سەنات توراعاسى باستاعان پالاتانىڭ ءبىر توپ دەپۋتاتى استانا قالاسى ورتالىقتاندىرىلعان كىتاپحانالار جۇيەسىنىڭ قىزمەتىمەن تانىستى. قازىرگى تاڭدا اتالعان جۇيە 22 كىتاپحانانى بىرىكتىرەدى. سەناتورلار وقۋ زالدارىنا ارنايى بارىپ, كىتاپ قورىنا نازار اۋداردى. سونداي-اق ولار كىتاپحانا قىزمەتكەرلەرىمەن بىرگە ەلىمىزدە بۇل سالانى دامىتۋ جانە حالىقتىڭ كىتاپ وقۋعا دەگەن قىزىعۋشىلىعىن ارتتىرۋ ماسەلەلەرىن تالقىلادى, دەپ جازادى Egemen.kz.
ءوز سوزىندە ماۋلەن اشىمباەۆ قوعامدا دۇرىس قۇندىلىقتاردى دارىپتەۋ, وقۋ مادەنيەتىن قالىپتاستىرۋ جانە ءبىلىم بەرۋ سالاسىن ىلگەرىلەتۋ باعىتىندا كىتاپحانالاردىڭ اتقاراتىن ءرولى زور ەكەنىن اتاپ ءوتتى. سونداي-اق پالاتا سپيكەرى وسى سالاداعى وزەكتى ماسەلەلەرگە دە توقتالىپ, بۇگىندە ولاردى شەشۋ جولىندا بارلىق دەڭگەيدە جۇيەلى جانە كەشەندى جۇمىس جۇرگىزىلىپ جاتقانىن ايتتى.
«پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن سوڭعى جىلداردا ەلىمىزدە كىتاپحانالاردى دامىتۋ, بۇل باعىتتا جاڭا, كرەاتيۆتى جوبالاردى ىسكە اسىرۋ جۇمىستارى جۇرگىزىلىپ جاتىر. سونىڭ اياسىندا استانا مەن الماتىدا تاۋلىك بويى جۇمىس ىستەيتىن زاماناۋي كىتاپحانالار سالىنادى. ۇلتتىق كىتاپ كۇنىن بەكىتۋ ماسەلەسى دە تالقىلانىپ جاتقانى بەلگىلى. سونداي-اق بۇگىندە «اۋىل كىتاپحانالارىنا 100 كىتاپ» اتتى اكتسيا وتكىزىلىپ جاتىر. بۇل باستاماعا سەناتورلار دا ۇلەس قوسىپ جاتىر», دەگەن ماۋلەن اشىمباەۆ ەل ەرتەڭىنە بەيجاي قارامايتىن ازاماتتاردى جاڭا اكتسياعا ءۇن قوسىپ, وعان بەلسەندى قاتىسۋعا شاقىردى.
سونىمەن قاتار سەنات توراعاسى كىتاپحاناشىلاردىڭ مارتەبەسى مەن بەدەلىن ارتتىرۋ ماسەلەسىنىڭ ماڭىزدى ەكەنىن ايتتى. بۇگىندە مەكتەپ كىتاپحاناشىلارى پەداگوگ مارتەبەسى تۋرالى زاڭدا قاراستىرىلعان جەڭىلدىكتەر مەن قولداۋدىڭ يگىلىگىن كورە الماي وتىرعانىن ەسكەرسەك, بۇل وزەكتى پروبلەما ەكەنى انىق.
كەزدەسۋدە ەلورداداعى ورتالىق بالالار جانە جاسوسپىرىمدەر كىتاپحاناسىنىڭ قىزمەتى تۋرالى دا ءسوز بولدى. وندا شىعارماشىلىق كەزدەسۋلەر وتكىزەتىن زال, كوۆوركينگ ورتالىق, ولكەتانۋ سەكتورى جانە كىتاپ وقۋعا جەتەلەيتىن باسقا دا تىڭ باستامالار قاراستىرىلعان.
ايتا كەتەيىك, ورتالىق بالالار جانە جاسوسپىرىمدەر كىتاپحاناسى 1975 جىلدان بەرى جۇمىس ىستەپ كەلەدى. ول – استاناداعى ەڭ ءىرى كىتاپحانالاردىڭ ءبىرى. كىتاپ قورىندا 167 مىڭ كىتاپ بار. ال وقىرماندار سانى 8000 ادامعا جەتەدى. بىلتىر جۇرگىزىلگەن جوندەۋ جۇمىستارىنىڭ ناتيجەسىندە كىتاپحانانىڭ ماتەريالدىق-تەحنيكالىق بازاسى مەن جيھازدارى جاڭعىرتىلدى. سونداي-اق نىساننىڭ قاسبەتى جاڭارىپ, جوعارى جىلدامدىقتى ينتەرنەتپەن قامتىلدى.