تۇرمىستىڭ تاۋقىمەتىنە ارقا توسىپ, ەڭبەككە ەرتە ارالاسقان سەرجانت شاحرۋحقوجا ابدۋرازاكوۆ وزگە بالالار ويىن الاڭىندا ۋاقىت وتكىزىپ جۇرگەندە, ماقتا مەن جۇگەرى تەرىپ, اتا-اناسىنا قولعابىس, باۋىرلارىنا قامقورشى بولدى. ال وتان الدىنداعى بورىشىن وتەۋ ونىڭ ءومىرىن تۇبەگەيلى وزگەرتتى. ۇلتتىق ۇلان ساپىنا قوسىلعان ول قازىر 3660 اسكەري ءبولىمىنىڭ 2-اتقىشتار روتاسى 4-ۆزۆود 2-بولىمشەسىنىڭ كومانديرى قىزمەتىن اتقارىپ ءجۇر. بولاشاقتا ارنايى جاساق قاتارىندا قىزمەت ەتۋدى ماقسات تۇتقان جىگىتتىڭ جوسپارى كوپ.
تۇركىستان وبلىسىنىڭ ماقتاارال اۋدانىنا قاراستى بەرەكە اۋىلىندا ومىرگە كەلگەن شاحرۋحقوجا مەكتەپتە ءبىلىم الا ءجۇرىپ, بۇعاناسى قاتقان ساتتەن باستاپ ماقتا القابىندا جۇمىس ىستەيدى. سونداي كۇندەردىڭ بىرىندە ونىڭ قولىنا اسكەرگە شاقىرۋ قاعازى تيەدى. كوپكە سوزباي اسكەري كوميسسارياتقا بارادى. بىراق اسكەرگە الىنۋعا ءالى جاسى جەتپەگەن. بىرنەشە كۇن ەرتە شاقىرىپ قويعان, امال جوق, كەرى قايتادى. اسكەرگە بارامىن دەپ بەل بۋعان جاس جىگىتتىڭ ەكىنشى تالپىنىسى دا ءساتسىز اياقتالادى. تەك ءۇشىنشى مارتە كەلگەندە عانا جولى بولىپ, تالدىقورعان قالاسىنداعى ۇلتتىق ۇلاننىڭ 5514 اسكەري ءبولىمىنىڭ 3-روتاسىنا قوسىلادى. وسىلايشا, «اسكەر اتانىپ, ەلدى قورعايمىن» دەگەن بالا ارمانى ورىندالعان ول: «مەكتەپ قابىرعاسىندا ارمانىمىز جايلى شىعارما جازعان كەزدە ۇنەمى اسكەري ادام بولعىم كەلەتىنىن قاعازعا ءتۇسىرۋشى ەدىم. وقۋشى كۇنىمنەن سپورتقا كوبىرەك قىزىقتىم», دەيدى.
وتان الدىنداعى بورىشىن ابىرويمەن اتقارىپ شىقتى. قىزمەت بارىسىندا ەرلىك ارەكەتتەرىمەن دە كوزگە تۇسكەن جاۋىنگەر ۋاقىت وتە ءوز ىسىنە مۇقيات, شارۋاعا تياناقتى قارايتىن مامان بولىپ قالىپتاسا باستادى.
– 9-سىنىپ وقىپ جۇرگەندە ءۇي سالا باستادىق. سول كەزدە وتباسىمىز قاراجات جاعىنان قينالدى. سوندىقتان ۇيدەگى ءتورت ادام ءبىر كۇندىك جۇمىسقا جالداناتىنبىز. اقشاعا جۇگەرى القابىندا جۇمىس ىستەۋىمىزگە تۋرا كەلدى. ءۇيىمىزدىڭ شارۋاسى تۇرالاپ قالدى. اعام وقۋعا تۇسسە, وعان دا اقشا كەرەك. انە-مىنە دەگەنشە مەن دە وقۋ بىتىرەتىن ۋاقىت تاياپ قالدى. سوندا انامىز: «بۇل – قۇدايدىڭ بىزگە بەرگەن سىناعى. اللا سىناقتى كوتەرە الاتىن قۇلدارىنا عانا بەرەدى. جاقسىلىقتان ءۇمىت ۇزبەيىك, بالام», دەپ جۇباتاتىن. سول سوزىنە سەندىك. ادال جۇمىس ىستەدىك. ادالدىق دەگەننەن شىعادى, بىردە جۇمىس بەرۋشىمىز ءوز اياعىمەن ۇيگە ىزدەپ كەلىپ, كەلىسكەن 20 مىڭ تەڭگەنىڭ ورنىنا 40 مىڭ تەڭگە ۇستاتتى. اكەم: ء«وز ەڭبەگىمىزگە ساي قاراجاتتى بەرىڭىز, قالعانىن الا المايمىن», دەپ ارتىق اقشانى جۇمىس بەرۋشىگە قايتارىپ بەردى. سول ازىن-اۋلاق اقشانىڭ ءوزى قىجالاتىمىزدى وتەدى. اكە-شەشەمىزدىڭ جاناشىرلىعىن سەزىنىپ, ادال تاربيەسىن بويىمىزعا ءسىڭىرىپ وستىك. ولاردىڭ بەرگەن ەڭبەكقورلىق پەن ادىلدىك قاسيەتى اسكەردە قاجەتىمە جارادى», دەيدى وتكەن كۇندەردى ەسكە العان شاحرۋحقوجا شەرماتجان ۇلى.
ساپقا تۇرىپ, سارباز اتانعان سوڭ تالدىقورعان قالاسىنداعى 5514 اسكەري بولىمىندە سپورتپەن شۇعىلدانۋعا مۇمكىندىك تۋدى. ناتيجەسى دە جامان بولعان جوق. اسكەري بولىمدەگى سپورتتىق جارىستاردا توپ جارعان كەزدەرى كوپ. سپورتتاعى جەتىستىكتەرى كوبەيە باستادى. «اسكەردەن كەتەرىمدە اعا لەيتەنانت بولىپ جۇرگەن روتا كومانديرى كەرەي ەرجان بىزدەن كەلىسىمشارت بويىنشا قىزمەت ەتۋگە نيەتتىلەر بار-جوعىن سۇرادى. بىردەن قالعىم كەلەتىنىن ايتتىم. 5514 اسكەري بولىمىندە جۇمىس ىستەگىم كەلگەن. بىراق ول جەردە قىزمەت ەتۋ باقىتى بۇيىرمادى. مەنى زارەچنىي كەنتىندەگى اسكەري بولىمگە باعىتتاپ جىبەردى. 3660 اسكەري بولىمىنە كەلگەندە رحبز روتاسىنىڭ ءبولىنىس باسشىسى, كولىك باسشىسى لاۋازىمىنا تاعايىندالدىم. بىرنەشە ايدان كەيىن باتالون سەرجانتى, اعا سەرجانت ىحتيار جالالوۆ بولىمشە كومانديرى بولىپ قىزمەت ەتۋدى ۇسىندى. سودان سوڭ قاراكەمەرگە وقۋعا جىبەردى. 2 ايدان كەيىن وقۋىمدى ويداعىداي اياقتاپ كەلدىم», دەيدى بولىمشە كومانديرى.
بۇگىندە ونىڭ ءوزى عانا ەمەس, وتباسى مۇشەلەرىنىڭ دە ارمانى ورىندالىپ, اركىم ءوزى قالاعان سالادا جۇمىس ىستەپ جاتىر. اعاسى اعىلشىن ءتىلى ءپانىنىڭ مۇعالىمى, الىس-جاقىن كۇندەرى شەتەلگە شىعۋ ءۇشىن ۆيزاسىن كۇتىپ ءجۇر. ءىنىسى جەتىسايداعى مەديتسينالىق كوللەدجدە ءبىلىم الىپ كەلەدى. ءوزى دە بولاشاقتا ارنايى جاساق قاتارىنا قوسىلۋدى ماقسات ەتكەندىكتەن, دايىندىعىن شىڭداپ, جوسپارىنىڭ جۇزەگە اسۋىن تاعاتسىزدانا كۇتىپ ءجۇر.