مەملەكەت باسشىسى بىلتىر جولداۋدا ىشكى سۋ رەسۋرستارىن ۇنەمدەپ پايدالانۋ وتە ماڭىزدى ەكەنىن اتاپ ءوتتى. بۇل ورايدا سۋدى ۇنەمدەيتىن وزىق تەحنولوگيانى ەنگىزۋ ءىسىن تەزدەتىپ, ونى قولدانۋ اۋماعىن جىل سايىن 150 مىڭ گەكتارعا دەيىن كەڭەيتۋ مىندەتتەلدى. سۋ تاپشىلىعى ايقىن سەزىلەتىن تۇركىستان وبلىسى ساۋران اۋدانىندا ۇنەمدەۋ تەحنولوگياسىن وندىرىسكە ەنگىزۋگە باسىمدىق بەرىلىپ كەلەدى.
اۋداندا ەگىستىك پەن باقشالىقتى تامشىلاتىپ سۋعارۋ جانە ەگىستىك جەرلەردى جاڭا تەحنولوگيامەن جاڭبىرلاتىپ سۋعارۋ بويىنشا اۋىل شارۋاشىلىعى داقىلدارىنىڭ ونىمدىلىگىن ارتتىرۋ جۇمىستارى جۇرگىزىلىپ جاتىر. بۇل باعىتتاعى جۇمىستى جانداندىرا ءتۇسۋ ماقساتىندا مايدانتال اۋىلدىق وكرۋگىنىڭ ۇيىمداستىرۋىمەن ديقاندارعا كوشپەلى سەمينار وتكەن بولاتىن. جيىندا تامشىلاتىپ سۋعارۋ تەحنولوگياسىنىڭ ارتىقشىلىقتارى جان-جاقتى ءتۇسىندىرىلدى. سۋ رەسۋرستارىن ءتيىمدى پايدالانۋ – اگرارلىق سالانىڭ دامۋىنا جول اشاتىن نەگىزگى باستامالاردىڭ ءبىرى. اۋداندا سۋ تاپشىلىعى بولعاندىقتان, تامشىلاتىپ سۋعارۋ تەحنولوگياسى – تاپتىرمايتىن مۇمكىندىك. جاڭا باستاما سۋدى ۇنەمدەي وتىرىپ, ەگىن كولەمىن ارتتىرادى. سەمينار نەگىزىندە اۋدان ديقاندارى تامشىلاتىپ سۋعارۋ ءادىسىنىڭ تيىمدىلىگىنە كوز جەتكىزدى. «اۋىل شارۋاشىلىعى سالاسىندا كەڭىنەن تارالا باستاعان ءتاسىلدىڭ ءتيىمدى تۇستارى كوپ. تامشىلاتىپ سۋعارۋ ءادىسىنىڭ ارقاسىندا ارىقپەن سۋعارىلعان جەرلەرگە قاراعاندا استىق مولىراق جينالادى. ارتىق شىعىندى قاجەت ەتپەيدى. سۋدى ۇنەمدەپ, جۇمىس كۇشىن قىسقارتادى», دەيدى «اقساق كەرىز» شارۋا قوجالىعىنىڭ توراعاسى نۇرجان بەكسەيىتوۆ. جاڭا ءتاسىلدى ەگجەي-تەگجەيلى مەڭگەرگەن ديقان اۋىلدىق وكرۋگتەن كەلگەن ماماندار مەن شارۋالارعا تامشىلاتىپ سۋعارۋدىڭ جولدارىن كورسەتتى.
مايدانتال اۋىلدىق وكرۋگىنە قاراستى ىنتالى ەلدى مەكەنىندە ورنالاسقان «اقساق كەرىز» شارۋا قوجالىعى 2022 جىلدان باستاپ تامشىلاتىپ سۋعارۋ تەحنولوگياسىن ىسكە اسىرا باستادى. سۋارمالى ەگىستىك جەرگە العاشقى جىلى 6 گەكتار باقشا جانە 10 گەكتار كارتوپ ەككەن. باقشادان گەكتارىنا 650 تسەنتنەر ەكى ءونىم, ال كارتوپتان 205 تسەنتنەر ءونىم العان شارۋا قوجالىق قازىرگى تاڭدا سۋ قورىنىڭ جىلدان-جىلعا ازايىپ جاتقانىنا وراي تامشىلاتىپ سۋعارۋ تەحنولوگياسىن ودان ءارى دامىتۋدى جوسپارلاپ وتىر. بيىل 24 گەكتار جەرگە قاربىز جانە 1 گەكتار جەر تەلىمىنە قىزاناق, بولگار بۇرىشىن ەككەن. وسى باعىت بويىنشا شورناق اۋىلدىق وكرۋگىندە ورنالاسقان «مۇرات» شارۋا قوجالىعى جىلىجاي كەشەنىندە تامشىلاتىپ سۋعارۋ ارقىلى 0,75 گەكتار جەرگە قيار, 1,5 گەكتار اۋماققا بولگار بۇرىشىن ەگىپ, ءوسىرىپ جاتىر. بۇگىندە جىلىجايدىڭ ءبىرىنشى اينالىمىنان 25 توننا قيار ءونىمى الىندى. الداعى ۋاقىتتا 70 توننا ءونىم الۋ كوزدەلىپ وتىر. شارۋا قوجالىق كۇنىنە 10 ادامدى ماۋسىمدىق جۇمىسپەن قامتيدى. سونداي-اق تۇتىنۋشىلارعا ەكولوگيالىق تازا ونىمدەرىن ۇسىنىپ كەلەدى. اۋىل شارۋاشىلىعىندا ءتيىمدى ءتاسىلدى كەڭىنەن قولدانۋ ماقساتىندا وعان قاجەتتى قۇرال-جابدىقتار شىعارۋ ءىسى دە قولعا الىنعان. مىسالى, شاعا اۋىلدىق وكرۋگىندەگى ونەركاسىپتىك پاركتە وتاندىق «BNK Group» بنك كومپانياسى امەريكالىق «Nelson Irrigation» كومپانياسىمەن بىرلەسىپ, وتكەن جىلى «BNK Irrigation» ساۋدا بەلگىسىمەن اينالمالى جانە فرونتالدى ارەكەت ەتەتىن جاڭبىرلاتقىش ماشينالار ءوندىرىسىن ىسكە قوستى. وندىرىستىك تەحنيكا 3 مىڭ شارشى مەتر اۋماققا ورنالاستىرىلعان. بۇل جوبا سۋ ۇنەمدەۋ تەحنولوگيالارىن كەڭىنەن قولدانۋ ءۇشىن سۋ شاشىراتقىش ماشينالاردىڭ تولىق تسيكلىن ءوندىرۋدى جولعا قويادى.
ايتا كەتەلىك, تۇركىستان وبلىسىندا 32 298 گەكتارعا ەنگىزىلگەن سۋ شىعىنىن ازايتۋ تەحنولوگياسى سۋدى 2 ەسە ۇنەمدەپ, ءونىمدى 3 ەسە ارتتىرۋعا مۇمكىندىك بەردى. وڭىردە اشىلعان سۋ ۇنەمدەۋ تەحنولوگياسىن شىعاراتىن زاۋىت جىلىنا 9 مىڭ گەكتاردى تامشىلاتىپ سۋعارۋ جۇيەسىن وندىرەتىن ەكىنشى كاسىپورىن بولماق. كاسىپورىن وبلىستىق بيۋدجەت ەسەبىنەن ورداباسى, ساۋران, قازىعۇرت, شاردارا, سايرام اۋداندارىنداعى ۇزىندىعى 100 شاقىرىمعا جەتەتىن 9 سۋ نىسانىنا كۇردەلى جوندەۋ جۇرگىزەدى. ناتيجەسىندە, 15 مىڭ گەكتاردان استام جەردى سۋمەن قامتاماسىز ەتۋ جايى جاقسارادى.
تۇركىستان وبلىسى