باس پروكۋراتۋرا الماتى وبلىسىندا ەڭبەك زاڭناماسىن ساقتاۋ ماسەلەسىن تەكسەرۋ بارىسىندا قاڭتار ايىندا 1043 قىزمەتكەرگە جالاقى تولەمەگەن باسشىنى انىقتادى, دەپ جازادى Egemen.kz.
قىزمەتتىك تەكسەرۋ بارىسىندا الماتى وبلىسى بويىنشا «ۆەتەريناريالىق ستانتسيا» پۆح مكك وسى جىلدىڭ قاڭتار ايىندا 1043 قىزمەتكەرگە جالپى سوماسى 223 ملن تەڭگە جالاقىنى تولەمەگەنى انىقتالدى.
«پروكۋراتۋرانىڭ قاداعالاۋ اكتىسى بويىنشا قىزمەتكەرلەر الدىنداعى جالاقى تولىعىمەن وتەلدى. جوعارىدا اتالعان ۇيىمنىڭ باسشىسى قر اقبتك 87-بابى بويىنشا 150 اەك (553 800 تەڭگە) مولشەرىندە ايىپپۇل سالۋ ارقىلى اكىمشىلىك جاۋاپكەرشىلىككە تارتىلدى», دەلىنگەن باس پروكۋراتۋرا تاراتقان حابارلامادا.
سونىمەن قاتار قۇزىرلى ورگان جالاقىنى ۋاقتىلى تولەمەگەن جاعدايدا زاڭنامادا اكىمشىلىك قۇقىق بۇزۋشىلىق تۋرالى قر كودەكسىنىڭ 87-بابى, سونداي-اق قر قىلمىستىق كودەكسىنىڭ 152-بابى 3-بولىگى بويىنشا جاۋاپكەرشىلىك كوزدەلگەنىن ەسكە سالدى.