رەسەيدەن كەلگەن تاسقىن سۋىنىڭ 80 ملن تەكشە مەترى باتىس قازاقستان وبلىسىنىڭ قامىس-سامار كولدەرىنە جىبەرىلدى. اتالعان كولدەرگە سوڭعى 20 جىلدان بەرى سۋ بارماعان ەكەن, دەپ حابارلايدى Egemen.kz.
سۋ رەسۋرستارى جانە يرريگاتسيا مينيسترلىگى ءباسپاسوز قىزمەتىنىڭ حابارلاۋىنشا تاسقىن سۋىن كولدەر جۇيەسىنە جىبەرۋ جۇمىسىن جەرگىلىكتى «قازسۋشار» فيليالىنىڭ ماماندارى جۇرگىزىپ جاتىر. قامىس-سامار كولدەرى كيىكتەر مەن باسقا دا جانۋارلاردىڭ كوشۋ جولىنداعى تابيعي سۋات كوزى بولىپ تابىلادى.
اتالعان وبلىستا سۋدىڭ نەگىزگى كوزى – جايىق وزەنى. بۇل وزەن ارقىلى كەلگەن تاسقىن سۋى ۆەدومستۆونىڭ «قازسۋشار» مەكەمەسىنە تيەسىلى جايىق-كوشىم سۋارۋ-سۋلاندىرۋ جۇيەسىندە جينالادى.
«سونىمەن قاتار «قازسۋشار» ماماندارى سوڭعى جىلدارى كەۋىپ قالعان ەدىلسور, جالتىركول, بىرقازان, سوركول, سالتانات جانە باسقا دا سۋ ايدىندارىنا سۋ جىبەرە باستادى. سونداي-اق بالقاش كولىنە, كاسپي تەڭىزىنە سۋ جىبەرۋ جۇمىسى جالعاسىپ جاتىر», دەدى مينيسترلىكتىڭ رەسمي وكىلى ءمولدىر ابدۋاليەۆا.