ۇلتتىق ۇلان ساپىنداعى اسكەري قىزمەتشىلەردىڭ بالالارى اراسىندا قۇقىقتىق ءتارتىپ اسكەرىنىڭ بەدەلىن ارتتىرۋ ماقساتىندا «مەن – وتان قورعاۋشىمىن!» فوتوبايقاۋى وتكىزىلدى.
بايقاۋ بالالاردىڭ بويىندا پاتريوتتىق سەزىمدەردى تاربيەلەۋ, وتانعا قۇرمەت كورسەتۋ, اسكەري قىزمەتتىڭ بەدەلىن ارتتىرۋ ماقساتىندا ۇيىمداستىرىلدى.
فوتوبايقاۋعا بارلىق وڭىرلىك قولباسشىلىقتاردان, ۇلتتىق ۇلان اكادەمياسىنان جانە تىكەلەي باعىنىستاعى اسكەري بولىمدەردەن 90-نان استام ءوتىنىم كەلىپ ءتۇستى. بايقاۋدىڭ جەڭىمپازدارى مەن جۇلدەگەرلەرى ۇلتتىق ۇلاننىڭ Instagram-داعى رەسمي اككاۋنتىندا جينالعان داۋىس سانى ارقىلى انىقتالدى. داۋىس بەرۋ ناتيجەسىندە ءبىرىنشى ورىندى 5451 اسكەري ءبولىمى بايلانىس قويماسىنىڭ اعا مامانى, قاتارداعى بالجان تۇرسىنوۆانىڭ 1433 داۋىس جيناعان ۇلى رامازان تۇرسىن يەلەندى. ەكىنشى ورىن ۇلتتىق ۇلان اكادەمياسى 1-وقۋ باتالونىنىڭ 2-وقۋ روتاسى 2-وقۋ ۆزۆودىنىڭ كومانديرى, كاپيتان جاناربەك قايىرجانوۆتىڭ ۇلى ءجانالى بۇركىتكە 1230 داۋىس بۇيىردى. كوشباسشىلار ۇشتىگىن «وڭتۇستىك» وڭىرلىك قولباسشىلىعى تىل باسقارماسى كيىم-كەشەك قىزمەتىنىڭ باستىعى, مايور نۇرجان الدانازاروۆتىڭ بالالارى تۇيىندەدى. مانسۇر مەن ءالينۇر الدانازاروۆتار 982 داۋىس جيناعان.
ۇلتتىق ۇلاننىڭ قوعامداعى ابىرويىن ارتتىرۋعا بەلسەندى قاتىسقان جانە جۇلدەلى ورىندارعا يە بولعان اسكەري قىزمەتشىلەردىڭ بالالارى ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى, گەنەرال-لەيتەنانت ەركىن بوتاقانوۆتىڭ اتىنان ديپلومدارمەن, العىسحاتتارمەن جانە باعالى سىيلىقتارمەن ماراپاتتالدى.