بۇل تۋرالى مەملەكەت باسشىسى قاسىم-جومارت توقاەۆ ارمەنياعا جۇمىس ساپارى بارىسىندا مالىمدەدى, دەپ حابارلايدى Egemen.kz.
قاسىم-جومارت توقاەۆ ارمەنيامەن مادەني-گۋمانيتارلىق بايلانىس ودان ءارى نىعاياتىنىن ايتتى.
«بيىل قازاقستاندا ارمەنيانىڭ مادەنيەت كۇندەرى وتەدى. بۇل ماڭىزدى ءىس-شارا قوس حالىقتى جاقىنداتا تۇسەتىنى ءسوزسىز. اسىرەسە, رۋحاني بايلانىستارىمىزدى جانداندىرماق. سونداي-اق قۇرمەتتى ارمەنيا پرەمەر-مينيسترىمەن ەرەۆان قالاسى كوشەلەرىنىڭ بىرىنە ۇلى ابايدىڭ ەسىمىن بەرۋ تۋرالى كەلىسىمگە كەلدىك. ال استانانىڭ ءبىر كوشەسىنە ارميان ءالىپبيىنىڭ نەگىزىن قالاۋشى, اۋليە مەسروپ ماشتوتستىڭ اتى بەرىلەدى. وعان قوسا ارميان قارپىمەن جازىلعان قىپشاق تىلىندەگى قولجازبالاردى زەرتتەيتىن عىلىمي توپ قۇرۋ تۋرالى باستامانى قۇپتادىق. ونى ەۋرازيا ۇلتتىق ۋنيۆەرسيتەتى جانە ەرەۆان مەملەكەتتىك ۋنيۆەرسيتەتى بىرلەسىپ جۇزەگە اسىرادى», دەدى پرەزيدەنت.
سونىمەن قاتار قاسىم-جومارت توقاەۆ ارميان سپورتشىلارىن قىركۇيەك ايىندا ەلىمىزدە وتەتىن بەسىنشى دۇنيەجۇزىلىك كوشپەندىلەر ويىندارىنا قاتىسۋعا شاقىردى.