتىندە دۇنيەگە كەلگەن.
ول 2012 جىلى قاراعاندى مەملەكەتتىك تەحنيكالىق ۋنيۆەرسيتەتىن «مەتاللۋرگيا قارا جانە ءتۇستى مەتاللدار» ماماندىعى بويىنشا, 2014 جىلى قاراعاندى قازتۇتىنۋوداعى ەكونوميكالىق ۋنيۆەرسيتەتىن «ەكونوميكا» ماماندىعى بويىنشا تامامداعان. 2021 جىلى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىندا وقىپ, «مەملەكەتتىك مەنەدجمەنت» ماگيسترى اتانعان. ەڭبەك جولىن 2011 جىلى نۇرقازعان بايىتۋ فابريكاسىندا فلوتاتور بولىپ باستاعان م. بورىباەۆ كەيىن تسەح شەبەرى, باستىعى بولدى. 2015 جىلى نۇرقازعان بايىتۋ فابريكاسىنىڭ ديرەكتورى, 2017 جىلدان باستاپ تاعايىندالعانعا شەيىن جەزقازعان بايىتۋ فابريكاسىنىڭ ديرەكتورى قىزمەتىندە بولدى.«كەنشىلەر قالاسىنا ءوندىرىستىڭ قازانىندا قايناپ, ءپىسىپ, جەتىلگەن ازاماتتىڭ تاعايىندالعانىن قۇپتايمىن. مۇرات ەربولات ۇلىنىڭ رۋحانياتقا جاقىن ەكەنىن دە, ۇلتتىق قۇندىلىقتاردى دارىپتەپ جۇرگەنىن دە جاقسى بىلەمىن. سوندىقتان, قاسيەتتى قانىش يمانتاي ۇلىنىڭ ەسىمىن يەلەنگەن قالاعا جاڭا تۇرپاتتى باسشى كەلدى دەپ سەنەمىن», دەدى كەن ءوندىرىسىنىڭ ارداگەرى, قالانىڭ قۇرمەتتى ازاماتى مۇسا تىلەۋوۆ.