باقىلاۋسىز كەتكەن بالالار

ەلوردالىق پوليتسەيلەر «قۇ­قىقتىق ءتارتىپ» جەدەل-الدىن الۋ ءىس-شاراسى اياسىندا, سون­داي-اق كامەلەتكە تولماعاندار ارا­سىن­داعى قۇقىق بۇزۋشىلىقتار مەن قىلمىستاردىڭ الدىن الۋ, بالالاردىڭ قاداعالاۋسىز جانە باقىلاۋسىز قالۋىنىڭ الدىن الۋ ماقساتىندا تۇراقتى نەگىزدە جەرگىلىكتى-رەيدتىك ءىس-شارالارىن وتكىزەدى. سەبەبى كامە­لەت­كە تول­ماعاندارعا قاتىستى قوز­عالاتىن قىلمىستىق ءىستىڭ كوبىسى زورلاۋ, جاس بالالاردى ازعىن­دىق جولعا ءتۇسىرۋ مەن 16 جاسقا تول­ماعاندارمەن جى­نىستىق قاتى­ناسقا ءتۇسۋ بابى بويىنشا قارالعان. ال جاعا ۇستا­تار مۇن­داي قىلمىستىڭ ارتۋى­نا تۇن­گى جور­تۋىلدىڭ دا سالدارى بارىن قۇقىق قورعاۋ قىزمەتكەرلەرى ءجيى ەسكەرتەدى. ينسپەكتورلار اتا-انالار مەن وقۋشىلارعا كۇن­دە­­لىكتى تۇسىندىرمە جۇمىسىن جۇر­­گىزىپ, جۇيەلى تۇردە كەزدەسۋ وتكىزەدى. ونىڭ ىشىندە تۇنگى مەزگىل­دە جۇرەتىن جەتكىنشەكتەردى باقى­لاۋعا الۋعا ەرەكشە نازار اۋدارىلادى. ويتكەنى الگىندە ايتقانداي, جاسوسپىرىمدەر قىلمىسىنا اتا-انانىڭ باقىلاۋىنسىز قالعان بالالاردىڭ قاتىسى كوبىرەك بولادى. سول ءۇشىن ءتارتىپ ساقشىلارى جاز مەزگىلى باستالسا, تاۋلىك بويى جۇر­گىزىلەتىن تۇنگى قالاداعى تەكسە­رىس­تى ۇدەتە تۇسەدى.

بۇگىندە كامەلەتكە تول­ما­عان­داردىڭ اراسىنداعى قۇقىق بۇزۋ­شىلىقتىڭ الدىن الۋدى كوز­دەي­تىن ءىس-شارالارعا قوسىمشا «كومەن­دانتتىق ساعات» ەنگىزىلگەن. بۇل 18 جاسقا تولماعان بالالار مەن جاسوسپىرىمدەرگە زاڭدى وكىلدەرىنىڭ ەرىپ ءجۇرۋىنسىز ۇيدەن تىس جەرگە شىعۋىنا تىيىم سالۋعا با­عىت­تالعان. ياعني كامەلەتكە تول­ماعان بالانىڭ تۇنگى وننان كەيىن ويىن-ساۋىق مەكەمەلەرىندە جۇ­رۋىنە, ال تۇنگى ون بىردەن سوڭ تۇر­عىن­جايدان اتتاپ شىعۋعا مۇلدە بولمايدى. الايدا قۇقىق قور­عاۋ قىزمەتىنىڭ وكىلدەرى ەسكەرت­پە­نى ەلەڭ قىلمايتىن اتا-انالار مەن جاسوسپىرىمدەردىڭ ءجيى كەز­دەسەتىنىن تىلگە تيەك ەتەدى. سون­دىقتان پوليتسەيلەر ويىن-ساۋىق مەكەمەلەرىندە كامەلەتكە تول­ما­عان­داردىڭ بولۋىنا ءجيى تەك­سەرىس جاساپ, تۇراقتى رەيد جۇر­گى­زەدى.

ماسەلەن, جاقىندا وتكىزىلگەن ءىس-شارا كەزىندە ش.ايتماتوۆ كو­شە­­سىندەگى قالانىڭ كومپيۋتەر­لىك ­كلۋب­­­تارىنىڭ بىرىندە ساعات تۇنگى ەكىدە 16 جاستاعى ءجاسوسپىرىم الاڭ­سىز ويىننىڭ قىزىعىنا كىرىپ كەت­كەنى انىقتالىپ وتىر. ەڭ سوراقىسى, ەسكەرت­پەنى ەلەڭ قىل­ماعان بالانىڭ قاسىندا زاڭ­دى وكىلى دە جوق. ال مۇنداي تۇن­دە­لەتىپ جۇرگەن بالا­لاردىڭ جا­ۋاپ­كەرشىلىگىن ۇمىت قالدىرعان اتا-انالارعا جاۋاپ­كەر­شىلىك بار. ايتالىق, تۇنگى ساعات 22-دەن تاڭ­عى 6-عا دەيىن ويىن-ساۋىق مەكە­مە­­­سىندە بولۋىنا جول بەرگەنى ءۇشىن مەكەمە اكىمشىسى اقبتك 132-بابىنىڭ 1-بولىگىنە سايكەس, اكىم­­شىلىك جاۋاپكەرشىلىككە تار­تىل­دى. سونداي-اق كامەلەتكە تول­ماعان بالانىڭ اتا-اناسىنا اقبتك 442-بابىنىڭ 1-بولىگى بو­يىن­شا اكىمشىلىك جاۋاپكەرشىلىك قاراس­تى­رىلعان.

بيىل جىل باسىنان باستاپ ەلوردالىق پوليتسەيلەر وسىنداي 4 مىڭنان استام كامەلەتكە تولماعانداردى اۋماقتىق پب-عا جەتكىزدى. استانا قالاسىنىڭ پوليتسيا دەپارتامەنتى اتا-انالارعا بالالارىنىڭ تاربيەسى مەن قاۋىپ­سىز­دىگىنە جاۋاپكەرشىلىكپەن قا­راۋ قاجەتتىگىن ەسكەرتىپ كەلەدى. ال بۇل ەسكەرتپەنى ەلەمەيتىن, جا­ۋاپتى مىندەتىنە ءجۇردىم-بار­دىم قارايتىن اتا-انالارعا ار­نال­عان زاڭنىڭ بابى بار. تۇندە جۇر­گەن بالالاردىڭ تاع­دى­­رى تول­­­عاندىرماسا, مىندەت­تە­رىن تيى­سىنشە ورىنداماعان زاڭ­دى وكىل­­دەر اكىمشىلىك جاۋاپ­كەر­شى­لىك­تەن جالتارا المايدى. ويتكەنى قىلمىستى بولدىرماۋ – تارتىپكە مويىنۇسىنۋدان باستالادى.