«ورلەۋ» اق اقمولا وبلىستىق پەداگوگ كادرلارىنىڭ بىلىكتىلىگىن جەتىلدىرۋ ينستيتۋتىندا تۇڭعىش پرەزيدەنت كۇنىنە ارنالعان دوڭگەلەك ۇستەل ءماجىلىسى بولىپ ءوتتى. ونىڭ جۇمىسىنا كوكشەتاۋ قالاسىنىڭ قۇرمەتتى ازاماتتارى, قوعامدىق بىرلەستىكتەر وكىلدەرى, جوعارى وقۋ ورىندارى مەن كوللەدجدەردىڭ جانە اتالعان ينستيتۋت وقىتۋشىلارى قاتىستى.
ينستيتۋت ديرەكتورى, حالىقارالىق اقپاراتتاندىرۋ اكادەمياسىنىڭ مۇشە-كوررەسپوندەنتى, قالالىق ءماسليحاتتىڭ دەپۋتاتى ەركىن ءيسىمباەۆ ءوز سوزىندە تۇڭعىش پرەزيدەنتىمىزدىڭ وراسان زور ەڭبەگىن قازاقستاننىڭ جەدەل وركەندەۋ ارقىلى الەمنىڭ وزىق مەملەكەتتەرى قاتارىنا قويىلۋىمەن بايلانىستىردى. ەلىمىز تاۋەلسىزدىك جىلدارىندا عاسىرعا تاتىرلىق ابىرويلى اسۋلار ءبيىگىنەن كورىنە ءبىلدى. بۇل ورايدا, ءتۇبەگەيلى ءارى جارقىن وزگەرىستەر ەلباسىمىز ن.نازارباەۆتىڭ مەملەكەت قۇرۋداعى ساليقالى ساياساتى, كورەگەندىك باستامالارى ناتيجەسىندە جۇزەگە اسقانىن ماقتانىش جانە بۇكىلحالىقتىق العىس سەزىمىمەن پاش ەتەمىز. ءبۇگىنگى كۇردەلى كەزەڭدە ەكونوميكالىق, الەۋمەتتىك جاڭعىرتۋلار نەگىزىندەگى يگى قادامدار قازاقستاندىق ۇلگى مودەلىن العا شىعارىپ وتىرعانى بولاشاعىمىزدىڭ جارقىندىعىن ايقىندايدى.
– 1991 جىلدىڭ 1 جەلتوقسانىندا بۇكىلحالىقتىق سايلاۋ ارقىلى ءبىزدىڭ ەلىمىز ءوزىنىڭ تۇڭعىش پرەزيدەنتىن سايلادى جانە سول ساتتەن تاۋەلسىز قازاقستاننىڭ تاريحى باستالدى, – دەدى اقمولا وبلىستىق ىشكى ساياسات باسقارماسىنىڭ باسشىسى اينا ءمىسىرالىموۆا. – بۇل جاڭا ءومىردى ءوز قولدارىمەن جاساپ جاتقان كوپۇلتتى حالقىمىزدى اسقارلارعا باستايتىن ماڭىزدى ءسات ەكەندىگى دالەلدەنىپ وتىر. ءسىزدەردىڭ بارشالارىڭىزدى, وبلىس جۇرتشىلىعىن تۇڭعىش پرەزيدەنت كۇنى مەيرامىمەن قۇتتىقتايمىن.
وبلىستىق پەداگوگ كادرلاردىڭ بىلىكتىلىگىن جەتىلدىرۋ ينستيتۋتى ديرەكتورىنىڭ ورىنباسارى, پەداگوگيكا عىلىمدارىنىڭ ماگيسترى ايسۇلۋ اقىشەۆا, ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ وقىتۋشىسى عالىمتاي تولەپبەرگەنوۆ, ا.مىرزاحمەتوۆ اتىنداعى ۋنيۆەرسيتەتتىڭ كافەدرا مەڭگەرۋشىسى ارداق قاپىشەۆ قوسىمشا باياندامالارىندا ەلىمىزدىڭ قازاقستان رەسپۋبليكاسىنىڭ تۇڭعىش پرەزيدەنتىنىڭ باسشىلىعىمەن تاۋەلسىزدىك دىڭگەگىن تىكتەۋدەگى قارىشتى قادامداردىڭ ماڭىزدى كەزەڭدەرىنە تالداۋ جاسادى.
ەل ومىرىندەگى ايتۋلى مەرەكەنىڭ ەرەكشەلىكتەرى جونىندە كوكشەتاۋ قالاسى ارداگەرلەر كەڭەسىنىڭ توراعاسى رۇستەم شەريازدانوۆ, كوكشەتاۋ قالاسىنىڭ قۇرمەتتى ازاماتى زۋرا شۋاتاەۆا, ابىز قاريا فارۋك باگاپوۆ تاۋەلسىزدىكتىڭ العاشقى جىلدارىندا ەلباسى نۇرسۇلتان نازارباەۆپەن كەزدەسۋ كەزىندەگى اسەرلەرىمەن ءبولىستى.
سونداي-اق, ەتنومادەني ءبىرلەستىكتەردىڭ جەتەكشىلەرى ر.سۋلكارناەۆ, ا.ارتەمەنكو, اۋعان سوعىسى ارداگەرلەرى كەڭەسىنىڭ مۇشەسى ق.قوسماعامبەتوۆ, №1 تەحنيكالىق كوللەدجىنىڭ وقۋشىسى ا.تسينگاليدي ءوز سوزدەرىندە ۇلتارالىق كەلىسىم مەن بەيبىت ءومىرىمىزدىڭ كەپىلى رەتىندە تۇڭعىش پرەزيدەنتىمىزدىڭ كورەگەندىك ساياساتىنا جوعارى باعا بەردى.
كەزدەسۋدە «ەلباسىنىڭ فەنومەنى» بەينەفيلمىنىڭ كورسەتىلۋى مەرەكەلىك سالتاناتتىڭ ءارىن اشا ءتۇستى.
باقبەرگەن امالبەك,
«ەگەمەن قازاقستان».
كوكشەتاۋ.