قارجىلىق مونيتورينگ اگەنتتىگى ەلدەگى مامانداندىرىلعان حالىققا قىزمەت كورسەتۋ ورتالىقتارىنداعى كولىكتى تىركەۋ, ەسەپكە قويۋ ءتارتىبىن تەكسەرۋدى باستادى, دەپ جازادى Egemen.kz.
جۇيەلى تەكسەرۋگە قازاقستانعا اكەلىنگەن جۇك كولىكتەرى مەن اۆتوبۋستاردى زاڭسىز ەسەپكە قويۋ فاكتىلەرىنىڭ جيىلەۋى تۇرتكى بولعان. ماسەلەن, 2023 جىلعى تامىز ايىنان بەرى وسىنداي زاڭسىزدىققا بارعانداردىڭ ۇستىنەن 23 قىلمىستىق ءىس قوزعالعان. وسى ىستەر بويىنشا 3 مىڭعا جۋىق اۆتوكولىك زاڭسىز تىركەلگەن. ال مەملەكەتكە كەلگەن زالالدىڭ كولەمى 14 ميلليارد تەڭگەدەن اسقان.
قارجىلىق مونيتورينگ اگەنتتىگى, تسيفرلىق دامۋ مينيسترلىگى مەن «ازاماتتارعا ارنالعان ۇكىمەت» وكىلدەرى بىرلەسە وتكىزگەن جيىندا الاياقتار كولىكتى زاڭسىز تىركەۋ ءۇشىن 4 نەگىزگى سحەماعا سۇيەنەتىنىن انىقتادى.
«قازىرگى كەزدە اقپاراتتىق جۇيەلەردىڭ ينتەگراتسياسى تولىعىمەن جاسالدى. سونىڭ ارقاسىندا VIN ەنگىزۋ كەزىندە اۆتو تۋرالى بارلىق دەرەكتەر اۆتوماتتى تۇردە اقپاراتتىق جۇيەدەن تارتۋعا جانە تولەنۋگە جاتاتىن الىمدار مەن تولەمدەردى ەسەپتەۋگە مۇمكىندىك بار», دەدى تسيفرلاندىرۋ ۆيتسە-ءمينيسترى اسقار جانباكين.
پروتسەسس بارىسىندا العاشىندا دەرەكتەردى حقو ماماندارى ەنگىزەدى. جۇيە جاڭارتىلعاندا اقپاراتتار اۆتوماتتى تۇردە جاڭارادى.