تۇركىستاندا سيدنەي وليمپياداسىنىڭ جەڭىمپازى, «بارىس» وردەنىنىڭ العاشقى يەگەرى بەكزات ساتتارحانوۆتى ەسكە الۋعا ارنالعان بوكستان جاستار اراسىنداعى XXII حالىقارالىق تۋرنير جەڭىمپازدارى انىقتالدى. ءداستۇرلى تۋرنيردە ەلىمىزدىڭ وڭىرلەرىنەن, قىرعىزستان, وزبەكستان, تاجىكستان ەلدەرىنەن كەلگەن 220-عا جۋىق سپورتشى 13 سالماق دارەجەسىندە سىنعا ءتۇسىپ, جەڭىمپازدار مەن جۇلدەگەرلەردى انىقتادى.
بەكزاتتاي چەمپيون بولۋدى ارمانداعان جاستاردىڭ تۇركىستانعا ساپار الدىندا سيدنەي وليمپياداسىنداعى فينالدىق جەكپە-جەك تۋرالى اقپاراتتاردى قايتا ءبىر اقتارىپ, بەينەتۇسىرىلىمدەردى تاعى ءبىر تاماشالاپ, قاناتتانىپ كەلگەنى انىق. جاس بوكسشىلاردىڭ وتتى جانارىن كورگەن ءبىز سولاي ويلادىق. ءيا, سول سىندا وليمپ شىڭىنىڭ ۇشار باسىندا, ياعني اقتىق سىندا كەزدەسكەن قوس مىقتىنىڭ ءبىرى – 1999 جىلعى الەم چەمپيونى, امەريكالىق ريكاردو حۋارەس, ەكىنشىسى بۇعان دەيىن جالپاق دۇنيەگە اتى بەيمالىم بەكزات ساتتارحانوۆ ەدى. ەكەۋى – تۇيدەي قۇرداس. ەكىنشى راۋند بىتكەندە ساتتارحانوۆ وق بويى وزىق تۇردى, ەسەپ – 15:4. ءۇشىنشى, ءتورتىنشى راۋندتارداعى جان الىپ, جان بەرىسكەن جەكپە-جەك, جالپى سول كەزدەسۋ بۇگىنگى جاس سپورتشىلار ساباق الاتىن شەبەرلىكتىڭ, نامىس پەن تاباندىلىقتىڭ, جەڭىسكە دەگەن ۇمتىلىستىڭ جيىنتىعى سىندى ەدى. ال «Olympic Center» سپورت كەشەنىندە وتكەن جارىستىڭ اشىلۋ سالتاناتىندا تۇركىستان قالاسىنىڭ اكىمى نۇربول تۇراشبەكوۆ, بەكزاتتىڭ اناسى سىرلىكۇل ساتتارحانوۆا قۇتتىقتاۋ ءسوز سويلەپ, سپورتشىلارعا ساتتىلىك تىلەدى.
«ەلدىڭ اتىن شىعارعان ەردىڭ ەسىمى جاڭعىرىپ, جىل سايىن تۋرنير ءوتىپ جاتقانىنا انا جۇرەگىممەن قۋانىشتىمىن. شىن مىقتىعا تۇساۋ جوق. كۇللى قازاقتىڭ داڭقىن 20 جاسىندا الەمگە تانىتقان بەكزاتتىڭ سپورتتاعى داڭعىل جولى بوكسشىلارىمىزعا جۇعىستى بولسىن. جارىستى حالىقارالىق دەڭگەيدە ۇيىمداستىرۋدى داستۇرگە اينالدىرعان وبلىس اكىمدىگىنە, وبلىستىق دەنەشىنىقتىرۋ جانە سپورت باسقارماسىنا, ءابدىسالان نۇرماحانوۆ اتىنداعى سپورت مەكتەبىنىڭ ۇجىمىنا العىسىم شەكسىز», دەدى سىرلىكۇل ادىربەكقىزى.
سونداي-اق وليمپيادا چەمپيونى ەرماحان يبرايموۆ باستاعان ەر بەكزاتتىڭ سپورت سالاسىنداعى ارىپتەستەرى مەن ەلىمىزدەگى بوكس مايتالماندارى جاس بىلعارى قولعاپ شەبەرلەرىنە ساتتىلىك تىلەدى.
تارتىستى وتكەن تۋرنير بەكزاتتىڭ كىندىگى كەسىلگەن كۇنى, ياعني 4 ساۋىردە ءوز مارەسىنە جەتتى. بوكس دوداسىنىڭ قورىتىندىسىندا قىزدار اراسىندا باق سىناعان الماتىلىق ە.تۇرعانوۆا (50 كگ), تۇركىستاندىق ل.ابدۋللاەۆا (54 كگ), قىرعىزستاننان كەلگەن م.ادىلباەۆا (57 كگ), الماتى وبلىسىنان م.ماناتقىزى (60 كگ), ا.ەسبوسىنوۆا (ماڭعىستاۋ وبلىسى. 66 كگ) جانە 75 كيلودا تۇركىستاندىق ش.ءنالىباي بارلىق قارسىلاسىن تىزە بۇكتىرىپ, جەڭىمپاز اتاندى.
ال ۇلدار اراسىندا شارشى الاڭدا جاسىنداي جارقىلداعان ۇلاندارىمىز جوعارى دارەجەدە ونەر كورسەتتى. ناقتىراق ايتساق, ب.نۇرىمبەتوۆ (شىمكەنت ق. 48 كگ), د.بەرىكباي (جەتىسۋ وبل. 51 كگ), ب.اسكەرتاەۆ (اقمولا وبل. 54 كگ), ە.ۇزاقباي (تۇركىستان وبل. 57), ع.ەرمەكباي (جامبىل وبل. 60 كگ), ا.ۇسەن (تۇركىستان وبل. 63,5), ا.كوشەرباي (جامبىل وبل. 67كگ), ب.نۇرماحان (ماڭعىستاۋ وبل. 71 كگ), ا.كەڭشىلىك (اقتوبە وبل. 75 كگ), ر.دينەۋوۆ (اقتوبە وبل. 80 كگ), ي.دنيشەۆ (بقو. 86 كگ), د.دانيار (الماتى وبل. 92 كگ), س.تلەكباي (ماڭعىستاۋ وبل. +92 كگ) التىننان القا تاقتى. جارىس جەڭىمپازدارى مەن جۇلدەگەرلەرىنە بەلبەۋ, مەدال جانە ديپلوم تابىستالدى.
ايتا كەتەلىك, تۇركىستاندا بەكزات ساتتارحانوۆ اتىنداعى سپورت كەشەنى سالىنىپ جاتىر. بۇگىندە نىساننىڭ ىشكى ارلەۋ, قاسبەتتى ساندەۋ, جىلىتۋ, جەلدەتۋ جۇيەلەرىن ورناتۋ جۇمىستارى جۇرگىزىلۋدە. عيماراتتىڭ جالپى اۋدانى – 7 248 شارشى مەتر, جەر اۋماعى – 1,8 گەكتار, قۇنى – 3,1 ملرد تەڭگە. نىسان بيىل تاپسىرىلادى. زاماناۋي سپورت كەشەنىندە ءا.نۇرماحانوۆ اتىنداعى سپورت مەكتەبىنىڭ ۇجىمى ورنالاسادى. كەشەندە رەسپۋبليكالىق, حالىقارالىق جارىستاردى وتكىزۋگە مۇمكىندىك جاسالادى. جالپى وبلىس كولەمىندە 39 سپورت مەكەمەسىندە 6 200-دەن اسا سپورتشى بوكسپەن شۇعىلدانسا, ولاردى 270 جاتتىقتىرۋشى باپتاپ ءجۇر.
تۇركىستان