الماتى قالاسىندا ۇيىمداسقان قىلمىسقا قارسى كۇرەس باسقارماسىنىڭ جەدەل ۋاكىلدەرى تۇرعىلىقتى جەرى جوق ادامداردى ۇرلاپ, ءماجبۇرلى تۇردە قاماپ ۇستاۋمەن اينالىسقان قىلمىستىق توپتى قۇرىقتادى, دەپ جازادى Egemen.kz.
قىلمىستىق توپ ارنايى كوتتەدجدى جالعا الىپ, قۇرباندارىن سوندا قاماپ ۇستاعان.
ولار جابىرلەنۋشىلەرگە ءماجبۇرلى تۇردە قايتارىمسىز نەسيە راسىمدەتكەن. اتالعان قىلمىستان زارداپ شەككەن 29 ادام انىقتالدى. ولارعا كەلتىرىلگەن شىعىننىڭ باس-اياعى 200 ملن تەڭگەدەن اسادى.
«سوتقا دەيىنگى تەرگەپ-تەكسەرۋ ناتيجەسى مەن جيناقتالعان دالەلدەمەلەر جيىنتىعى بويىنشا كۇدىكتىلەرگە قاتىستى ۇيىمداسقان قىلمىستىق توپ قۇرعانى, ونى باسقارىپ, قاتىسقانى ءۇشىن ەكى قىلمىستىق ءىس قوزعالدى. قىلمىستىق توپتىڭ بارلىق جەتى مۇشەسى ۇستالىپ, قاماۋعا الىندى. زاتتاي دالەلدەمەلەر تاركىلەنىپ, تەرگەۋ امالدارى جۇرگىزىلىپ جاتىر. وزگە اقپارات تەرگەۋ مۇددەسىنە سايكەس جاريالانۋعا جاتپايدى», دەدى ءىىم رەسمي وكىلى شىڭعىس الەكەشەۆ.