ساۋد ارابياسىنىڭ دەنساۋلىق ساقتاۋ ءمينيسترى فاحد بەن ابدۋرراحمان ءال-دجالادەلدىڭ ايتۋىنشا, قازا تاپقان 1301 ادامنىڭ 83 پايىزى قاجىلىق راسىمدەرىن ورىنداۋعا رۇقساتسىز بارىپ, اپتاپ ىستىقتا ۇزاق قاشىقتىققا جاياۋ جۇرگەن, دەپ حابارلايدى Egemen.kz inbusiness.kz-كە سىلتەمە جاساپ.
اتالعان مينيستر مەملەكەتتىك Al Ekhbariya تەلەارناسىنا سۇحبات بەرىپ, 95 قاجى اۋرۋحانالاردا ەم الىپ جاتقانىن, ولاردىڭ كەيبىرى باس شاھار ەر-ريادقا ۇشاقپەن جەتكىزىلگەنىن ايتتى. سونداي-اق مينيستر قايتىس بولعان قاجىلاردىڭ كوبىنىڭ جەكە باسىن كۋالاندىراتىن قۇجاتتارى بولماعاندىقتان, ولاردىڭ كىم ەكەنىن انىقتاۋ جۇمىستارى كەشىكتىرىلىپ جاتقانىن مالىمدەدى. ءمينيستردىڭ سوزىنشە, مارقۇمدار مەككەدە جەرلەندى.
مىسىر بيلىگى رۇقساتسىز قاجىلارعا ساۋد ارابياسىنا بارۋعا كومەكتەسكەن 16 تۋريستىك فيرمانىڭ ليتسەنزياسىن قايتارىپ العان. ساۋد ارابياسى بيلىگى قاجىلىققا رۇقساتسىز بارۋشىلاردىڭ جولىن كەسىپ, ونداعان مىڭ ادامدى ەلدەن شىعاردى. بىراق كوبى, نەگىزىنەن مىسىرلىقتار, مەككەدەگى جانە ونىڭ اينالاسىنداعى قاسيەتتى جەرلەرگە جاياۋ جەتكەن. رۇقسات ەتىلگەن قاجىلاردان ايىرماشىلىعى ولاردا اپتاپ ىستىقتان جان ساقتايتىن قوناقۇيلەرى بولماعان.
Associated Press اگەنتتىگىنىڭ مالىمەتىنشە, قايتىس بولعانداردىڭ اراسىندا يندونەزيادان 165, ءۇندىستاننان 98 جانە يوردانيادان, تۋنيستەن, ماروككودان, الجيردەن, مالايزيادان ونداعان قاجى بار. سونىمەن قاتار اقش ەكى ازاماتىنىڭ قايتىس بولعانىن حابارلادى.
ساۋد ارابياسىنىڭ ۇلتتىق مەتەورولوگيا ورتالىعىنىڭ مالىمەتى بويىنشا, بيىلعى قاجىلىق كەزىندە تاۋلىكتىك جوعارى تەمپەراتۋرا مەككە مەن ونىڭ اينالاسىنداعى قاسيەتتى ورىنداردا 46 - 49 گرادۋس ارالىعىندا بولدى.
ساۋد ارابياسى كوپشىلىكتى باقىلاۋعا جانە جىلداعى بەس كۇندىك قاجىلىققا باراتىندار ءۇشىن قاۋىپسىزدىكتى قامتاماسىز ەتۋگە ميللياردتاعان دوللار جۇمسايدى ەكەن. الايدا قاتىسۋشىلاردىڭ كوپتىگى اتالعان شارالاردى ءتيىستى دەڭگەيدە جۇزەگە اسىرۋدى قيىنداتىپ وتىر.