ەرەكشە بالالارعا – ەرەكشە نازار

مەكتەپ وقۋشىلارى مەن كوللەدج ستۋدەنتتەرى اراسىندا شاحمات, توعىزقۇمالاق ويىندارىنان تۋرنير, ارمرەستلينگ سپورتىنان الەم چەمپيوندارىمەن شەبەرلىك ساعاتى جانە «ارالداعى تسيرك» مەرەكەلىك قويىلىمى كورسەتىلدى. سونداي-اق «تۇركىستان بالالار كوزىمەن» كوركەمسۋرەت گالەرەيا­­­سى, 500 وقۋشىدان قۇرالعان «Dombyra party» فلەش-موبى, «ايبىن» اسكەري-پاتريوتتىق قوزعالىسى وقۋشىلارىنان قۇرالعان توپ ونەرى كورەرمەن نازارىنا ۇسى­نىل­دى. مەرەكەلىك ءىس-شارالار ءوڭىردىڭ بارلىق اۋدانىندا ۇيىم­داس­تىرىلدى. مىسالى, جەتى­ساي اۋدانىندا ۇيدە ارناۋلى الەۋمەتتىك قىزمەت كورسەتىلەتىن بۇلدىرشىندەرگە ارنايى مەرەكەلىك ءىس-شارا ءوتتى. اۋداندا بۇگىندە 18 جاسقا دەيىنگى 1373 مۇمكىندىگى شەكتەۋلى بالا بار بولسا, ونىڭ 325-ءى – ۇيدە ارناۋلى الەۋمەتتىك قىزمەت كورسەتىلەتىندەر. اۋداندا مۇمكىندىگى شەكتەۋلى بالالارعا ساۋىقتىرۋ, وڭالتۋ شارالارىن وتكىزۋگە باعىتتالعان قاجەتتى ارناۋ­لى الەۋمەتتىك قىزمەتتەر كەشەنىن ۇسىناتىن ارنايى ورتالىقتار جۇمىس ىستەپ كەلەدى. ال مەرەكەلىك ءىس-شارا بارىسىندا بالالارعا دەمەۋ­شىلەر تاراپىنان داستارقان جايى­لىپ, سىي-سىياپات جاسالدى. اۋدان ونەرپازدارى مەن مەرەكەگە قا­تىسۋشى بۇلدىرشىندەردىڭ مەرە­كە­لىك كونتسەرتتىك باعدارلا­ما­لارى ۇسىنىلدى. سايرام اۋدا­نىندا دا جۇمىسپەن قامتۋ جانە الەۋمەتتىك باعدارلامالار ءبولى­مىنىڭ «الەۋمەتتىك قىزمەت كور­سە­تۋ ورتالىعى» كوممۋنالدىق مەملەكەتتىك مەكەمەسىنىڭ ءۇي جاع­دايىندا قىزمەت الۋشى بۇل­دىر­شىندەرى قۋانىشقا بولەندى. اۋدان اۋماعىنداعى 100-گە جۋىق ەرەكشە بالا اتا-اناسىمەن بىرگە شىمكەنت قالاسىنداعى «زووباق», «قيال الەمى» دەمالىس ورىندارى مەن «Shymkent sity mall» Play park ويىن-ساۋىق ورتالىقتارىن ارالادى. ءتۇرلى جان-جانۋارلاردى تاماشالاپ, كوڭىلدەرىن سەرگىتىپ قايتتى. بالالارعا ارنايى سىيلىقتار دا بەرىلدى. ۇيىمداستىرۋشىلار ەرەكشە بالا­لاردىڭ مۇنداي مەرەكەلىك شاراعا ءجيى قاتىسۋى ولاردىڭ الەۋمەتتىك ورتاعا بەيىمدەلۋى مەن جەكە قابىلەتتەرىنىڭ اشىلۋىنا ايرىقشا سەپتىگىن تيگىزەتىنىن ايتادى. وسى ارادا ايتا كەتەلىك, وبلىستىق جۇمىسپەن قامتۋ جانە الەۋمەتتىك باعدارلامالار باسقارماسى تاراتقان مالىمەتتەر بويىنشا وڭىردە 110 مىڭنان استام ادامى بار 27 مىڭ وتباسى ااك الادى. وسى وتباسىلاردا 70 مىڭنان اسا بالا تاربيەلەنىپ وتىر. وبلىس بو­يىنشا از قامتىلعان وتباسىلاردا 1–6 جاس ارالىعىنداعى 48,7 مىڭ بالا بار. ولارعا وتكەن جىلى 1 ملرد 695,2 ملن تەڭگە كولەمىندە قوسىمشا الەۋمەتتىك تولەم تاعايىندالدى.

وڭىردە جازعى ساۋىقتىرۋ لاگەر­­­لەرىندە 35 مىڭنان استام بالا الەۋمەتتىك جاعدايىنا بايلا­نىس­تى بيۋدجەت ەسەبىنەن, 20 مىڭعا جۋىق وقۋشى اتا-انالار ەسە­بىنەن اقى­لى دەمالادى. سونى­مەن قاتار «قازاقستان حالقىنا» قورى ەسەبىنەن وبلىستا 3421 وقۋشى جازعى ساۋىقتىرۋ لاگەرلەرىمەن تەگىن قامتىلادى. جالپى, جاز مەزگىلىندە وبلىس بويىنشا 22 ساۋىقتىرۋ لاگەرى قىزمەت كور­سەت­پەك. بالالاردىڭ جازعى دەمالىسىن ۇيىمداستىرۋدا ارنايى دايىندىقتان وتكەن 14 444 پەداگوگ قىزمەتكەر جۇمىس ىستەيتىن بولادى. جوعارى وقۋ ورىندارى مەن جاستار ورتالىقتارىنان 95 ۆولونتەر, 80 كوللەدج ستۋدەنتى دۋالدىق ءبىلىم شەڭبەرىندە تار­تىلادى. قالا سىرتىنداعى لا­گەرلەر ماۋسىم ايىنىڭ ءبىرىن­شى ونكۇندىگىندە اشىلىپ, جاز بويى 6–8 اۋىسىمدا قىزمەت كورسەتەدى. سونداي-اق تۇلكىباس پەن تولەبي اۋداندارىنداعى «سامال» جانە وتباسىلىق ۇلگىدەگى بالالار اۋلى لاگەرىندە جەتىم جانە اتا-اناسىنىڭ قامقورلىعىنسىز قالعان 152 تاربيەلەنۋشى جاز بويى دەمالادى. ءتارتىبى بويىنشا مەكتەپىشىلىك جانە پوليتسيا ەسەبىندە تۇراتىن 1100 وقۋشى تولەبي اۋدانىندا ورنالاسقان «تاۋ بارىسى» لاگەرىندە بولادى. ال 266 وقۋشى «بالداۋرەن» جانە «بوبەك» رەسپۋبليكالىق وقۋ-ساۋىقتىرۋ لاگەرلەرىندە تىنى­عادى. وقۋشىلار ءۇشىن مادەني-اعارتۋشىلىق, اسكەري-پاتريوت­تىق جانە سپورتتىق باعىت­تا 83 وب­لىستىق ءىس-شارا تىزبەسى بەكىتىل­گەن.

تۇركىستان وبلىسى