رف قورعانىس ءمينيسترىنىڭ ورىنباسارى تيمۋر يۆانوۆ پارا الدى دەگەن كۇدىكپەن ۇستالدى, دەپ حابارلايدى Egemen.kz رف تەرگەۋ كوميتەتىنە سىلتەمە جاساپ.
«رف قىلمىستىق كودەكسىنىڭ 290-بابىنىڭ 6-بولىگىندە كوزدەلگەن قىلمىستى جاسادى دەگەن كۇدىكپەن (پارا الۋ) رف قورعانىس ءمينيسترىنىڭ ورىنباسارى تيمۋر ۆلاديميروۆيچ يۆانوۆ ۇستالدى», دەلىنگەن TFR تەلەگرام كانالى جاريالاعان حابارلامادا.
تەرگەۋ كوميتەتىنىڭ رەسمي وكىلى سۆەتلانا پەترەنكو بۇل ءىس بويىنشا ءتيىستى تەرگەۋ امالدارى جۇرگىزىلىپ جاتقانىن ايتتى.
«رەسەي پرەزيدەنتى ۆلاديمير پۋتينگە قورعانىس ءمينيسترىنىڭ ورىنباسارى تيمۋر يۆانوۆتىڭ ۇستالعانى تۋرالى الدىن الا حابارلانعان», دەدى ءپۋتيننىڭ ءباسپاسوز حاتشىسى دميتري پەسكوۆ.
رەسمي اقپاراتقا سايكەس, يۆانوۆ رەسەي فەدەراتسياسىنىڭ قارۋلى كۇشتەرىن باسقارۋ, اسكەرلەردى ورنالاستىرۋ, تۇرعىن ءۇي جانە مەديتسينالىق قامتاماسىز ەتۋدى ۇيىمداستىرۋعا جاۋاپتى بولعان.
قىرمىزى جۇماعاليقىزى,
ەۇۋ ستۋدەنتى