ەلىمىزدىڭ بىرنەشە وڭىرىندەگى سۋ تاسقىنىنىڭ سالدارى, جەرگىلىكتى تۇرعىنداردىڭ كوڭىل كۇيى مەن تۇرمىستىق قيىندىقتارىن تۇركىستان ءوڭىرىنىڭ جۇرتشىلىعى جاقسى تۇسىنەدى. ولاي دەيتىنىمىز, وسىدان ءتورت جىل بۇرىن مامىردا قالىڭ نوسەر جاڭبىر جاۋىپ, قاتتى جەل سوعۋى سالدارىنان وزبەكستانداعى ساردوبا سۋ قويماسىنىڭ بوگەتى بۇزىلىپ, ماقتاارال اۋدانىنداعى ەلدى مەكەندەردى سۋ باسىپ قالعان بولاتىن. مىنە, سول قيىن كەزەڭدە بۇكىل ەل بولىپ, ياعني بارلىق وبلىس حالقى كومەك قولىن سوزدى.
جاقسىلىقتى ۇمىتپاعان جۇرت بۇگىندە زارداپ شەككەن وڭىرلەرگە قولدان كەلگەن كومەگىن بەرىپ جاتىر. وسى ورايدا تۇركىستان وبلىسى «جاستار رەسۋرستىق ورتالىعى» عيماراتىندا, ءوڭىردىڭ بارلىق اۋدان, قالالارىندا شتابتار اشىلىپ, تۇرعىنداردىڭ كومەگىن قابىلداۋدا. زارداپ شەككەن تۇرعىندارعا كومەك قولىن سوزامىن دەگەن ەرىكتىلەر مەن وبلىس تۇرعىندارى يگى ىسكە ءوز ۇلەستەرىن قوستى. العاشقى كۇننىڭ وزىندە تۇرعىندار, ءماسليحات دەپۋتاتتارى, جەرگىلىكتى جومارت ازاماتتار ەڭ قاجەتتى جانە جولعا جارامدى زاتتارمەن قامتىپ ۇلگەردى. ءبىرىنشى جۇك كولىگى اقتوبەگە جەتكىزىلىپ, وبلىس جاستارى ونى ۇلەستىردى.
سونداي-اق جۋىردا گۋمانيتارلىق كومەك تيەلگەن ەكىنشى كەرۋەن جولعا شىقتى. تۇركىستاندىقتار 30 تونناعا جۋىق ازىق-ت ۇلىك, كيىم-كەشەك, كورپە-توسەك, تۇرمىسقا قاجەتتى زاتتار جينادى. سول جۇكتى جەتكىزۋ ءۇشىن اۋداندىق جانە قالالىق جاستار ورتالىعىنان قۇرىلعان شتاب مۇشەلەرى وبلىس ورتالىعىنا كەلىپ, بىرلەسە جۇمىس اتقاردى. قاجەتتى زاتتار جۇك كولىكتەرىنە تيەلدى. گۋمانيتارلىق كەرۋەندى شىعارىپ سالعان وبلىستىق قوعامدىق دامۋ باسقارماسىنىڭ باسشىسى ەرلان كۇزەمباەۆ يگى ىسكە ۇلەس قوسقان ءوڭىر جۇرتشىلىعىنا, كاسىپكەرلەرگە ريزاشىلىعىن ءبىلدىرىپ, سۋ تاسقىنىنان زارداپ شەككەن وڭىرلەرگە قولداۋ كورسەتۋ جۇمىستارى جالعاساتىنىن جەتكىزدى.
ايتا كەتەيىك, اقتوبە وڭىرىندە تۇركىستان وبلىسىنان بارعان ەرىكتى جاستار قالپىنا كەلتىرۋ جۇمىستارىنا قاتىسىپ, زارداپ شەككەن تۇرعىندارعا كومەك كورسەتىپ ءجۇر. سونداي-اق سۋ تاسقىنىنان زارداپ شەككەن وڭىرلەرگە توتەنشە جاعدايلار دەپارتامەنتىنىڭ قۇتقارۋشىلار توبى مەن ارنايى تەحنيكالار جىبەرىلدى. قۇتقارۋشىلار سولتۇستىك قازاقستان وبلىسىنا بارىپ, قارعىن سۋدىڭ الدىن الۋ جۇمىستارىنا اتسالىستى. كاسىبي مامانداردان قۇرالعان توپ تاسقىن قاۋپى جوعارى عابيت مۇسىرەپوۆ, ايىرتاۋ, تايىنشا جانە تيميريازەۆ اۋداندارىندا جۇمىس ىستەدى.
تۇركىستان وبلىسى