شەتەلدىك ۋنيۆەرسيتەتتىڭ ديپلومىن الادى

ۋنيۆەرسيتەتتىڭ گرانتتىق قار­جى­لاندىرۋ اياسىندا بارلىعى 12 جوبا جۇزە­گە اسىرىلىپ جاتسا, ونىڭ ىشىن­دە «جاس عالىم» كونكۋرسىنىڭ 5 ۇمىت­كەرى بار. وقۋ ورنىندا عىلىم سالا­سىنا ناقتى قولداۋ بار ەكەنى عى­لىمي جوبالارعا ءوتىنىش بەرۋگە ار­نالعان قارجى كولەمىنىڭ ۇلعايۋى­نان بايقالادى. ايتالىق, 2022 جىلى عىلىم جانە جوعارى ءبىلىم مينيستر­لىگى عىلىم كوميتەتى تاراپىنان ما­قۇلدانعان جوبالاردىڭ قارجى كولە­مى 17 ميلليون 407 مىڭ تەڭگە بولسا, بىلتىر بۇل كورسەتكىش كۇرت ءوسىپ, 400 ميلليون تەڭگەدەن اسقان. بيىل عىلىمي زەرتتەۋ گرانتتىق كونكۋرس­تارىنا قارجى كولەمى 3 ميلليراد­تان اساتىن 36 جوبا ۇسىنىلدى. «جوعا­رى وقۋ ورىندارىندا حالىقارالىق قاتىناستى ارتتىرۋدىڭ ماقساتى – الەمدىك باسەكەگە قابىلەتتى مامان دايارلاۋ. ءبىزدىڭ ۋنيۆەرسيتەت تەك قانا پەداگوگ مامانداردى دايارلايدى, ياعني عىلىمي زەرتتەۋ تاقىرىبىندا ەرەكشەلىك بار. ماسەلەن, سوڭعى كەزدە ەلىمىزدە ينكليۋزيۆتى ءبىلىم بەرۋگە كوپ كوڭىل ءبولىنىپ وتىر. بۇل وركەنيەتتى ەلدەردە دامىعان سالا. ءبىزدىڭ بولاشاق ماماندار شەتەلدە تاعىلىمدامادان ءوتىپ, سول تاجىريبەنى وزىمىزگە اكەلە الادى. بۇل باعىتتا اقش-تىڭ كالي­فورنيا, گەرمانيانىڭ ميۋنحەن, تۇركيانىڭ گازي ۋنيۆەرسيتەتى سياق­تى بىرنەشە وقۋ ورىندارىمەن بايلانىس ورناعان. سونىڭ ىشىندە باۋىر­لاس تۇركى ەلىنىڭ ءبىلىم بەرۋ جانە پە­داگوگيكا سالاسى بويىنشا الەم­دەگى جەتەكشى ۋنيۆەرسيتەتتەردىڭ قا­تا­رىنداعى 27-ورىننان تابىلاتىن گازي ۋنيۆەرسيتەتىمەن ستراتەگيا­لىق سەرىكتەستىك ورناتىپ, فيليالىن اشۋ جوسپارىمىزدا بار», دەيدى ۋني­ۆەرسيتەتتىڭ عىلىمي جۇمىستار جانە يننوۆاتسيالار جونىندەگى پرورەكتورى ەرجان كەرىمبەكوۆ.

گازي ۋنيۆەرسيتەتىنىڭ فيليالىن اشۋ بويىنشا ءتيىستى قۇجاتتار مەن كەلىسىمشارتتار بىلتىر اتال­عان شەتەلدىك وقۋ ورنى تاراپىنان راسىمدەلىپ, تۇركيا جوعارى ءبىلىم كە­ڭە­سىنە ۇسىنىلعان. فيليالدى اشۋ تۇركيا رەسپۋبليكاسىنىڭ زاڭ­نا­ماسىنا سايكەس پرەزيدەنت جار­لىعىمەن راسىمدەلەدى. «فيليال اياسىندا ىسكە اسىرىلاتىن ەكى قوسديپلومدى ءارى ورتاق ءبىلىم بەرۋ باعدارلامالارى فيزيكا جانە اعىلشىن ءتىلى پەداگوگىن دايارلاۋ بويىنشا ءبىزدىڭ وقۋ ورنى تاراپىنان قر ببب رەەسترىنە تىر­كەل­گەن. ايتا كەتەرلىگى, بۇعان دەيىن تاجى­ريبەدە بولعانىنداي, قازاق-تۇرىك ىنتى­ماقتاستىعى ناتيجەسىندەگى جو­عارى وقۋ ورنىندا ەلىمىزدىڭ ءبىلىم بەرۋ باعدارلاماسى وقىتىلعان بولسا, بىزدە حالىقارالىق تالاپقا ساي تۇركيا ءبىلىم بەرۋ باعدارلاماسىنىڭ وزىق تاجىريبەسى مەن ادىستەمەسى ۇيرەتىلەدى. گازي ۋنيۆەرسيتەتى فيليالىن اشۋداعى ەرەكشەلىك تە وسى بولىپ تۇر», دەيدى ەرجان كەرىمبەكوۆ. فيليال اشۋدا تاڭداۋدىڭ تۇركيالىق وقۋ ورنىنا ءتۇسۋىنىڭ وزىندىك سەبەپتەرى دە بار. پرورەكتوردىڭ مالىمدەۋىنشە, بىرىنشىدەن, گازي ۋنيۆەرسيتەتى ءبىلىم بەرۋ باعدارلاماسى حالىقارالىق تا­لاپتارعا ساي, دۇنيەجۇزىندەگى وقۋ ورىندارى اراسىندا 27 ورىندا تۇرعان ۋنيۆەرسيتەت. ەكىنشىدەن, پەداگوگ مامان دايارلاۋ تەك ءبىلىم بەرۋمەن ەمەس, تاربيە ارقىلى دا جۇزەگە اساتىنىن ەسكەرسەك, تۇرىك ەلى بولمىسى مەن ءداس­تۇر-سالتى قازاققا جاقىن, باۋىرلاس ەل. قازىرگى تاڭدا وقىتۋشىلار مەن ستۋدەنتتەرگە الدىن الا دايىندىق بارىسى بويىنشا ۋنيۆەرسيتەتتە تۇرىك ءتىلىن وقىتۋ ورتالىعى جۇمىس ىستەيدى. ءتىل ۇيرەنۋ تەگىن. بۇل ورايدا تۇر­كيا ءبىلىم مينيسترلىگىنىڭ قىزمەتكەرى ومەر وزدەمير ارنايى كەلىپ ساباق بەرىپ ءجۇر. كۋرس تۇركيانىڭ الماتى قا­لاسىنداعى باس كونسۋلدىعىنىڭ تىكە­لەي قولداۋىمەن جۇرگىزىلەدى.

وقۋ ورنىندا ستۋدەنتتەردىڭ شە­تەل­دىك وقۋ ورىندارىندا بولىپ, سا­پا­لى ءبىلىم الۋىنا دا بارلىق مۇمكىندىك جاسالىپ كەلەدى. ءبىر عانا مىسال, جۋىردا ۋنيۆەرسيتەتتىڭ «Coworking» ورتالىعىندا پولشانىڭ لودز ۋني­ۆەر­سيتەتىندە اكادەميالىق ۇتقىر­لىق باعدارلاماسى اياسىندا ءبىر سەمەستر ءبىلىم الىپ كەلگەن ستۋدەنتتەرمەن كەزدەسۋ ءوتتى. ءبىلىم الۋشىلار اقپارات الماسۋ ماقساتىندا ۋني­ۆەر­سيتەتتىڭ 1-2 كۋرس ستۋدەنتتەرىنە بەينە­روليك پەن پرەزەنتاتسيا جاساپ, وزدە­رىنىڭ اسەرلەرىمەن ءبولىستى. ولار بوس ۋاقىتتارىندا نەمەسە مەرە­كە­لەردە ەۋروپانىڭ كوپتەگەن جاقىن ورنالاسقان ەلدەرىنە بارۋعا مۇم­كىن­دىك بولعانىن, ينتەللەكتۋالدى جان­دارمەن كەزدەسكەندەرىن, تاريحى تەرەڭ مادەني مۇراجايلارعا بارعان­دارىن, مادەني-مەرەكەلىك كەشتەردى ۇيىمداستىرىپ, ءوز ەلىمىزدىڭ سالت-ءداستۇرى مەن ادەت-عۇرپىن, تۇرمىس-تىر­شىلىگىن دە تانىستىرعانىن جەتكىزدى. «لودز ۋنيۆەرسيتەتىندە بىلىمگە دەگەن قۇشتارلىقتى وياتاتىن, عىلىمعا دەگەن ىنتاڭدى اشاتىن پروفەسسور- وقىتۋشىلار لەكتسيا وتكىزدى. اعىلشىن جانە پولياك تىلدەرىن مەڭگەردىك, بۇل ءبىز ءۇشىن ۇلكەن مۇمكىندىك بولدى», دەيدى 3-كۋرس ستۋدەنتى اسەل اۋەس­حان. ۋنيۆەرسيتەتتە بۇل باعىت­تا­عى ج­ۇ­مىستاردى جالعاستىرۋ جوسپار­لانعان.

شىمكەنت