ءاز ناۋرىز مەرەكەسىنىڭ شىعۋ تاريحى تۋرالى ەل اراسىندا ءتۇرلى دالەل-دايەك ايتىلىپ كەلە جاتقانى ءمالىم. ال قازىعۇرتتىقتار «ناۋرىز قازىعۇرتتان باستاۋ الادى» دەگەنگە سەنەدى. ءدال وسى تاقىرىپتا اۋداندا ۇلىستىڭ ۇلى كۇنىنە ارنالعان ۇلكەن مەرەكەلىك ءىس-شارا ءوتتى.
مەرەكەلىك ءىس-شارادا التىباقان قۇرىلىپ, سپورتتىڭ بىرنەشە تۇرىنەن سايىس, كورمە, قازىعۇرت تۋرالى اڭىزدى بەينەلەيتىن ساحنالىق قويىلىمدار مەن ءان شاشۋ ۇيىمداستىرىلدى. سونىمەن قاتار كەلگەن قوناقتارعا ءدام تاراتىلىپ, ۇلتتىق داستۇرگە ساي كيىز ۇيلەر تىگىلدى. مەرەكەلىك كونتسەرتكە «شانشار» ءازىل-سىقاق تەاترى, ءانشى جاندوس قارجاۋباي جانە وزبەكستان مەملەكەتىنەن تسيرك ونەرپازدارى ارنايى شاقىرىلدى. بارلىعى حالىق كوڭىلىنەن شىعىپ, جينالعان جۇرت ساحنا سىيىنا ءتانتى بولدى. مەرەكە بارىسىندا اق جاۋلىقتى انالار مەن اجەلەر شاشۋ شاشىپ, داناگوي اقساقالدارىمىز اق باتاسىن بەردى. اۋدان اكىمى ا.يسمايلوۆ مەرەكەگە جينالعان جۇرتتى قۇتتىقتاپ, ەلىمىزدىڭ اماندىعىن, تىنىشتىعىن, ءار وتباسىنا باقىت, قۋانىش, جاقسى كۇندەر تىلەدى.
تۇركىستان وبلىسىندا «ناۋرىز – جاڭارۋ مەن جاڭعىرۋدىڭ, تاتۋلىقتىڭ باستاۋى» كۇنى اياسىندا اعاش ەگۋ جۇمىستارى قارقىندى جۇرگىزىلگەنىن ايتا كەتەلىك. بۇل كۇنى وبلىس بويىنشا 80 مىڭعا جۋىق كوشەت ەگىلدى. وبلىسقا قاراستى 17 اۋدان, قالانىڭ ساياباقتارى مەن گۇلزارلارعا, سونىمەن بىرگە ەلدى مەكەندەردى قوساتىن جول بويلارى, مەكتەپتەر مەن ورتالىق كوشەلەرگە وتىرعىزىلعان اعاشتاردىڭ باسىم بولىگى – تەرەك, قاراعاش, ۇيەڭكى, ارشا, سيريالىق راۋشان, شاعان سىندى جەرگىلىكتى كليماتقا بەيىمدەلگەن. مىسالى, ماقتاارال اۋدانىندا 5 550 ءتۇپ كوشەت ەگىلسە, ونىڭ 4 500-ءى – قاراعاش, 200-ءى – سيريا راۋشانى, 250-ءى – سابىن اعاشى جانە 600-ءى لەگۋسترۋم.
تۇركىستان وبلىسى