اقوردادا پرەزيدەنت قاسىم-جومارت توقاەۆتىڭ توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسى ءوتىپ جاتىر, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«الدىمەن, بارشاڭىزدى عىلىم كۇنىمەن شىن جۇرەكتەن قۇتتىقتايمىن! سىزدەر ارقىلى قازاقستان عالىمدارىنا جىلى لەبىزىمدى جەتكىزگىم كەلەدى. شىن مانىندە, بۇگىنگى مەرەكەلىك كۇن – قوعامىمىزداعى ەرەكشە ءسات, سەبەبى بۇل كۇن عۇلاما عالىم, زاڭعار تۇلعا قانىش ساتباەۆتىڭ تۋعان كۇنىمەن تۇسپا-تۇس كەلىپ وتىر. ءدال بۇگىن اكادەميك قانىش ساتباەۆتىڭ تۋعانىنا 125 جىل تولدى. ءبىز ۇلى ابايدى قازاق رۋحانياتىنىڭ تەمىرقازىعى, احمەت بايتۇرسىن ۇلىن ۇلت ۇستازى دەيمىز. ال قانىش ساتباەۆتى قازىرگى قازاق عىلىمىنىڭ اتاسى دەۋگە بولادى.
وزدەرىڭىز بىلەسىزدەر, قانىش يمانتاي ۇلى ساتباەۆ – حالقىمىزدىڭ ءبىرتۋار پەرزەنتى. ەلىمىز ءالى كۇنگە دەيىن ونىڭ عىلىمي جاڭالىقتارىنىڭ يگىلىگىن كورىپ وتىر. ايگىلى عالىمنىڭ مەرەيتويىن جوعارى دەڭگەيدە اتاپ ءوتۋ ماڭىزدى», دەپ ءسوزىن باستادى پرەزيدەنت ۇلتتىق كەڭەستىڭ وتىرىسىندا.
مەملەكەت باسشىسىنىڭ تاپسىرماسىمەن ەلىمىزدە كوپتەگەن ءىس-شارا وتكىزىلەدى.
ء«بىز, ءبىر جاعىنان, ۇلى عالىمعا شىنايى قۇرمەت كورسەتەمىز. ەكىنشى جاعىنان, ءبىلىم-عىلىم كۋلتىن قالىپتاستىرۋ جولىندا ماڭىزدى قادام جاسايمىز. ەڭ باستىسى, ەلىمىز ساتباەۆ سالعان سارا جولدى جالعاستىرۋى قاجەت.
ءبىز «عىلىم» تۋرالى ءسوز قوزعاعاندا, ەڭ الدىمەن, ۇلى عالىم قانىش ساتباەۆتىڭ ەسىمى ويعا ورالادى. بۇل – زاڭدىلىق. مەملەكەتتىك مارتەبەسىن قايتا يەلەنگەن ۇلتتىق عىلىم اكادەمياسى ەلىمىز عانا ەمەس, بۇكىل الەمنىڭ عىلىمي قاۋىمداستىعى ماقتان تۇتاتىن قانىش ساتباەۆتىڭ ەسىمىمەن تىعىز بايلانىستى. بۇل كەزدەيسوقتىق ەمەس», دەدى ق.توقاەۆ.