ورانعايداعى وڭالتۋ ورتالىعى قاشان اشىلادى؟

جالپى, تۇركىستاندا قۇرىلىس قىزعان كەزدە كەيبىر الپاۋىت كومپانيالارعا ايرىقشا ارتىقشىلىق جاسالعانى, كەيبىر نىسان­دارعا بولىنگەن قاراجاتتاردىڭ كۇماندىلىگى, كەيبىر عيماراتتاردىڭ الدىن الا جوسپارسىز, ماقساتسىز سالىنعانى بۇعان دەيىن دە تالاي ايتىلعان. اسىرەسە تۇركىستان وبلىس ورتالىعى بولعالى بەرى وبلىستىق قۇرىلىس باسقارماسىنا باسشىلىق جاساپ كەلە جاتقان توقتار ۋسۋباليەۆتىڭ «ەركەلىگى» ءبىر اتانعا جۇك بولۋعا اينالدى دەسەك ارتىق ايتقانىمىز ەمەس شىعار. قايبىر جولى ءماجىلىستىڭ جانە «اmanat» پارتياسىنىڭ توراعاسى ەرلان قوشانوۆتىڭ تىكەلەي تاپسىرماسىمەن پارتيا جانىنداعى سىبايلاس جەمقورلىققا قارسى كۇرەس جونىندەگى كوميسسيا مۇشەلەرى تۇركىستان وبلىسىندا قۇرىلىس سالاسىنداعى جۇيەسىزدىك پەن جۇگەنسىزدىككە قاتىستى ارنايى جيىن وتكىزگەن. وسى جيىندا جاۋاپتى باسشىلاردىڭ سالعىرت­­تىعىنان وبلىستا بىرنەشە مەكتەپ قۇرىلىسىنىڭ توقتاپ تۇرعانى ايتىلعانىمەن, كوكەيدەگى كوپ سۇراققا جاۋاپ تابىلمادى. سەبەبى كوميسسيانىڭ وتىرىسىنا قۇرىلىس باسقارماسىنىڭ باسشىسى توقتار ۋسۋباليەۆتىڭ ءوزى, نە وكىلى كەلگەن جوق. وبلىس­تىڭ باس قۇرىلىسشىسى ءماجىلىس توراعاسىنىڭ دا تاپسىرماسىنا ءاتۇستى قاراعانىنا قايران بولدىق. وسىن­داي جا­ۋاپتان جالتارۋدىڭ اقىرى ەرەكشە كۇتىمدى, ايرىقشا قامقورلىقتى قاجەت ەتەدى دەگەن مۇگەدەكتەرگە قاتىستى نى­سانعا دا كەلىپ جەتتى. وسى ماسەلەنىڭ انىق-قانىعىن بىلۋگە ەل گازەتى «Egemen Qazaqstan» گازەتىنىڭ مەنشىكتى ءتىلشىسى عانا ەمەس, وبلىستىق ءماسليحاتتىڭ دەپۋ­تاتى, «Amanat» پارتيا­سى وبلىستىق فيليا­لىنىڭ جانىنداعى وتباسى جانە الەۋ­مەتتىك قولداۋ جونىندەگى قوعامدىق كەڭەس­تىڭ توراعاسى رەتىندە دە قۇزىرلى مەكەمەلەرگە جان جاقتى سۇراۋ سالىپ زەرتتەۋ, زەردەلەۋ جۇرگىزدىك. ماسەلەنىڭ ءمانىسى بىلاي.

تۇركىستان وبلىسىنىڭ الەۋمەتتىك-ەكو­نو­ميكالىق دامۋىنىڭ 2021-2025 جىل­دارعا ارنالعان كەشەندى جوسپارىنا سايكەس ساۋران اۋدانى ورانعاي اۋىلىندا مۇگەدەكتىگى بار ادامدارعا ارنالعان 200 ورىندىق وڭالتۋ ورتالىعىن سالۋ جوس­پارلانعان. مەملەكەتتىك ساتىپ الۋ كونكۋرس­ىن وتكىزۋ ناتيجەسىندە «شىمكەنت قۇرىلىس» جشس-ىمەن 2021 جىلدىڭ قىر­كۇيەگىندە كەلىسىمشارت تۇزىلگەن. سول كەزدە جوبانىڭ جالپى قۇنى 2 562,9 ملن تەڭگەنى قۇراعان. 2021-2022 جىلدارى رەس­پۋب­ليكالىق بيۋدجەتتەن 2 306,6 ملن تەڭگە, وبلىستىق بيۋدجەتتەن 256,3 ملن تەڭگە بولىنگەن. كەلىسىمشارتقا سايكەس قۇرى­لىس جۇمىستارى بىلتىر اياقتالۋعا ءتيىس ەدى. الايدا ەرەكشە جاندارعا ارنالعان نى­سان­نىڭ قۇرىلىسىنا ەرەكشە نازار اۋدارۋى ءتيىس شەنەۋنىكتەردىڭ شالاعاي تىرلىگىنەن نىسان ءالى پايدالانۋعا بەرىلگەن جوق.

– وبلىسقا وڭالتۋ ورتالىعى كەرەك­تىگىن ايتىپ, 2015 جىلدان باستاپ ماسەلە كوتەر­دىك. وڭىردەگى مۇمكىندىگى شەكتەۋلى جانداردىڭ مۇڭ-مۇقتاجىن, ۇسىنىس-تىلەگىن حاتقا ءتۇسىرىپ پرەزيدەنتكە, پارلامەنتكە, ۇكىمەتكە جولداعان دا بولاتىنبىز. ويتكەنى جاڭا قۇرىلعان وبلىستا مۇگەدەكتەرگە جان-جاقتى جاعداي جاسالعان وڭالتۋ ورتالىعى جوق. مەملەكەت باسشىسى قاسىم-جومارت توقاەۆ مۇمكىندىگى شەكتەۋلى ادامدارعا بارىنشا قولايلى جاعداي جاساۋ ماڭىزدى ماسەلە ەكەنىن ايتتى. ءبىزدىڭ جانايقايىمىزدىڭ ناتيجەسىندە ساۋران اۋدانىندا وڭالتۋ ورتالىعىن سالۋ جونىندە شەشىم قابىلدانىپ, ول جۇزەگە اسىرىلا باستاعاندا قۋاندىق. الايدا وكىنىشكە قاراي, ول نىسان بۇگىندە «ساقالدى قۇرىلىسقا» اينالدى. جاۋاپتىلار بىلتىر كوكتەمدە پايدالانۋعا بەرەمىز دەدى, ول ورىندالمادى. ۋادە ەتىلگەن جەلتوقسان دا ءوتتى, جاڭا جىل دا ارتتا قالدى. كوكتەم ءوتىپ, جاز شىقتى. قۇرىلىس باسقارماسى ۋادە بەرىپ, جۇرتتى الداۋسىراتۋدان جالىعار ەمەس. جاۋاپكەرشىلىك جوق. قارجى بولىنگەن, بىراق ارتقارىلىپ جاتقان جۇمىس وتە باياۋ. مۇگەدەكتەر قۇقى قورعالمايدى. وبلىستاعى جالعىز ورتالىقتىڭ قۇرىلىس قارقىنىنا, ساپاسىنا كوڭىل تولمايدى, – دەيدى «اق نيەت» مۇگەدەكتەر مەن زاعيپ جانداردىڭ قايىرىمدىلىق قورىنىڭ توراعاسى, ءى توپتاعى مۇگەدەك داستان ورىنباساروۆ.

بىلتىر ماۋسىمدا ەڭبەك جانە الەۋ­مەتتىك قورعاۋ كوميتەتىنىڭ توراعاسى ت.وسپانقۇلوۆ وڭالتۋ ورتالىعىنىڭ قۇرىلىس الاڭىندا بولىپ, جۇمىس قار­قىنىنىڭ قاناعاتتانارلىقسىز ەكەندىگىن, جۇمىس كەستەسىنەن ايتارلىقتاي ارتتا قالۋ بار ەكەنىن ايتقان. ءماجىلىس دەپۋتاتى ە.ابديەۆ تە نىساننىڭ باسىنا بارىپ, وسىنداي پىكىر بىلدىرگەن ەدى. الايدا بۇدان قورىتىندى جاساعان ەشكىم جوق. سونىمەن, قۇرىلىستىڭ كەشەۋىلدەۋىنە نە سەبەپ؟

وبلىستىق جۇمىسپەن قامتۋدى ۇيلەس­تىرۋ جانە الەۋمەتتىك باعدارلامالار باس­قارماسىنىڭ باسشىسى ءاسيا تەمىر­باەۆانىڭ بىزگە بەرگەن حاتىنا قاراعاندا, ەڭ باستى سەبەپ – ينفلياتسيا. ادەتتەگىشە, نارىقتاعى قۇرىلىس ماتەريالدارىنىڭ باعاسى قىمباتتاعان, جۇمىسشىلاردىڭ ەڭبەك اقىسى وسكەن. الايدا سول 2021 جىلدان بەرگى ارالىقتا وبلىستا قانشاما مەكتەپ, اۋرۋحانا سالىنىپ, پايدالانۋعا بەرىلدى. قۇنسىزدانۋدىڭ نەگە ءدال مۇگەدەكتەرگە ارنالعان نىساننىڭ باسىن تۇمشالاپ العانىن تۇسىنبەدىك. ماسەلە قۇنسىزدىقتا ەمەس, قۇنتسىزدىقتا جاتقان سياقتى.

مۇمكىندىگى شەكتەۋلى جاندار كوتەرگەن ماسەلەدەن ءماجىلىس دەپۋتاتتارى دا حاباردار. «Amanat» پارتياسى تۇركىستان وبلىستىق فيليالى جانىنداعى وتباسى جانە حالىقتى الەۋمەتتىك قورعاۋ ماسەلە­لەرى جونىندەگى قوعامدىق كەڭەسكە دە ءمالىم. ال قوعامدىق كەڭەس مۇشەلەرى جۋىردا قۇرىلىس باسىنا بارىپ, مۇمكىندىگى شەكتەۋلى جاندارمەن, قۇرىلىسقا جاۋاپتىلارمەن كەزدەستىك. ساپاسى مەن مەرزىمىنە بايلانىستى بىرقاتار كەمشىلىك انىقتالدى. كوتەرىلگەن ماسەلەلەردەن اڭعارعانىمىز – «جول كارتاسىندا» باقىلاۋدا تۇرعان ايرىقشا نىساننىڭ جوبالىق-سمەتالىق قۇجاتى دۇرىس جاسالماعان. باستى كەمشى­لىك تە وسى. سوندىقتان كوپتەگەن جۇمىس ساپاسىز اتقارىلعان, كەي جۇمىسقا تولىق قارجى بولىنبەگەن. ەندى قوسىمشا قارجى­لان­دىرۋعا قاتىستى ماسەلەگە توقتالساق.

تەمىرباەۆانىڭ بىزگە بەرگەن جاۋابىندا قۇرىلىس باسقارماسى تاراپىنان وڭالتۋ ورتالىعىن قوسىمشا قارجىلاندىرۋ, قۇرىلىس جۇمىستارىنىڭ سمەتالىق قۇنىن سول كەزدەگى قالىپتاسقان باعاعا سايكەستەندىرۋ جونىندە قايتا تۇزەتۋ ۇسىنىسى 2021 جىلدىڭ قاراشا-جەلتوقسان ايلارىندا ەنگىزىلگەن. الايدا قۇرىلىس سالاسىنا جەتەكشىلىك جاسايتىن وبلىس اكىمىنىڭ ورىنباسارى تاراپىنان اتالعان ۇسىنىس قولداۋ تاپپاعان. ال قۇرىلىس باسقارماسىنىڭ باسشىسى توقتار ۋسۋباليەۆتىڭ بىزگە بەرگەن جاۋابىندا ۇسىنىستىڭ بيۋدجەتتىك كوميسسيادان قولداۋ تاپپاعانى كەلتىرىلگەن. سوندا بۇل مالىمەتتەردىڭ قايسىسىنا سەنەمىز؟ قالاي بولعاندا دا وبلىس اكىمىنىڭ ورىنباسارى مەن ماسليحاتتاعى بيۋدجەتتىك كوميسسيانىڭ مۇگەدەكتەردىڭ مۇڭ-مۇقتاجدىعىنان قارجى اياپ قالۋى مۇمكىن ەمەس قوي. بۇل جەردە ءبىر كىلتيپاننىڭ بارى انىق.

ەڭ قىزىعى, قوسىمشا قارجىلاندىرۋ بولماعان سوڭ, قۇرىلىس باسقارماسى وڭال­تۋ ورتالىعى نىسانىنىڭ قۇرىلىسىن اياقتاۋ ءۇشىن ورتالىقتىڭ تەحنولوگيالىق جابدىقتارعا قارالعان 425,2 ملن تەڭگەنىڭ 98,0 ملن تەڭگەسىن جوبالىق-سمەتالىق قۇجاتتامادا قارالماعان قازانشۇڭقىر, ىشكى ارلەۋ جۇمىستارى, سىرتقى سۋعارۋ, كونديتسيونەر جۇيەلەرىن ورناتۋ جۇمىس­تارىن جۇرگىزۋگە جۇمساپ جىبەرگەن. بۇل قانشالىقتى زاڭدى ەكەنى ءوز الدىنا بولەك اڭگىمە. توقتار ۋسۋباليەۆ جاۋابىندا بۇل ماسەلە بىلتىر قىركۇيەكتە وبلىس اكىمىنىڭ ورىنباسارى ە.كەنجەحان ۇلىنىڭ توراعالىعىمەن تەحنيكالىق كەڭەستە تۇ­زىل­گەن حاتتامالىق تاپسىرماعا سايكەس جۇر­گى­زىل­گەنىن, ءبارىبىر ينفلياتسياعا بايلانىس­تى 98,0 ملن تەڭگەگە قۇرال-جابدىقتاردى ساتىپ الۋدىڭ مۇمكىن بولماعانىن العا تارتىپتى. باس قۇرىلىسشىنىڭ قالاي بولعاندا دا ماسەلەنىڭ ءبارىن ينفلياتسياعا اپارىپ تىرەپ قويعانى كوڭىلگە قونىمسىز.

جالپى وڭالتۋ ورتالىعىنىڭ جوبا­لىق-سمەتالىق قۇجاتىن جاساۋدا كوپ­تەگەن قاجەتتىلىك ەسكەرىلمەگەن. ياعني باس­قارما باسشىسى سالىناتىن نىساننىڭ ەرەكشەلىكتەرىن زەردەلەپ, تەرەڭ ءمان بەرمەگەن. ونىڭ سالدارى بۇگىندە مۇمكىندىگى شەكتەۋلى جانداردىڭ نارازىلىعىنا سەبەپ بولىپ وتىر. وبلىستىق جۇمىسپەن قامتۋدى ۇيلەستىرۋ جانە الەۋ­مەتتىك باعدارلامالار باسقارماسىنىڭ باسشىسى ا.تەمىرباەۆانىڭ ايتۋىنشا, نىسان قۇرىلىسىنا الىنعان مەملەكەتتىك ساراپتاما قورىتىندىسىمەن بەكىتىلگەن باستاپقى جوبالىق-سمەتالىق قۇجاتتاماسىندا فيزيو-ەمدوم كابينەتتەرى, وعان قاجەتتى قۇرال-جابدىقتارى قارالماعان (قاجەتتى قارجى سوماسى 80 ملن تەڭگە). سونداي-اق جسق-دا باسسەيننىڭ قۇرىلىسى قارال­عانىمەن, وعان قاجەتتى جىلىتۋ, تازارتۋ, زالالسىزداندىرۋ جۇيەلەرى, كارىز جۇيەسىنىڭ قالدىقتارىن تاسىمالدايتىن ارنايى اسسەنيزاتور اۆتوماشيناسى قاجەتتىگى ەسكەرىلمەگەن. وعان تاعى 60 ملن تەڭگە قاجەت. وڭالتۋ ورتالىعى پايدالانۋعا بەرىلگەن سوڭ توسەك ورىن جابدىقتارى, ەدەن توسەنىشتەرى, پەردە, ىدىس-اياق سىندى زاتتار دا تۇگەندەۋدى قاجەت ەتەدى. وعان جۇمسالار شىعىن سوماسى 72 ملن تەڭگە دەپ ەسەپتەلىپ وتىر. قىسقاسى, 98 ملن تەڭگەنىڭ قۇرال-جابدىقتارى بۇگىنگى نارىقتىق باعامەن 140 ملن تەڭگەنى قۇرايدى. ياعني نىساننىڭ قۇرىلىس جۇمىستارىنىڭ ساپالى اياقتالۋىنا, ءارى قاراي ىسكە قوسىلىپ قىزمەت كورسەتىلۋىن قامتاماسىز ەتۋ, سونداي-اق جوعارىدا كورسەتىلگەن وزەكتى ماسەلەلەردىڭ تۋىنداۋىنا بايلانىس­تى, وبلىستىق بيۋدجەت ەسەبىنەن 352 ملن تەڭگە قارجىنىڭ قاجەتتىلىگى تۋىنداپ وتىر. «قازانعا سالماعاندى قاسىقپەن ىزدەمە» دەگەندى ەسكە سالعان مۇمكىندىگى شەكتەۋلى جاندار بۇل قاجەتتىلىكتەردىڭ جوبالىق-سمەتالىق قۇجاتتامادا نەگە قارالماعانىنا اڭ-تاڭ. بۇل باسقارما تاپسىرىس بەرگەن جوبالىق-سمەتالىق قۇجاتتىڭ وتە ساپاسىز جاسالعانىن, ازىرلەۋ بارىسىندا مەملەكەتتىك ساراپتاماعا وتكىزەر الدىندا ەشقانداي تالداۋ جۇمىس­تارى جۇرگىزىلمەگەنىن اڭعارتادى.

توقتار ۋسۋباليەۆ وبلىستىق ءماسلي­حاتتىڭ سەسسياسىندا بۇل ورىن العان كەمشىلىك­تەر­دىڭ ءبىر ۇشىن مەملەكەتتىك ساراپتاما مەكەمەسىمەن بايلانىستىرىپ كىنالاي سوي­لەدى. الايدا باس جوبالاۋشى كومپانيا – «داۋلەت» جشس ديرەكتورى الجان بايمەتوۆ قۇجات تاپسىرىس بەرۋشى قالاي ازىرلەسە, سولاي جاسالعانىن ايتادى. ال تاپسىرىس بەرۋشى – وبلىستىق قۇرىلىس باسقارماسى. ت.ۋسۋباليەۆ سىلتە­گەن رەسپۋبليكالىق «مەمساراپتاما» مەكەمەسىنىڭ وڭتۇستىك ءوڭىرى بويىنشا فيليا­لىنا دا ساۋال­ جول­­دادىق. فيليال ديرەكتورى ب.ابدي­­كا­ليكوۆتىڭ جولداعان حاتىنان ۇققا­نىمىز, جوباداعى فيزيوتەراپيالىق كابينەتتەردىڭ بار-جوعىن مەملەكەتتىك ساراپتاما ەسكەرمەيدى. بۇل مەكەمە تەك ۇسىنىلعان جوبانىڭ قۇرىلىس نورماسىنا ساي بولۋىن عانا تەكسەرەدى. بىلايشا ايتقاندا, تاپسىرىس بەرۋشىگە «نەگە ەمدەۋ كابينەتتەرى قارالماعان, باسسەيننىڭ تازارتۋ قوندىرعىلارى قايدا؟» دەگەن ماسەلەنى قويمايدى. مۇنى ت.ۋسۋباليەۆ بىلمەي قالدى دەگەنگە سەنۋدىڭ ءوزى قيىن.

باسقارما باسشىلارى وسى ماسەلەنى كوتەرىپ جۇرگەن مۇمكىندىگى شەكتەۋلى جان­دارعا ۋادە بەرۋدەن جاڭىلار ەمەس. سىرتقى الاڭدارىن كوگالداندىرۋ جانە اباتتاندىرۋ جۇمىستارى اياقتالۋعا جاقىن ەكەنىن, سونىمەن قاتار ىشكى ارلەۋ, ينجەنەرلىك-كوممۋنيكاتسيالىق جۇيەلەرىن سىناقتان وتكىزۋ, قۇرال-جابدىقتارىن ورناتۋ جۇمىستارىن اعىمداعى جىلدىڭ 30 ساۋى­رىنە اياقتاۋ مەجەلەنگەنىن ايتىپ جۇرت­تى ءبىر «جۇباتقان». كەلەسى ءبىر كەزدەسۋدە وب­لىستىق قۇرىلىس باسقارماسى تاراپى­نان وتكىزۋ-قابىلداۋ اكتىلەرى 2024 جىلى 10 مامىردا, ءارى قاراي وبلىستىق جۇمىس­پەن قامتۋدى ۇيلەستىرۋ جانە الەۋمەت­تىك باعدارلامالار باسقارماسىنىڭ تەڭگە­رىمىنە وتكىزۋ جۇمىستارىن 2024 جىلى 15 مامىرعا اياقتاۋ جوسپارلانىپ وتىرعانىن جەتكىزگەن. بۇل ايتىلعان مەرزىمدەر ارتتا قالدى. ۋادە ورىندالعان جوق.

وسى نىساننىڭ قۇرىلىسى سوزىلعانىن وبلىستىق ءماسليحاتتىڭ سەسسياسىندا دا قوزعاپ, مۇگەدەكتەردى شىرىلداتقان ماسەلەنى وبلىس اكىمى دارحان ساتىبال­دىنىڭ وزىنە قابىرعاسىنان قويدىق. سودان كەيىن عانا قارجى ءبولۋ ىسىنە قوزعاۋ سالىنىپ, وڭالتۋ ورتالىعىنىڭ قۇرىلىسىن اياقتاۋعا دەگەن ارەكەتتەر بايقالا باستادى. وڭالتۋ ورتالىعىنىڭ ماسەلەسى 29 مامىر كۇنى وتكەن «Amanat» پارتياسى تۇر­كىستان وبلىستىق فيليالى دەپۋتاتتىق فراك­تسيا مۇشەلەرىنىڭ وتىرسىندا تاعى دا قوز­عالدى. دەپۋتاتتارعا ەسەپ بەرگەن ا.تەمىر­باەۆا وڭالتۋ ورتالى­عى­نىڭ تولىق­قاندى پايدالانۋعا بەرىلۋى كۇزگە سوزى­­لاتىنىن ايتىپ, ول ءۇشىن بيۋدجەتتەن قوسىم­­شا 352 ملن تەڭگەنىڭ قاجەتتىگىن تاعى دا ەسكە سالدى.

جاۋاپتىلار نىساننىڭ كۇزدە پايدا­­­لا­نۋعا بەرىلەتىنىنە ۋادە بەرىپ وتىر. الايدا نى­سانداعى قۇرىلىسشىلاردىڭ ازدىعىن, باياۋ قيمىلىن بايقاعان مۇمكىندىگى شەك­تەۋ­لى جاندار بۇل ۋادەنىڭ دە ورىندالۋىنا كۇماندانادى. مىنا جايتتى دا ەسكەرۋ قاجەت. قوسىمشا قاراجات ماسە­لەسى ءماس­لي­حاتتىڭ الداعى ۋاقىتتا وتەتىن سەس­سيا­­سىندا قوزعالۋىن قوزعالار. ال بىراق بو­لىنە مە, جوق پا, وعان سەنىمدى تۇردە جاۋاپ بەرۋ مۇمكىن ەمەس. قازىر ەلدەگى سۋ تاسقىنىنا بايلانىستى بيۋدجەت قارا­جا­تىن بارىنشا ۇنەمدەۋ قاجەتتىلىگى ايتىلدى. دەمەك قازىنادان قوسىمشا قار­جى ءبولۋ ءىسى قيىنداپ تۇر. سۇراتىلعان قار­جى ۋاقتىلى بولىنسە جاقسى. ال ءماسلي­حاتتا قولداۋ تاپپاي, قارجىلاندىرۋ ءىسى كەيىن­گە قالسا نە بولماق؟ ونىڭ ۇستىنە, قارجى بولۋمەن عانا ءىس تىنبايدى. وڭالتۋ ورتا­لى­عىنا كەرەك-جاراقتار مىندەتتى تۇردە مەم­لە­كەتتىك ساتىپ الۋ ارقىلى الىناتىنىن, ونىڭ ءوزى ءبىراز ۋاقىت الاتىنىن ەسكەرمەۋ­گە تاعى بولمايدى. ساتىپ الۋ كونكۋرسىنا قا­تى­سىپ, ۇتىلىپ قالعان الەۋەتتى ءونىم بەرۋ­شى­لەردىڭ ارىز-شاعىم جازاتىن ادەتى بار. ول دا ۋاقىتتى سوزدىرىپ جىبەرۋى بەك مۇمكىن. وسى جايتتاردى ەسكەرە تۇسسەك, وران­عاي­داعى وڭالتۋ ورتالىعىنىڭ اشىلۋى كۇز ەمەس, ءتىپتى كەلەسى جىلعا دەيىن سىر­عىپ­ كەتۋى ىقتيمال.

قاراپ تۇرساڭىز, كەزىندە تاپسىرىس بەرۋشى وبلىستىق قۇرىلىس باسقار­ما­سىنداعى شەنەۋنىكتەردىڭ تاراپى­نان جىبەرىلگەن شالاعاي تىرلىكتىڭ, سال­عىرت­تىقتىڭ سالدارىنان كەتكەن قاتەلىكتىڭ اسەرىنەن قانشاما مۇمكىندىگى شەكتەۋلى جاننىڭ جۇيكەسىن توزدىرىپ, شىرىلداتىپ قويدى. جالپى, تاپسىرىس بەرۋشى وسى جوبانى ويلاستىرعاندا ءجۇردىم-باردىم قاراپ, اسا قاتتى باس قاتىرماعانى كورىنىپ-اق تۇر. قاراپايىم عانا قازانشۇڭقىر, ىشكى ارلەۋ جۇمىستارى, سىرتقى سۋعارۋ, كونديتسيونەر جۇيەلەرىن ورناتۋ جۇمىس­تارىن, باسسەيندى تازارتۋ مەن جىلىتۋ جابدىقتارىنىڭ قاجەتتىلىگىن ەسكەرمەگەن. باسقا-باسقا, ءوزى مۇگەدەك جانداردى وڭالتاتىن مەكەمە بولسا, ونى جوسپار­لاعاندا قالايشا فيزيو-ەمدوم كابي­نەت­تە­رىن تاسادا قالدىرىپ قويعانىنا كۇلەسىز بە, جىلايسىز با؟ مۇگەدەكتەردى شىرىلداتىپ قويعان شەنەۋنىكتەرگە ءالى كۇنگە دەيىن ەشقانداي شارا قولدانىلماي وتىرعانى ءتىپتى تۇسىنىكسىز.

تۇركىستان وبلىسى