تەگەران حالىقارالىق كورمەلەر كەشەنىندە يران يسلام رەسپۋبليكاسىنىڭ VI ەكسپورتتىق مۇمكىندىكتەرى كورمەسى ءوتتى. وعان بەس قۇرلىقتىڭ 96 ەلىنەن 700 ساۋدا جانە يننوۆاتسيالىق كومپانيانىڭ وكىلدەرى, 2200-دەن اسا كاسىپكەر مەن ەكونوميكا سالاسىنىڭ ساراپشى-مامانى قاتىستى.
سونداي-اق ءىس-شاراعا 40 ەلدىڭ جوعارى لاۋازىمدى ساياسي جانە ەكونوميكالىق قايراتكەرلەرى قاتىسىپ, ءتۇرلى كوممەرتسيالىق كومپانيالار اراسىندا جۇزدەگەن كەلىسىمگە قول قويىلدى. بۇل رەتتە قازاقستاننان جەكە سەكتوردىڭ دا كورمەگە بەلسەندى قاتىسۋى ەكىجاقتى ەكونوميكالىق ىنتىماقتاستىقتى نىعايتۋ ءۇشىن وتە ماڭىزدى بولدى. كورمە اياسىنداعى ءىس-شارالاردىڭ ءبىرى – يران-قازاقستان بىرلەسكەن ساۋدا جانە ونەركاسىپتىك پالاتاسى ۇيىمداستىرعان 300 كومپانيا وكىلدەرىنىڭ قاتىسۋىمەن وتكەن ىسكەرلىك كەزدەسۋ.
كەزدەسۋ بارىسىندا قول جەتكىزىلگەن كەلىسىمدەر ەكى ەل اراسىنداعى ىنتىماقتاستىقتىڭ بىرلەسكەن جول كارتاسىن جۇزەگە اسىرۋ ءۇشىن اسا قاجەت. ونىڭ نەگىزىندە تاۋار اينالىمىن 3 ميلليارد دوللارعا دەيىن جەتكىزۋ جوسپارلانىپ وتىر. يران مەن قازاقستان جوعارى لاۋازىمدى تۇلعالارىنىڭ ىسكەرلىك ىنتىماقتاستىقتى كەڭەيتۋ جانە ەكى ەلدىڭ ۇكىمەتارالىق كوميسسياسى وتىرىستارىنىڭ 19-كەزەڭىنىڭ وتكىزىلۋى ەكى ەل اراسىنداعى بەرىك جىگەر مەن ەكونوميكالىق ىنتىماقتاستىقتىڭ جارقىن كەلەشەگىن كورسەتەدى. ال جەكە سەكتور بۇل رەتتە قوزعاۋشى كۇشتىڭ قىزمەتىن اتقارىپ وتىر.
يران مەن قازاقستان اراسىنداعى ىسكەرلىك ىنتىماقتاستىقتى كەڭەيتۋ شارتتارىنىڭ ءبىرى – ەكى ەلدىڭ مەملەكەتتىك جانە جەكە سەكتورلارىنىڭ ءوزارا مۇمكىندىكتەرى تۋرالى تانىمىن ارتتىرۋ. ەكى ەلدەگى مۇنداي ءىس-شارالارعا, اسىرەسە, مامانداندىرىلعان كورمەلەرگە بەلسەندى قاتىسۋ قوس تاراپتىڭ ەكونوميكالىق بەلسەندىلەرىنە ءوز ونىمدەرىن وتكىزۋ كەزىندە باعا, ساپا جانە قولايلى قولجەتىمدىلىك سياقتى باسقا دا ساۋدا ارتىقشىلىقتارىن پايدالانۋدىڭ جاقسى مۇمكىندىگى ەكەنى داۋسىز.