رامازان - يگى ىستەردىڭ ساۋابى ەسەلەنىپ, قۇلشىلىق قادامدارى قۇزار شىڭعا جەتەتىن بەرەكەلى اي. بۇل ايدا مىسكەندەردى قۋانتۋ, مۇقتاجدىڭ جوعىن تۇگەندەۋ, جاقىن-جۋىقتى داستارقان باسىندا قوسۋ قايىرلى ءىس. جاماندىقتان تىيىپ, جاقسىلىققا جەتەلەيتىن رامازاندا كوپشىلىك اۋىزاشار بەرۋگە اسىعادى.
پايعامبارىمىز (وعان اللانىڭ سالاۋاتى مەن سالەمى بولسىن): «كىمدە-كىم بۇل ايدا اۋزى بەرىك ءبىر ادامعا اۋىزاشار بەرسە, كۇنالارى كەشىرىلەدى. سول اۋزى بەرىك ادامنىڭ العان ساۋابىنداي ساۋاپ بۇعان دا بەرىلەتىنىن» ايتقان.
اۋىزاشار جۇرتشىلىقتى جيناپ, عيبراتتى اڭگىمە ايتىپ باۋىرماشىلدىققا باستايتىن قادىرلى باس قوسۋ.
ونىڭ داستارقانى از-كەم بولىپ ولشەنبەيدى.ء «بىر دانا قۇرمامەن اۋىزاشار بەرگەنگە دە, تەك سۋمەن عانا ورازاسىن اشتىرعانعا دا, كىشكەنە ءسۇت بەرگەنگە دە وسى ساۋاپ جازىلادى». (بايھاقي) سوندىقتان بۇل ايدا استا-توك اس بەرىپ ىسىراپشىلدىققا جول بەرمەۋدىڭ ماڭىزى ايرىقشا. بۇل رەتتە اۋىزاشار بەرۋ ادەبىن ساقتاۋ قۇپتالادى. مىڭ ايدان دا قايىرلى ايداعى اۋىزاشار بەرۋ ءۇردىسىنىڭ ادەبىن «ىرىسكەلدى قاجى» اتىنداعى مەشىتتىڭ باس يمامى نۇرلان بايجىگىت ۇلىنان سۇراپ بىلدىك.
«ورازا - قۇلشىلىق. اۋىزاشار بەرۋ ول دا سالتىمىزبەن استاسىپ جاتقان جاقسى امالداردىڭ ءبىرى, قۇلشىلىق. بىراق سوڭعى ۋاقىتتا اۋىزاشار ءبىر-بىرىنە ەلىكتەۋشىلىك نەمەسە قيناۋ, زورلىققا ۇلاسىپ كەتىپ جاتىر. مىناۋ استا-توك داستارقان جايدى دەپ قارىزعا باتىپ اۋىزاشار بەرۋدىڭ قاجەتى جوق. ورازانىڭ باستى ماقساتى اعايىنداردى بىرىكتىرۋ, ۇزاعانداردى جاقىنداستىرۋ, رەنجىسكەندەردى رايىنان قايتارۋ, الدىنان ءوتۋ سىندى عيبراتتى ءىس-ارەكەتتەردى قامتىعان دۇرىس. ءبىزدىڭ اۋىزاشارلارىمىز كەيىنگى جىلدارى شوۋ, گالا - كونتسەرتكە دەيىن اينالىپ بارا جاتقان جاعدايلاردى بايقاپ ءجۇرمىز. بۇل كەزدە جىلىنا ءبىر كەلەتىن رامازان ايىن پايدالى وتكىزۋگە كوڭىل ءبولۋ كەرەك», دەپ پىكىر ءبىلدىردى نۇرلان بايجىگىت ۇلى.
نۇرلان يمام اۋىزاشار بەرۋدە الدىمەن نيەتتى دۇرىستاۋ ماڭىزدى ەكەنىن قاپەرگە سالدى.
«اۋىزاشار بەرۋدەگى ەڭ ەسكەرەتىن تۇس – داستارقاندا باقتالاستىق بولماۋ كەرەك. ءبىزدىڭ قوعامدا ادامدار بالەنشەنىڭ داستارقانى كەرەمەت بولدى, ال ەكىنشى ءبىر ادام جاعدايى جەتكەنشە جاساسا داستارقانى قاراپايىم بولدى دەپ اڭگىمەلەپ جاتادى. بۇل دۇرىس ارەكەت ەمەس. ادام قۇدايعا داستارقانىمەن جاقىندامايدى. پەيىلىمەن جاقىندايدى. سوندىقتان كىم قانداي نيەتپەن اۋىزاشار بەرسە, ساۋاپتا سوعان قاراي بەرىلەدى. اسىلىندا بۇل اسا ءمان بەرەتىن ماسەلە. اۋىزاشاردا ءبىرىنشى سۋ, سۇيىق تاعامدار كوبىرەك بەرىلۋ كەرەك. بىزدە بىردەن الدىڭا ەت قويادى. مۇندايدا كۇنى بويى اۋزى بەرىك ادامنىڭ ءشولى باسىلماي قالادى. ءمۇفتيات, باسقا دا ءدىني ورىندار بەكىتكەن داستارقان ءمازىرى جوق. حالقىمىز قۇرمەت ءبىلدىرۋ ءۇشىن مول داستارقان جايادى. الايدا باقتالاستىققا ءوتىپ كەتپەۋدى قاداعالاۋ شارت. مەن الدىما جان سالمايمىن, مەنىڭ داستارقانىم ەڭ جاقسى بولۋى قاجەت دەگەن تۇسىنىكتەن ارىلعان دۇرىس. پايعامبارىمسىز (س.ع.س) قۇرما بەر نەمەسە سۋ بەر. وسىنىڭ ءوزى جەتكىلىكتى دەپ ايتقان», دەدى ىرىسكەلدى قاجى اتىنداعى مەشىتتىڭ باس يمامى نۇرلان بايجىگىت ۇلى.