شىعىس قازاقستان وبلىسىنىڭ ەكى تۇرعىنى بيلىكتى باسىپ الۋدى جانە سەپاراتيستىك قىزمەتتى ناسيحاتتاعانى ءۇشىن 5 جىلعا سوتتالدى, دەپ حابارلايدى Egemen.kz وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساپ.
№2 وسكەمەن قالالىق سوتىنىڭ شەشىمىمەن شقو-نىڭ ەكى تۇرعىنى ۇلتتىق جانە الەۋمەتتىك ارازدىقتى تۋدىراتىن جاريالانىمدارى مەن ناسيحاتتارى ءۇشىن سوتتالدى.
تەرگەۋ بارىسىندا كۇدىكتىلەردىڭ 2024 جىلعى اقپاندا ينتەرنەت-رەسۋرستاردى (چات-رۋلەتكا) پايدالانا وتىرىپ, شىعىس قازاقستان وبلىسىن قازاقستان رەسپۋبليكاسىنان ءبولۋ ماقساتىندا رەفەرەندۋم وتكىزۋ قاجەتتىلىگى تۋرالى ءوز سەنىمدەرى مەن يدەيالارىن بىلدىرگەندەرى انىقتالدى.
«رەفەرەندۋمدا وڭ ناتيجەگە قول جەتكىزىلمەگەن جاعدايدا وبلىستى كۇشتەپ باسىپ الۋدى ناسيحاتتادى. ايىپتالۋشىلار ءوز كىنالارىن تولىق مويىنداپ, وكىنىش ءبىلدىردى. مەملەكەتتىك ايىپتاۋشى سوتتا ولاردىڭ ارقايسىسىن 5 جىلعا باس بوستاندىعىنان ايىرۋدى سۇرادى. زاڭدى كۇشىنە ەنگەن سوت ۇكىمىمەن جوعارىدا اتالعان تۇلعالار 5 جىلعا باس بوستاندىعىنان ايىرىلدى. مەملەكەتتىڭ قاۋىپسىزدىگى مەن تۇتاستىعىن قامتاماسىز ەتۋ ماسەلەلەرى قۇقىق قورعاۋ جانە ارنايى ورگانداردىڭ ەرەكشە باقىلاۋىندا», دەلىنگەن حابارلامادا.
قىرمىزى جۇماعاليقىزى,
ەۇۋ ستۋدەتى