وڭالتۋ ورتالىعىنداعى ساۋاپتى ءىس

دەنەشىنىقتىرۋ كابينەتى, ءان جانە ويىن تەراپيالىق بولمەلەرى زاما­ناۋي ۇلگى­دە جاساقتالىپ, ارنايى مەكتەپ كابي­نەت­تەرى ۇلتتىق ناقىش­تا بەزەندىرىلگەن. ءبىر بولمە اسپان عالام­شارلارىمەن كوركەمدەلىپ, تەلەس­كوپ اپپاراتى قويىل­عان, ياعني بالا­لاردىڭ قيالىنا ەرىك بەرەتىن مۇمكىن­دىك جاسالعان. وبلىستىق بالالاردى وڭالتۋ ورتالىعى 3 جاستان باس­تاپ كامەلەتكە تولماعان مۇمكىندى­گى شەك­تەۋلى بالالارعا مەديتسينالىق كومە­گىن ۇسىنادى. مۇنداعى 175 توسەك-ورىننىڭ 85-ءى نەۆرولوگيالىق, 90-ى ورتوپەديالىق سىرقاتتارعا ارنالعان. بىلتىر مۇندا 2 800 بالا وڭالتۋ ەم-شارالارىن قابىلداعان. ورتالىقتا 177 ادام تۇراقتى جۇمىس ىستەيدى.

ء«بىز ساداقانى ساۋاپتى ىسكە جۇمساپ, ورتالىق قىزمەتىن جاقسارتا ءتۇسۋ ماقسا­تىنداعى باستامانى ءبىرازدان بەرى ويلاپ جۇرگەنبىز. ەم الۋعا كەلگەن بالالاردى بارىنشا قىزىقتىرىپ, ءومىر سۇرۋگە قۇلشىنىسىن ارتتىرۋدى قالادىق. ءتۇرلى كابينەتتەر اشىپ, بالانىڭ زەيىنىن كوتەرۋگە مۇمكىندىك سىيلادىق دەپ ويلايمىن. ءبىزدىڭ ورتا­لىققا كەلگەن بالالار 18 كۇن ىشىندە ءبىلىم الىپ, جان-جاقتى داميدى دەگەن سەنىمدەمىن. وسى باستامامدى قولداپ, قولۇشىن سوزعان كاسىپكەرلەرگە, ۇجىم­داعى بارلىق قىزمەتكەرگە شەكسىز ريزاشىلىعىمدى بىلدىرەمىن. سىرتتان ادام شاقىرماي, بارلىق ءىستى جۇمىلا اتقاردىق. ويىم­داعىدان دا كەرەمەت دۇ­نيەلەر شىقتى», دەيدى وڭالتۋ ورتا­لىعىنىڭ باسشىسى نۇرحان نارىمبەتوۆا.

ورتالىقتا بالالاردىڭ مەديتسينا­لىق ەم-شارالارمەن قوسا ۇزدىكسىز ءبىلىم الۋىن قامتاماسىز ەتۋ ماقساتىندا باس­تاۋىش, نەگىزگى جانە جالپى ورتا ءبىلىم بەرۋ كولەمىندە ماتەماتيكا, قازاق ءتىلى مەن ادەبيەتى, ورىس ءتىلى, قازاقستان جانە دۇنيە ءجۇزى تاريحى, جاراتىلىستانۋ, گەوگرافيا پاندەرى بازالىق تارتىپتە وقىتىلادى. ماتەماتيكا ءپانى Qalan.kz ينتەراكتيۆتى ونلاين پور­تالى ارقىلى وتكىزىلەدى. ەرەكشە بالا­لاردىڭ ماتەماتيكالىق ساۋاتىن ارت­تىرۋ ماڭىزدى ەكەنىن ەسكەرىپ, اتال­عان پورتالدى ءبىر جىل تەگىن پايدالانۋ مۇمكىندىگىن سىيلاعان Qalan.kz-ءتىڭ نەگى­زىن قالاۋشى اسقار بولاتقا ورتالىق قىزمەتكەرلەرى ءدان ريزا. ىسكەر باسشى نۇرحان مادالىقىزىنىڭ وسىنداي بالالار ءۇشىن جاساعان يگىلىكتى دە ساۋاپتى ءىسى ارىپتەستەرىنە ۇلگى بولىپ وتىر.

«ۇجىمداعى مەيىرگەرلەر, كىشى قىز­مەتكەرلەر بىرىگىپ, ءبىرى قابىرعاعا سۋرەت سالىپ, ءبىرى ويۋ ويىپ, تۇسقاعاز جا­بىس­تىرىپ, ءبىرى ارنايى اپپارات ساتىپ الىپ بەرىپ, ءبىرى قولدانىستان تىس قالعان ارباسىن اكەلىپ ۇلكەن ۇيىم­شىلدىق تانىتقان. ارنايى بولمە ىڭعاي­­لاستىرىپ, تەلەفونعا تەلمىر­گەن با­لالارعا پايدالى دۇنيەنى ۇيرە­تۋدىڭ ءوزى – ۇلكەن قۋانىش. اۋىز تولتىرىپ ايتۋعا بولارلىق بۇل باستاما جالعاسىن تابادى دەپ ويلايمىن», دەيدى دەنساۋلىق ساقتاۋ باسقارماسىنىڭ وبلىس بويىنشا شتاتتان تىس بالالار رەابيليتولوگى ماريام پارمانوۆا.

ايتا كەتەلىك, تۇركىستان وبلىسىندا مۇگەدەكتىگى بار 11 مىڭعا جۋىق بالا ەسەپتە تۇرادى. سونىڭ 30 پايىزى – جۇيكە جۇيەسى اۋرۋلارىنا شالدىق­قان ەرەكشە بالالار. ولارعا وڭىردە 4 وڭالتۋ, 3 قامقورلىق ورتالىعى قىزمەت كورسەتەدى.

تۇركىستان وبلىسى