كەشە استاناداعى دوستىق ۇيىندە مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى ۇلىقبەك ەسداۋلەت پەن قىرعىز رەسپۋبليكاسىنىڭ حالىق اقىنى, توقتاعۇل اتىنداعى مەملەكەتتىك سىيلىقتىڭ لاۋرەاتى, قازاقستاننىڭ مادەنيەت قايراتكەرى اكبار رىسقۇلدىڭ «ەگىز ەلدىڭ ەكى اقىنى» اتتى بىرلەسكەن شىعارماشىلىق كەشى ءوتتى.
ۇلىقبەك ەسداۋلەتتىڭ كەزىندە ايتقان «بۇكىل الەمنىڭ اقىن-جازۋشىلارى – ءبىر ۇلتتىڭ ادامدارى سەكىلدى» دەگەن قاناتتى ءسوزى بار. الەمنىڭ تالاي ەلىندە بولىپ, اقىن-جازۋشىلارىمەن كەزىككەن, ولارمەن دوستىق قارىم-قاتىناس ۇستاپ كەلە جاتقان, تالاي حالىقارالىق ادەبي باسقوسۋلارعا قاتىسقان, ءوزى تۇركى ەلدەرىنىڭ حالىقارالىق جازۋشىلار ۇيىمىنىڭ توراعاسى بولىپ قىزمەت ەتەتىن اعامىزدىڭ بۇل ءسوزىنىڭ شىندىعى استانا تورىندە وتكەن وسى بىرلەسكەن شىعارماشىلىق كەشتە تاعى ءبىر قىرىنان جارقىراپ كورىنگەندەي بولدى. شىعارماشىلىق كەشكە تۇرىكمەنستاننىڭ قازاقستانداعى توتەنشە جانە وكىلەتتى ەلشىسى باتىر رەدجەپوۆ, رەسەي فەدەراتسياسى ساحا رەسپۋبليكاسى جازۋشىلار ۇيىمىنىڭ توراعاسى گاۆريل اندروسوۆ باستاعان دەلەگاتسيا جانە ءوز ەلىمىزدىڭ زيالى قاۋىم وكىلدەرى قاتىسىپ, حالىقتار دوستىعىن تاعى ءبىر ايگىلەپ قانا قويماي, ورىندى ويدىڭ ءورىسىن ۇشقىنداتا وتىرىپ, وسى باسقوسۋعا ينتەللەكتۋالدىق سيپات بەردى.
دوڭگەلەك ۇستەل باسىنداعى ۇلكەن باسقوسۋدى جۇرگىزگەن قازاقستان جازۋشىلارى استانا بولىمشەسىنىڭ باسشىسى, بەلگىلى اقىن داۋلەتكەرەي كاپ ۇلى قىرعىزستان پرەزيدەنتى سادىر جاپاروۆتىڭ قازاقستانعا كەلگەن ساپارى اياسىندا قازاق-قىرعىز حالىقتارى اراسىنداعى رۋحاني-مادەني بايلانىستاردىڭ ودان ءارى بەكي تۇسكەندىگىن, كەشە عانا ەلوردامىزدا ەسىمى عاسىردان-عاسىرعا جالعاسقان قىرعىزدىڭ ايگىلى ەپوستىق باتىرى ايكول ماناس ەسكەرتكىشىنىڭ بوي كوتەرگەنىن ايتا كەلە, ەكى ەل جازۋشىلارى اراسىنداعى اۋەزوۆ پەن ايتماتوۆ ايگىلەپ كەتكەن جارقىن دوستىقتىڭ بۇگىنگى تاڭدا جاڭا قىرىنان جالعاسقاندىعىن, سونىڭ ەرەكشە ءبىر بەلگىسى «ەگىز ەلدىڭ ەكى اقىنى» اتالىپ وتىرعان ۇلىقبەك ەسداۋلەت پەن اكبار رىسقۇلدىڭ بۇگىنگى بىرلەسكەن شىعارماشىلىق كەشى ەكەنىن اتاپ كورسەتتى.
باسقوسۋدا بىرنەشە ەلدەن كەلگەن قايراتكەرلەر مەن قالام يەلەرى سويلەپ, وزدەرىنىڭ حالىقتار دوستىعى, تۇرىك حالىقتارىنىڭ باۋىرلاستىعى تۋرالى كەلەلى وي-پىكىرلەرىن ورتاعا سالدى.
تۇرىكمەنستان ەلشىسى باتىر رەدجەپوۆ ۇلىقبەك ەسداۋلەت پەن اكبار رىسقۇل شىعارماشىلىعىنا ەرەكشە ىقىلاس تانىتاتىنىن ايتا كەلە تۇرىكمەننىڭ ۇلى اقىنى ماقتىمق ۇلىنىڭ شىعارماشىلىعى قازاق ەلىندە قانداي قۇرمەتكە يە بولسا, قازاقتىڭ ۇلى اقىنى, ويشىلى اباي ەسىمى دە تۇرىكمەندەر اراسىندا سونشاما قۇرمەتتەلەتىنىن جەتكىزدى.
پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ باۋىرلاس ەكى ەلدىڭ ايگىلى اقىندارى اراسىنداعى مۇنداي ۇندەستىكتىڭ حالىقتار دوستىعىنا ولشەۋسىز ۇلەس قوساتىندىعىن ايتا كەلە, بۇل باسقوسۋدى ەرەكشە شىعارماشىلىق كەش دەپ باعالادى.
سونداي-اق باسقوسۋدا ءسوز العان ساحا رەسپۋبليكاسى جازۋشىلار ۇيىمى توراعاسىنىڭ ورىنباسارى, حالىق جازۋشىسى, ياكۋتيا مەملەكەتتىك سىيلىعىنىڭ لاۋرەاتى ناتاليا حارلامپەۆا, رەسەيگە بەلگىلى جازۋشى-رومانشى نيكولاي لۋگينوۆ, «ياكۋتيا» كىتاپ باسپاسىنىڭ ديرەكتورى, اقىن, اۋدارماشى زينايدا ارحيپوۆا ءوز سوزدەرىندە قازاق-ساحا اقىن-جازۋشىلارى اراسىنداعى شىعارماشىلىق بايلانىستىڭ سوڭعى كەزدەرى جاقسى دامي باستاعاندىعىن, سونىڭ بەلگىسىندەي ۇلىقبەك ەسداۋلەتتىڭ ساحا تىلىندە «بالبال تاستار ءتىلى» كىتابىنىڭ, بەلگىلى جازۋى الىبەك اسقاروۆ شىعارماسىنىڭ جارىق كورىپ, استانادا ءوتىپ جاتقان حالىقارالىق كىتاپ كورمە-جارمەڭكەسى اياسىندا ولاردىڭ تانىستىرىلىمى تابىستى وتكەندىگىن ايتتى. سول سەكىلدى نيكولاي لۋگينوۆتىڭ ساحا تىلىندەگى ءبىر مىڭ بەتتىك «شىڭعىس حان» رومانى وسىدان ءبىراز بۇرىن قازاق تىلىنە اۋدارىلىپ جارىق كورگەن بولاتىن.
بەلگىلى ماناسشى, اقىن بايانعالي ءالىمجانوۆ ۇلىقبەك ەسداۋلەت پەن اكبار رىسقۇلمەن العاش تانىسقان كەزدەرى تۋرالى ادەمى ەستەلىكتەرىن ايتا كەلە قىرعىز تىلىندەگى «ماناس» ەپوسىنان ۇزىندىلەردى جاتقا سوقسا, قازاقتىڭ ءانشى قىزى باعدات سامەدينوۆا اكبار رىسقۇلدىڭ سوزىنە جازىلعان قىرعىز ءانىن سىزىلتا شىرقادى.
بەلگىلى قالامگەر ايگۇل كەمەلباەۆا ەكى اقىننىڭ شىعارماشىلىعى تۋرالى ويلارىن ورتاعا سالدى.
دوڭگەلەك ۇستەل باسىندا ءسوز سويلەگەن ەگىز ەلدىڭ ەكى اقىنى ۇلىقبەك پەن اكبار وزدەرىنىڭ وسىدان شيرەك عاسىر بۇرىن العاش قالاي تانىسقاندىقتارىن ەسكە الىپ, سودان بەرى ءىزى سۋىماي كەلە جاتقان دوستىقتارى تۋرالى قازىرگى قازاق, قىرعىز, جالپى تۇرىك ادەبيەتى اراسىنداعى تۋىسقاندىق بايلانىستار تۋرالى اڭگىمە قوزعادى. قىرعىزستاننىڭ قازاقستانداعى توتەنشە جانە وكىلەتتى ەلشىسى قىزمەتىن اتقارىپ, استانادا ءبىراز جىل تۇرعان اكبار رىسقۇل بۇل قالانىڭ وزىنە وتە ىستىق ەكەندىگىن جەتكىزدى. ەكى اقىن دا جىلى-جىلى ەستەلىك ايتىپ, ولەڭدەرىن وقىدى.
ەكى اقىن مەن شەتەلدەن كەلگەن قوناقتارعا دوستىق ءۇيىنىڭ تاراپىنان قۇرمەت كورسەتىلىپ, سىي-سياپات جاسالدى.
بىرلەسكەن شىعارماشىلىق كەش ۇلىقبەك ەسداۋلەتتىڭ سوزىنە جازىلعان ء«اي, پەريزات!» ءانىنىڭ ورىندالۋىمەن اياقتالدى.
سۇڭعات ءالىپباي