ۇستالعان تۇرعىنداردان «مەفەدرون» ەسىرتكى زاتى تاركىلەندى, دەپ حابارلايدى Egemen.kz Polisia.kz سايتىنا سىلتەمە جاساپ.
جامبىل وبلىسىنىڭ پوليتسيا دەپارتامەنتى سينتەتيكالىق ەسىرتكى ساتۋشىلاردىڭ قىزمەتىن توقتاتتى. ۇستالعاندار ۋاقىتشا ۇستاۋ يزولياتورىنا قاماۋعا الىندى.
«ۇزاق ۋاقىت بويى جۇرگىزىلگەن جەدەل-تەرگەۋ ءىس-شارالار كەشەنىنىڭ ناتيجەسىندە ەسىرتكى قۇرالدارىنىڭ زاڭسىز اينالىمىنا قاتىسى بار 2 كۇدىكتى – تاراز قالاسىنىڭ 34 جانە 32 جاستاعى تۇرعىندارى انىقتالىپ, ۇستالدى. ولار سينتەتيكالىق ەسىرتكىنى وبلىس ورتالىعى اۋماعىندا تاراتقان. ىزدەستىرۋ ءىس-شارالارىن جۇرگىزۋ بارىسىندا كۇدىكتىلەردىڭ ءبىرىنىڭ ۇيىندەگى جاتىن بولمەسىنەن جالپى سالماعى 122,37 گر مەفەدرون سينتەتيكالىق زاتى جاسىرىلعان ورىن تابىلدى. ناتيجەسىندە 330-دان استام دوزا ەسىرتكىنىڭ تارالۋىنا جول بەرىلمەدى, ونىڭ قارا نارىقتاعى قۇنى - 5,5 ميلليون تەڭگە», دەدى ەسىرتكى قىلمىسىنا قارسى ءىس-قيمىل باسقارماسىنىڭ باستىعى ءالىم باجىقباەۆ.