شەكاراسىز ماحاببات

فيلم «كارىس كەلىن» دەپ اتالادى. قۇرىلعانىنا 3 جىل تولعان «تurkistan» ارناسىنىڭ بۇل تىرناقالدى ءتولتۋىندىسى ەكەنىن دە ايتا كەتەلىك. كومەديالىق مەلودراما جانرىنداعى فيلم شىنايى وقيعالارعا نەگىزدەلگەن. كورەيادا 5 جىلعا جۋىق جۇمىس ىستەگەن ساكەن 2023 جىلى ەلگە وزىمەن بىرگە سۇيىكتىسى سۋدجين ءليدى الىپ كەلىپ, قاراشاڭىراعىنا كەلىن ەتىپ تۇسىرگەن. بۇگىندە جاس وتباسى تاتۋ-ءتاتتى ءومىر ءسۇرىپ جاتىر. فيلم سۋدجين ءليدىڭ قازاقستانعا كەلگەن العاشقى كۇندەردەگى باسىنان وتكىزگەن قىزىقتى وقيعالارىنان باستاۋ الادى. وندا ەكى جاستىڭ ماحابباتى عانا ەمەس, وتباسى قۇندىلىقتارى, قازاق حالقىنىڭ سالت-داستۇرلەرى ناسيحاتتالادى. مىسالى, ءبىر اۋلەتتىڭ جالعىز ۇلى كارىس قىزىنا ۇيلەنىپ, ەرتەڭ ەلدەن كەتىپ قالىپ, شاڭىراقتىڭ وتى ءسونىپ قالا ما دەگەن ساكەننىڭ جاقىندارىنىڭ ۋايىمى, شەكارا اسىپ كەلگەن قىزدى بەتىن اشپاي ۇيىنە كىرگىزىپ العان وتباسىنا اۋىل اقساقالدارىنىڭ جينالىپ كەلىپ, اقىلدارىن ايتۋى سىندى قازاقى تانىمدار مەن مۇندالايدى. ءفيلمنىڭ يدەيا اۆتورى – «Turkistan Media Holding» جشس باس ديرەكتورى جاناحمەت اعىباەۆ. رەجيسسەرى – ساردور راسۋلوۆ, ستسەناريىن تەلە­ارنا قىزمەتكەرلەرى بىرلەسە جازىپ شىققان. رولدەردى تۇركىس­تان وبلىسى مەن شىمكەنت قالا­سىنىڭ كاسىبي اكتەرلەرى سوم­داعان. ال باستى كەيىپكەر ساكەن مەن ءسۋدجيننىڭ جانە روزانىڭ رولىنە كورەي ءتىلىن جەتىك مەڭ­گەر­گەن اكتەرلەردى كاستينگ ارقىلى الماتىدان شاقىرۋعا تۋرا كەلگەن. ساكەننىڭ ءرولىن – اسلان قايىپجان, ءسۋدجيندى – جۇلدىز مۇرات, ال روزانى ايا يساباەۆا سومداعان. ۇشەۋىنىڭ دە اكتەرلىك جولىنداعى بۇل العاشقى فيلم بولعاندىقتان كەمشىن تۇستارىنا كەشىرىممەن قاراۋعا بولاتىن سەكىلدى. ءسۋدجيندى سومداعان جۇلدىز الماتىداعى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە كورەي-اعىلشىن تىلدەرىنىڭ اۋدارماشىسى مامان­دىعىن مەڭگەرىپ ءجۇر. ءتۇسىرىلىم بارىسىندا سۋدجينمەن كەزدەسىپ, اڭگىمە-دۇكەن قۇرعان جۇلدىز قيىندىق بولعانىن جاسىرمايدى. كورەي تىلىندە سويلەۋ وعان اسا قيىندىق كەلتىرە قويماعان. ال كورەيادان قازاقستانعا ماحابباتى ءۇشىن كەلگەن قىزدىڭ ىشكى سەزىمىن بۇلجىتپاي بەرۋ ءۇشىن كوبىرەك ەڭبەكتەنۋىنە تۋرا كەلىپتى. قيىندىقتارمەن قاتار قىزىقتى ساتتەر دە بولعان. ماسەلەن, جۇل­دىز ءتۇسىرىلىم بارىسىندا سيىر ساۋ ەستە قالعان ەڭ قىزىقتى ساتتەردىڭ ءبىرى بولعانىن ايتادى. ساكەن مەن سۋدجين دە ءتۇسىرىلىم بارى­سىندا بولعان ەكەن. ال ساكەن­­نىڭ اكەسى ەرلاندى سومداعان بەل­گىلى ءانشى, اكتەر, كوپشىلىككە «تۇركىس­تا­نىم تۇرانىم» انىمەن دە تانىمال – مارات ورازمەتوۆ ءبىرتالاي فيلم­گە تۇسكەن, وزىندىك كەلبەتى بار, زور داۋىس پەن تالانت يەسى ەدى. فيلمدەگى ەرلان – مارات وراز­مە­توۆتىڭ كينو الەمىن­دەگى ەڭ سوڭعى ءرولى بول­دى. تۋىن­دى­نىڭ ءتۇسىرىلىمى قارا­شا ايىندا اياق­تال­عان. ال اكتەر جەل­توق­سان­نىڭ 7-ءسى كۇنى جارىق دۇنيەمەن قوش ايتىس­تى.

بۇگىندە شىنايى وقيعا جەلىسى­مەن تۇسىرىلگەن «كارىس كەلىن» ءفيلمى تۇركىستان, شىمكەنت قالا­لارىنىڭ كينوتەاترلارىندا كور­سە­تىلىپ جاتىر. تۇساۋكەسەرگە كەلگەن كورەرمەننىڭ قاراسى قالىڭ. كور­سە­تىلىمنەن سوڭ فيلم­گە جوعارى باعا بەرگەندەر دە, ءوز پىكى­رىن بىلدىرۋشىلەر دە بولدى.­ «وڭتۇستىك دەسە, ويىمىزعا الدى­مەن ءازىل-وسپاق تۋىن­دىلارى كەلە قالاتىنى راس. بۇل ءفيلمنىڭ دە كومە­ديالىق ساحنالارى جەتەر­لىك. ودان بولەك تانىمال ازىل­كەش­تەردىڭ فيلم­دە ويناۋى سون­شالىقتى ءساتتى بولدى دەپ ايتا المايمىن. ءفيلمنىڭ ۇتقان تۇسى­نىڭ ءبىرى – تۇركىستان ءوڭىرىنىڭ كۇزدىك كەي­پىن, سۇلۋلىعىن ادەمى بەرە العان. تابي­عا­تىنا قاراپ وتىرىپ كوز سۋاراسىڭ. قالاي بولعاندا دا, تەلەارنانىڭ العاشقى جۇ­مىسى – جاپ-جاقسى فيلم. ەڭ باستىسى, ارا­دا تاۋ جاتىر, مۇحيت جاتىر, سالت جاتىر, سانا جاتىر دەمەي, ءبىرىن-ءبىرى تاپقان, ماحاب­باتى ءبارىن جەڭگەن عاشىقتاردىڭ شى­نايى وقيعاسىنا ەسكەرتكىش قالاندى دەپ ويلايمىن», دەيدى كورەرمەندەردىڭ ءبىرى, جاس اقىن سەزىم مەرگەنباي.

ءيا, جاڭا تۋىندىنىڭ ءوز ايتارى بار. تۇلكىباس اۋدانىنىڭ ءبىر اۋىلىندا جاس وتباسى ادال ماحابباتىن ايالاپ وتىر. سونداي-اق وزگەنى دە ءوز بالاسىنداي كورەتىن قازاق جۇرتىنىڭ ءتالىم-تاربيەسىنىڭ مىقتىلىعى, قوناقجايلىلىعى فيلمدە بايقالادى. ءار كۇلكىلى ءساتتىڭ استارىنان تاربيەلىك ءماندى اڭعارعان كورەرمەن قاۋىم جوعارى باعا بەرىپ جاتىر. تۇركىستان قالاسى مەن تولەبي اۋدانىندا بار بولعانى 9 كۇندە تۇسىرىلگەن فيلم كورەرمەندەرى كۇن ساناپ كوبەيە تۇسكەنىن دە ايتا كەتەلىك.

تۇركىستان وبلىسى