12 ءساۋىر – ۇلت ماقتانىشى, قازاق ەلىنىڭ قازىنا بايلىعىن اشۋشى, قازاقستان عىلىم اكادەمياسىنىڭ نەگىزىن قالاۋشى ءارى تۇڭعىش پرەزيدەنتى, العاشقى اكادەميك قانىش يمانتاي ۇلى ساتباەۆتىڭ تۋعان كۇنى جانە وسى داتاعا ورايلاستىرىلعان عىلىم قىزمەتكەرلەرى كۇنى. مەرەيتويعا ساناۋلى كۇن قالدى. 12 ءساۋىر كۇنى قانىش ساتباەۆتىڭ 125 جىلدىق مەرەيتويىن جىل كولەمىندە اتاپ ءوتۋ ءراسىمىنىڭ رەسمي اشىلۋ سالتاناتى وتەدى. بۇل تۋرالى «حالىقارالىق قانىش ساتباەۆ» قورى حابارلادى, دەپ جازادى Egemen.kz.
عالىمنىڭ مەرەيتويىن اتاپ وتۋگە ارنالعان جالپىرەسپۋبليكالىق جوسپار وتكەن جىلى بەكىتىلگەن. وسى قۇجات اياسىندا 12 ءساۋىر كۇنى, ساعات 14:00-دە استانا قالاسىنداعى قانىش ساتباەۆ كوشەسى بويىنداعى اكادەميكتىڭ ءزاۋلىم ەسكەرتكىشىنە («قازاقستان» سپورت كەشەنى ماڭى) گۇل شوقتارى قويىلادى جانە وسى ەسكەرتكىش الدىنا عۇلاما ءماشھۇر ءجۇسىپتىڭ جاس قانىشقا 22 جاسىندا بەرگەن باتاسى جازىلعان گرانيت بەلگىتاستىڭ اشىلۋ سالتاناتى وتەدى. ءىس-شاراعا ۇكىمەت مۇشەلەرى, سەنات جانە ءماجىلىس دەپۋتاتتارى, مينيسترلەر مەن قالا جانە ايماق اكىمدەرى, پرەزيدەنت جانىنداعى ۇلتتىق عىلىم اكادەمياسى باسشىلىعى مەن ۇلتتىق عىلىمي كەڭەستىڭ مۇشەلەرى, مەملەكەت جانە قوعام قايراتكەرلەرى, ەۋرازيا ۇلتتىق ۋنيۆەرسيتەتىنىڭ پروفەسسور-وقىتۋشىلار قۇرامى جانە قالا تۇرعىندارى قاتىسادى دەپ كۇتىلىپ وتىر.
سونداي-اق ءىس-شارانىڭ جالعاسى ق.ساتباەۆ كوشەسىندەگى العاشقى اكادەميكتىڭ بارەلەفىنىڭ اشىلۋى, ودان كەيىن ل.گۋميلەۆ اتىنداعى ەۇۋ-ندە «پلانەتارلىق دەڭگەيدەگى تۇلعا» اتتى كورمەمەن ۇلاسادى. ساعات 15:00-دە «قانىش ساتباەۆ – ۇلت ماقتانىشى» اتتى حالىقارالىق عىلىمي-پراكتيكالىق كونفەرەنتسيا باستالادى.
ايتا كەتۋ كەرەك, قانىش ساتباەۆ – ەسىمى مەملەكەت تاريحىندا التىن ارىپپەن جازىلعان ۇلتتىڭ ءبىرتۋار پەرزەنتى, يۋنەسكو دەڭگەيىندە 100-جىلدىعى تويلانعان اسا كورنەكتى گەولوگ-عالىمى, مەملەكەت جانە قوعام قايراتكەرى, حح عاسىر عۇلاماسى.
عۇلاما-عالىمنىڭ مەرەيتويىن اتاپ وتۋگە ارنالعان ۇكىمەتتىڭ جالپىرەسپۋبليكالىق جوسپارى اياسىندا بيىل رەسپۋبليكالىق جانە حالىقارالىق دەڭگەيدەگى 50-دەن استام ءىس-شارا وتەدى.