اۋىر تەحنيكالاردى اتتاندىردى

الماتى وبلىسىنان جينالعان تەحنيكالار قۇرامىندا كاماز, تراكتور, سۋ تاسىعىش جانە موتورلى قايىقتار بار. تەحنيكانى جونەلتۋگە دايىندىق جۇمىستارىنا 300-گە جۋىق ادام جۇمىلدىرىلدى, ونىڭ ىشىندە توتەنشە جاعدايلار دەپارتامەنتى, «قازاقستان تەمىر جولى» اق وكىلدەرى, 32363 اسكەري ءبولىمىنىڭ 55 اسكەري قىزمەتكەرى جانە قوناەۆ قالاسىنىڭ اكىمدىگى قاجەتتى ماتەريالداردى قامتاماسىز ەتىپ, جابدىقتاردى پلاتفورماعا تيەدى.

ەلىمىزگە تانىمال «مارەۆەن فۋد تيان-شان» سەرىكتەستىگى مەن جەكە كاسىپكەر ارساماقوۆ سۋ باسقان وڭىرلەرگە بارا جاتقان جۇرگىزۋشىلەردى ازىق-ت ۇلىكپەن قامتاماسىز ەتتى.

«الماتى وبلىسى اكىمدىگىنىڭ باستاماسىمەن قوناەۆ جانە الماتى قالالارىنىڭ ستانتسيالارىنان باتىس قازاقستانداعى سۋ تاسقىنىنا قارسى كۇرەسكە جالپى سانى 166 ارنايى تەحنيكا جىبەرىلەدى, جاقىن ماڭداعى وڭىرلەردەن الماتى وبلىسى جالداعان 41 تەحنيكا اپات ايماقتارىندا جۇمىسىن باستادى. كەشە 60 تەحنيكا جانە ىشىندە 4 قايىق تيەلگەن 47 پلاتفورما جولعا شىقتى. سونىمەن قاتار 65 تەحنيكا پلاتفورمالارعا تيەلىپ جونەلتۋدى كۇتىپ تۇر. ءار پويىز دايىن بولعان بويدا جونەلتىلىپ وتىرادى. ءار تەحنيكاعا جۇرگىزۋشى تاعايىندالىپ, ولار دا پويىزدىڭ باسىنداعى جولاۋشىلار ۆاگونىنا ورنالاسقان. بۇل شاراعا وبلىس كاسىپكەرلەرى, كوممۋنالدىق قىزمەتتەر مەن وبلىستىق باسقارمالار, سونىمەن قاتار شارۋا قوجالىقتارى قاتىسىپ جاتىر. حالقىمىزدى تابيعاتتان كەلگەن توسىن جاعدايدان قايتكەندە امان الىپ شىعۋعا اتسالىسامىز, ءبىزدىڭ كۇشىمىز – بىرلىكتە», دەدى وبلىس اكىمىنىڭ ورىنباسارى الماس باتانوۆ.

ايتا كەتەيىك, وسى ايدىڭ باسىندا وبلىستىق توتەنشە جاعدايلار دەپارتامەنتى اتىراۋ قالاسىنا 33 جەكە قۇرام مەن 13 تەحنيكا اتتاندىردى, ولار كۇنى بۇگىنگە دەيىن جۇمىستارىن جالعاستىرىپ جاتىر.  اباي اۋدانىنا 6 قۇتقارۋشى مەن 2 بىرلىك تەحنيكا جىبەرىلدى. ال بۇگىن 4 قۇتقارۋشى مەن 2 قايىق جونەلتىلەدى.

جونەلتىلگەن تەحنيكا شامامەن ءۇش كۇن جول ءجۇرىپ, ۋچاسكەگە جەتكەن سوڭ بارلىق قاجەتتى جۇمىستاردا پايدالانىلادى.