8-مامىردا كۇرشىم اۋدانىنىڭ مارالدى اۋىلىندا «بايتاق» پارتياسىنىڭ وكىلى مەن ءبىر توپ ادام التىن ءوندىرۋ فابريكاسىنىڭ قۇرىلىسىنا قارسىلىق ءبىلدىرىپ, رۇقساتسىز جينالىس وتكىزگەن, دەپ جازادى Egemen.kz.
جينالىس اياقتالعاننان كەيىن 100-گە جۋىق مارالدى تۇرعىنى فابريكا قۇرىلىسىن توقتاتۋ تۋرالى بەينەۇندەۋ ءتۇسىرۋ ءۇشىن فابريكا اۋماعىنا كىرگەن. كاسىپورىن باسشىلىعىنىڭ مالىمەتى بويىنشا, ولاردىڭ قىزمەتكەرلەرى دەنە جاراقاتىن الىپ, سونداي-اق ماتەريالدىق شىعىنعا ۇشىراعان. جەكە قاۋىپسىزدىكتى قامتاماسىز ەتۋ ءۇشىن كاسىپورىن قىزمەتكەرلەرى مەن كۇزەتشىلەر ول اۋماقتان كەتۋگە ءماجبۇر بولعان.
پوليتسيا جانە سوبر قىزمەتكەرلەرى جينالعانداردى قۇقىقتىق ءتارتىپتى ساقتاۋعا شاقىرىپ, زاڭنامانى ءتۇسىندىردى. بۇل رەتتە ولارعا كۇش قولدانىلمادى.
اتالعان فاكتى بويىنشا شقو پوليتسيا دەپارتامەنتى سوتقا دەيىنگى تەرگەۋ جۇرگىزىپ جاتىر.
ەستەرىڭىزگە سالا كەتەيىك, 2013 جىلدان بەرى مارالدى اۋىلىندا گەولوگيالىق بارلاۋ جۇمىستارى جۇرگىزىلۋدە. قورلار انىقتالعاننان كەيىن 2022 جىلى التىن ءوندىرۋ فابريكاسىن سالۋ جوباسى باستالدى.
جوبانى بەيىندى مينيسترلىكتەر ماقۇلداپ, قورشاعان ورتا ءۇشىن ءوندىرىس قاۋىپسىزدىگى تۋرالى قورىتىندىلار بەرىلگەن. قوعامدىق تىڭداۋلار مەن دوڭگەلەك ۇستەلدەر وتكىزىلىپ, وندا ءتۇرلى ساراپشىلار جوبانىڭ ەكولوگيالىق قاۋىپسىزدىگى تۋرالى تولىق قورىتىندى بەرگەن.