مەملەكەت باسشىسى قاسىم-جومارت توقاەۆ پەن قىرعىزستان پرەزيدەنتى سادىر جاپاروۆ ايكول ماناس ەسكەرتكىشىن سالتاناتتى تۇردە اشۋ راسىمىنە قاتىستى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
مەملەكەت باسشىسى ءىس-شارا بارىسىندا سويلەگەن سوزىندە ەلوردادا مۇنداي ەڭسەلى ەسكەرتكىشتىڭ بوي كوتەرۋى, ەڭ الدىمەن, قازاق حالقىنىڭ قىرعىز اعايىنعا دەگەن رياسىز قۇرمەتىنىڭ بەلگىسى ەكەنىن اتاپ ءوتتى.
«ەكى جىل بۇرىن بىشكەكتە ۇلى ابايدىڭ ەسكەرتكىشى اشىلعانىن بىلەسىزدەر. مەن سول ءىس-شاراعا ارنايى بارىپ قاتىستىم. مۇنداي يگى باستامالار ەكى ەلدىڭ دوستىق بايلانىسىن نىعايتا تۇسەتىنى ءسوزسىز», دەدى قازاقستان پرەزيدەنتى.
قاسىم-جومارت توقاەۆ مىڭجىلدىق تاريحى بار ماناس جىرىن بارشا ادامزات رۋحانياتىندا وزىندىك ورنى بار بىرەگەي مۇرا رەتىندە اتاپ ءوتىپ, ونى تەك قىرعىز حالقىنىڭ عانا ەمەس, تۇتاس تۇركى جۇرتىنىڭ باعا جەتپەس قازىناسى دەۋگە بولاتىنىن ايتتى.
«ايگىلى جىردىڭ زامان سىناعىنان امان ءوتىپ, بۇگىنگى كۇنگە جەتۋىنە قازاق عالىمدارى زور ۇلەس قوسقان. وسى ورايدا شوقان ءۋاليحانوۆ, مۇحتار اۋەزوۆ, الكەي مارعۇلان سياقتى ءبىرتۋار تۇلعالاردى اتاپ وتۋگە بولادى», دەدى قاسىم-جومارت توقاەۆ.
قازاقستان پرەزيدەنتى ەكى ەلدىڭ مادەني مۇرالارىنىڭ تامىرى ءبىر ەكەنىنە نازار اۋدارىپ, قازاق پەن قىرعىزدىڭ ايگىلى تۇلعالارى قاي كەزدە دە ءوزارا تىلەكتەس, نيەتتەس بولعانىنا توقتالدى. مەملەكەت باسشىسى ەلىمىزدەگى سۋ تاسقىنىنا قارسى كۇرەستە كومەك قولىن سوزعان بارشا قىرعىز جۇرتىنا قازاق ەلىنىڭ اتىنان زور ريزاشىلىعىن ءبىلدىردى.
«باس قالامىزدا بوي كوتەرگەن وسى ساۋلەت تۋىندىسى ءتۇبى ءبىر تۇركى جۇرتىنىڭ بىرلىگىن كورسەتەدى. بۇل – ماناسقا عانا ەمەس, قازاق پەن قىرعىزدىڭ ماڭگىلىك باۋىرلاستىعىنا قويىلعان ەسكەرتكىش. مەن ەكى ەلدىڭ دوستىعى ەشقاشان مىزعىمايدى دەپ سەنەمىن», دەدى قاسىم-جومارت توقاەۆ.
قىرعىزستان پرەزيدەنتى سادىر جاپاروۆ ماناس جىرى قىرعىز حالقىنىڭ تاريحي جانە رۋحاني مۇراسىنا اينالعانىن اتاپ ءوتىپ, ۇرپاقتان ۇرپاققا جەتكەنىنە توقتالدى.
«دۇنيەجۇزىلىك اۋىز ادەبيەتىنىڭ ەڭ ۇلى تۋىندىسى بولعان ماناس ەپوسىن زەرتتەۋدە قازاق حالقىنىڭ ءبىرتۋار تۇلعالارىنىڭ قوسقان ۇلەسى زور ەكەنىن ايتۋ – تاريحي ادىلەتتىلىك. بۇل ورايدا تالانتتى زەرتتەۋشى شوقان ءۋاليحانوۆ ماناس ەپوسىنا قىزىعىپ, قاعاز بەتىنە ءتۇسىرىپ, عىلىمي اينالىمعا ەنگىزدى. سونداي-اق ۇلى جازۋشى مۇحتار اۋەزوۆتىڭ ماناس تۋرالى العاشقى مونوگرافيالىق ەڭبەك جازعانى قازاق-قىرعىز اراسىندا كەڭىنەن ءمالىم. سوندىقتان بۇگىن قىرعىزستان مەن قازاقستان قارىم-قاتىناسىنداعى تاريحي كۇن. ايكول ماناس ەسكەرتكىشىنىڭ قازاق جەرىندە اشىلۋى ەكى ەلدىڭ باۋىرلاستىعىن تاعى ءبىر مارتە دالەلدەدى», دەدى قىرعىزستان پرەزيدەنتى.
سادىر جاپاروۆ بارشا قىرعىز ەلىنىڭ اتىنان قاسىم-جومارت توقاەۆقا جانە ايكول ماناس ەسكەرتكىشىن اشۋعا ۇلەس قوسقان ازاماتتارعا ريزاشىلىعىن ءبىلدىردى. سالتاناتتى ءىس-شاراعا قىرعىزستاننىڭ رەسمي دەلەگاتسيا مۇشەلەرى جانە ەكى ەلدىڭ زيالى قاۋىم وكىلدەرى قاتىستى.