ەلىمىزدىڭ بىرقاتار ايماعىندا شومىلۋ ماۋسىمى باستالدى

ءدال قازىرگىدەي قۇبىلمالى كۇن رايى مەن سۋدىڭ تولىق جىلىماۋى قاۋىپ تۋدىرادى. بىلتىرعى شومىلۋ ماۋسىمىندا 177 ادام سۋعا كەتكەن. ونىڭ 53-ءى بالا. ەندى وسىنداي قايعىلى جاعداي بولماس ءۇشىن نە ىستەۋ كەرەك؟ قانداي جۇمىس اتقارىلىپ جاتىر؟ تالدىقورعانداعى قالالىق جاعاجايدا قۋات نەمەرەباەۆ سياقتى قۇتقارۋشىلار تاڭەرتەڭنەن كەشكى 8-گە دەيىن كەزەكشىلىك اتقارادى. ولار تىنىعۋشىلاردىڭ جاعالاۋدان الىستاپ, تەرەڭ جاققا ءجۇزىپ بارماۋىن قاداعالايدى. نەگىزىنەن بالالاردى باستى نازاردا ۇستاۋعا تىرىسادى. سەبەبى سۋعا شومىلىپ جۇرگەندەردىڭ كوبى ەرەسەكتەردىڭ قاراۋىنسىز جۇرگەن جاسوسپىرىمدەر. 

«سۋ سۋىق بولعاننان كەيىن نەشە ءتۇرلى جاعداي بولادى عوي. سول ءۇشىن بالالاردى اتا-انالاردىڭ قاراۋىنسىز جىبەرمەسە ەكەن دەيمىز. سول كەزدە توتەنشە جاعداي بولمايدى», دەيدى قۇتقارۋشى قۋات نەمەرەباەۆ.

قالالىق جاعاجايعا التى قۇتقارۋشى بەكىتىلگەن. ونىڭ ەكەۋى تجد قىزمەتكەرى بولسا, قالعانى مەردىگەر مەكەمە وكىلى. سونىمەن قاتار ءبىر مەديتسينا قىزمەتكەرى كەزەكشىلىككە تۇسەدى.  

«وبلىس اۋماعىندا ءۇش سۋ ايدىنى بار. تالدىقورعان جاعاجايى, بالقاش كولىنىڭ جاعالاۋى, الاكولدىڭ جاعالاۋى. اتالعان ءۇش ورىندا ءبىزدىڭ جەدەل قۇتقارۋ ستانتسيالارى ورنالاسقان. ولار شومىلۋ كەزىندە كۇشەيتىلگەن رەجيمگە كوشەدى. ياعني سۋعا شومىلۋ ماۋسىمىنا دەيىن 10-15 ادام بولسا, شومىلۋ ماۋسىمىندا ءبىر جارىم ەكى ەسەگە دەيىن كوبەيەدى», دەدى جەتىسۋ وبلىستىق تجد اعا وفيتسەرى  ارىستانبەك تومەنوۆ.

اقمولا وبلىسىندا دا شومىلۋ ماۋسىمى باستالدى. ايماقتا 80-نەن اسا كوممۋنالدىق جانە جەكەمەنشىك جاعاجاي بار. سونىڭ 24-ءىن توتەنشە جاعدايلار دەپارتامەنتىنىڭ قىزمەتكەرلەرى سۋعا تۇسۋگە جارامسىز دەپ تانىعان. جالپى وڭىردە 80 قۇتقارۋشى جانە 40 سۇڭگۋىر تىنىعۋشىلاردىڭ قاۋىپسىزدىگىن قامتاماسىز ەتەدى.

«2023 جىلعى شومىلۋ ماۋسىمى كەزىندە 14 ادام سۋعا باتىپ, قايتىس بولدى. سونىڭ بەسەۋى بالا. قايعىلى جاعدايلار نەگىزىنەن ىشىمدىك ءىشۋ, بالالاردى قاراۋسىز قالدىرۋ, جۇزە بىلمەۋ سالدارىنان بولىپ وتىر», دەدى تجد باسقارما باستىعى  جانات اسىلبەكوۆ.

بيىلعى تاسقىنعا بايلانىستى اتىراۋدا سۋعا ءتۇسۋ ماۋسىمى ءالى اشىلعان جوق. وعان قاشان رۇقسات بەرىلەتىنى دە ازىرگە بەلگىسىز دەيدى ماماندار. سەبەبى سۋ دەڭگەيى تومەندەگەن جوق. كۇشەيتىلگەن كەستەگە ساي جۇمىس ىستەپ جاتقان قۇتقارۋشىلار قاۋىپتى جەرلەرگە بەلگى قويىپ, وزەن بويىندا رەيد جۇرگىزىپ جاتىر. 

«جايىق ءوزىنىڭ ارناسىنا تۇسكەنگە دەيىن وتە قاۋىپتى جاعدايدا بولادى. استىندا كەيبىر قايراڭ جەرلەر جار بولىپ كەتۋى مۇمكىن. قوسالقى, بوگدە زاتتار, ادامنىڭ ومىرىنە قاۋىپتى زاتتار بولۋى مۇمكىن سۋدىڭ استىندا. سوعان بايلانىستى قاۋىپتى دەپ تانيمىز», دەيدى جەدەل قۇتقارۋ جاساعىنىڭ باسشىسى ءادىلحان جۇماليەۆ.

توتەنشە جاعدايلار قىزمەتكەرلەرى قايعىلى جاعدايلاردىڭ كوبى ۇلكەندەردىڭ سالعىرتتىعىنان بولاتىنىن ايتادى. سوندىقتان قۇتقارۋشىلار سۋعا شومىلۋ كەزىندە قاۋىپسىزدىك ەرەجەلەرىن قاتاڭ ساقتاۋ قاجەتتىگىن ەسكەرتەدى.