بۇگىن سەناتتىڭ جالپى وتىرىسىندا دەپۋتات التىنبەك نۋح ۇلى قازاقستاندا وقۋ پاندەرى دامىعان ەلدەرمەن سالىستىرعاندا 2,5 ەسە كوپ ەكەنىن ايتىپ, ولاردىڭ سانىن ازايتۋدى ۇسىندى, دەپ جازادى Egemen.kz.
دەپۋتات كەلتىرگەن دايەككە سۇيەنسەك, جاپونيا, وڭتۇستىك كورەيا, فينليانديا مەن كانادادا مەكتەپ وقۋشىلارى 7-8 سىنىپتا ناقتى عىلىم سالالارىنا قاتىستى 4-6 ءپان وقيدى. ال ءبىزدىڭ ەلدە وسى سىنىپتاردا 15 ءپان وقىتىلسا, 9 سىنىپتا كورسەتكىش 16-عا جەتەدى.
«قازاقستاندا مىندەتتى وقۋ پاندەردىڭ سانى 2,5 ەسە كوپ, مۇنداي شامادان تىس پاندەردىڭ جالپى سانى الەمدە بىردە-ءبىر دامىعان ەلدە جوق. بىزدە حيميا, بيولوگيا مەن گەوگرافيا جەكە-جەكە ءپان رەتىندە 578 ساعات كولەمىندە وقىتىلسا, جاپونيا, وڭتۇستىك كورەيا, فينليانديا مەن كانادا سياقتى مەملەكەتتەردە وسى پاندەر توپتاستىرىلىپ, ءبىر عانا, عىلىم ءپانى دەپ, 324 ساعات بەرىلەدى, ياعني, كولەمى دە ەكى ەسەگە جۋىق از وقىتىلادى», دەدى التىنبەك نۋح ۇلى جوعارى پالاتا جيىنىندا.
قازاقستانمەن سالىستىرعاندا وقۋ ساعاتى از بولعانمەن اتالعان ەلدەردە ناتيجە جوعارى. ماسەلەن, PISA قورىتىندىسىندا ولاردىڭ جاراتىلىستانۋ باعىتىنداعى ءبىلىمى جوعارى بولعان. دەپۋتات دەرەگىنشە, بۇل جاپونيا, وڭتۇستىك كورەيا, فينليانديا ەلدەرىندە وقىتۋدىڭ ۋاقىتىنا ەمەس, ونىڭ ساپاسىنا باسا كوڭىل بولەتىنىن اڭعارتادى.
«بۇدان بولەك, قازاقستاندا مەكتەپ وقۋشىلارىنا تاقىرىپ بويىنشا شامادان تىس كولەمدى اقپارات بەرىلەدى جانە وقۋلىقتاردىڭ ءتىلى اۋىر ءارى عىلىمي سيپاتتا بەرىلەدى. ال وزىق ەلدەردىڭ تاعى بىرەۋى – ۇلىبريتانيادا, كەرىسىنشە, اقپارات كولەمدى ەمەس, تاقىرىپتار تاجىريبەگە باعىتتالىپ, كۇندەلىكتى ءومىردىڭ جاعداياتتارىمەن بايلانىستىرىلىپ وقىتىلادى. باسقاشا ايتقاندا, وقۋشىنىڭ الداعى ومىرىندە پراگماتيكالىق تۇرعىدان قانشالىقتى ماڭىزدى ەكەنىنە كوپ كوڭىل بولىنەدى, ياعني وقۋشىلاردىڭ قۇزىرەتتىلىگىن قالىپتاستىراتىن ناتيجەگە باعدارلانعان ءبىلىم بەرىلەدى», دەدى سەناتور.
سەناتور ساۋالىن ۇكىمەت باسشىسىنىڭ ورىنباسارى تامارا دۇيسەنوۆاعا جولداپ, قازاقستاندا ءبىلىم مازمۇنىن زاماناۋي دەڭگەيدە جاڭارتۋدى ۇسىندى.