بيىل ساۋىردە بىرىككەن اراب امىرلىكتەرى مەن قازاقستان اراسىنداعى «Capacity Building» باعىتى بويىنشا ەكىجاقتى ىنتىماقتاستىقتىڭ نەگىزىندە «Kazakhstan Executive Leadership Program 2024» وقىتۋ باعدارلاماسى باستالدى.
ەلوردادا باستالعان وففلاين وقىتۋ سەمينارىندا ەلىمىزدەگى ارىپتەستەرىنە ءباا ۇكىمەت مۇشەلەرى مەن مەملەكەتتىك ۇيىمدارمەن تىعىز جۇمىس ىستەيتىن بەدەلدى تۇلعالارى ءدارىس وتكىزدى. ەكى كۇنگە سوزىلاتىن وقىتۋ اياسىندا ەل ەكونوميكاسىنداعى وزەكتى ماسەلەلەردى شەشۋدىڭ ءتيىمدى جولدارى تۇسىندىرىلمەك.
ەكىجاقتى ىنتىماقتاستىق اياسىندا الەۋەتتى ارتتىرۋ تاجىريبەسىنە كوڭىل ءبولىنىپ وتىر. باعدارلاما اياسىندا پرەزيدەنت جانىنداعى مەملەكەتتىك باسقارۋ اكادەمياسى مەن مۇحاممەد بەن راشيد مەملەكەتتىك باسقارۋ مەكتەبى مەملەكەتتىك ورگانداردىڭ باسشىلارىن بىرلەسىپ وقىتىپ جاتىر. ياعني قازاقستان ءباا-گە تسيفرلاندىرۋعا جاۋاپتى ۆيتسە-مينيسترلەردى وقىتۋعا جىبەرسە, ولار جاساندى ينتەللەكتىنى قولدانا وتىرىپ, ءتۇرلى سالالارداعى مەملەكەتتىك باسقارۋدىڭ جاڭا تاسىلدەرى مەن ادىستەرىن بولىسۋگە نيەتتى.
ءباا مينيسترلەر كابينەتى ءمينيسترىنىڭ باسەكەگە قابىلەتتىلىك جانە تاجىريبە الماسۋ ماسەلەلەرى جونىندەگى ورىنباسارى ابدۋللا ناسسەر لۋتا باستاعان دەلەگاتسيا دا ەكى ەل اراسىنداعى مادەني, ەكونوميكالىق بايلانىستىڭ نىعايۋىنا مۇددەلى. «تەك ول عانا ەمەس, بۇگىن مەملەكەتتىك قىزمەتكەرلەر تاجىريبە الماسىپ جاتىر. بۇل دەگەنىمىز ءبىز ءۇشىن دە ۇلكەن مارتەبە. الداعى ۋاقىتتا اۋقىمدى جوبالاردى بىرلەسىپ جۇزەگە اسىرۋعا دايىنبىز», دەيدى مارتەبەلى مەيمان.
پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىلدىڭ سوزىنشە, مەملەكەتتىك ساياساتتى جۇرگىزۋدە اراب حالقىنىڭ ءتيىمدى تاجىريبەلەرى كوپ. بۇگىننىڭ وزىندە بۇل ەلدىڭ ۆەدومستۆوارالىق كوممۋنيكاتسيالاردى وڭتايلى قولدانۋ جانە جۇزەگە اسىرۋ باعىتىنداعى جۇمىسىن ۇلگى ەتىپ وتىرعان مەملەكەتتەر بار. سوندىقتان ۆيتسە-مينيسترلەر مەن ورىنباسارلارى, كۆازيسەكتور مەن دەپارتامەنت باسشىلارى, اكادەميا وكىلدەرىنەن 33 ادام ءار ءتۇرلى توپقا ءبولىنىپ, ءوز سالالارى بويىنشا اراب ارىپتەستەرىنىڭ ءدارىسىن تىڭدادى. ال كەلەسى جولى قازاقستان دەلەگاتسياسى ءباا-گە بارۋ كوزدەلىپ وتىر. سەبەبى دامۋ قارقىنى جوعارى, تاجىريبەسى وزىق ەلدەن ۇيرەنەر دۇنيە ءالى دە كوپ.