«اناشىم, مەن وسكەن سوڭ سىزگە كيىم تىگەتىن ماشينا الىپ بەرەمىن», دەيدى جەتى جاسار قازىنا بايسالدى تۇردە. «مەن كويلەك تىگىپ بەرەمىن, ادەمى, قىزىل ويۋى بار. ءسىز سونداي كويلەكتى جاقسى كورەسىز عوي», دەيدى اپپاعى ەركەلەي اناسىنىڭ موينىنا اسىلىپ. «ال مەن اكەمە كو-ءو-ءو-پ اقشا بەرەمىن, ول ۇلكەن ءۇي سالىپ بەرەدى», دەيدى سالماقتى كەيىپتە نۇرگ ۇلى. قىزدارىنىڭ ارمانداي ايتقان سوزدەرىنە كوڭىلى بوساعان انا ىشتەي ء«اۋمين» دەپ, ورامالىنىڭ ءبىر ۇشىن كوزىنە اپاردى...
انالارىنىڭ نە قالايتىنىن ءبىلىپ, كوكەيىنە ءتۇيىپ جۇرگەن بالالارىنىڭ ارمانى – ورىندالمايتىن دۇنيە ەمەس. ونى ۇل-قىزىنىڭ اماندىعىن, قاتارىنان قالماي ءوسىپ ءبىلىمدى دە ەڭبەكقور, ادال ازامات بولۋىن تىلەپ, بار جاعدايىن جاساپ جۇرگەن كوپبالالى جانار انا جاقسى بىلەدى.
بۇگىندە 4 ۇل, 8 قىزدى دۇنيەگە اكەلىپ, ءوسىرىپ-تاربيەلەپ وتىرعان جانار ابساماتقىزىنىڭ كىشكەنتاي قىزدارىنا ايتپاي جۇرگەن كىشىگىرىم تاعى ءبىر ارمانى بار. ۇل-قىزدارى ارمانداعانداي باسپانالى بولسا, ەسىگىنىڭ الدىنا گۇل ەگىپ, الىستان كوز قىزىقتىرار ادەمى ەتە اۋلاسىن اباتتاندىرعىسى كەلەدى. مۇنى بالكىم, ارمان دەۋگە دە بولماس, جاقىن ارادا ورىندالاتىن جوسپار دەرسىز.
ءيا, ون ەكى بالانىڭ اناسى جانار ءالجانوۆانىڭ ارمانى – ازىرگە الەۋمەتتىك, ياعني تۇرمىستىق دەڭگەيدە. وتاعاسى نۇربول مەن جانار ۇل-قىزدارىمەن, ياعني 14 جان تۇركىستان وبلىسى ورداباسى اۋدانى شۇبار اۋىلىندا جالدامالى ۇيدە تۇرادى. بايدىبەك اۋدانىنىڭ جولعاباس اۋىلىندا 1981 جىلى دۇنيەگە كەلگەن جانار مەكتەپ بىتىرگەن سوڭ, تىگىنشىلىكتى مەڭگەرىپتى. ال تۇرمىسقا 24 جاسىندا شىققان. وتاعاسى نۇربول مالىك ۇلى شىمكەنتتەگى «بال بەرەكە» بالاباقشاسىندا كۇزەتشى. تۇڭعىش قىزدارى نۇرايىم وتكەن جىلى ساۋىردە تۇركىستان قالاسىنا تۇرمىسقا شىققان. قىزدان كەيىنگى ۇل نۇرداۋلەت شىمكەنت قالاسىندا وقيدى. ال ەرنۇر مەن ارنۇر شۇبارداعى №18 كوللەدجىندە ءبىرى دانەكەرلەۋشى, ءبىرى وپەراتور ماماندىقتارىندا ءبىلىم الىپ ءجۇر. كۇنسۇلۋ, سىمبات, زەرە, مەيىرجان مەن قازىنا مەكتەپتە بولسا, اپپاق, نۇرگۇل مەن اققۋناز – اۋىلداعى «ايانا» بالاباقشاسىندا. كوپبالالى وتباسىنان شىققان قىزداردى بالاباقشا مەڭگەرۋشىسى سەيدانا بەدەباەۆا تەگىن قامقورلىعىنا العان.
ماماندىعى تىگىنشى جانار ۇل-قىزدارىنىڭ ۇيدە كيەر كيىمىن ءوزى تىگىپ بەرەدى. ارينە, قولمەن. ويتكەنى تىگىن ماشيناسى جوق.
«تىگىنشىلىكپەن اينالىسپايمىن, قاجەتتى تەحنيكام جوق. بىراق ۇل-قىزدارىما كەرەك كيىمدەردىڭ كەيبىرىن قولمەن تىگەمىن. كەيدە شالباردىڭ نەمەسە كويلەكتىڭ قايتارىلعان جەرلەرىندەگى تىگىس بىركەلكى, تەگىس شىقپاي قالادى. سول كەزدە ويۋ سالىپ بىلدىرمەي جىبەرەمىن, ايتپەسە بالالاردىڭ دا تالعامى بار, كيمەي قويۋى مۇمكىن», دەيدى جانار انا.
كوپبالالى انانىڭ اۋىل اكىمىنە ايتار العىسى دا مول. سەبەپ تە جوق ەمەس. ءۇش جىل بويى ءتۇرلى سەبەپپەن جاردەماقى الا الماي, قاتتى قينالعان. اۋىل اكىمى مۇرات ەلشىبەك زاڭدىق تۇرعىدا بارلىق كومەكتى كورسەتىپ, جۋىردا عانا جاردەماقىعا قولى جەتكەن.
«بالالاردىڭ جاردەماقىسى بار, وتاعاسىنىڭ ازىن-اۋلاق تاپقان تابىسى بار, ايتەۋىر كوپپەن بىرگە تىرشىلىك ەتىپ جاتىرمىز. ءوزىمنىڭ انام دا 8 ۇل-قىزدى دۇنيەگە اكەلگەن. كوپبالالى وتباسىندا تاربيەلەندىك. ۇل-قىزدارىم امان, قاتارىنان قالماي ءوسىپ, ءتالىم-تاربيە الىپ جاتىر. بار بايلىعىمىز – سولار, ءاربىرىنىڭ ءوز نەسىبەسى بار. ۇل-قىزداردىڭ كوبىن جىل ارالاتا جارىق دۇنيەگە اكەلدىم. وعان وتاعاسى ەكەۋمىز قينالعان دا, وكىنگەن دە ەمەسپىز. قايتا ءاربىرى دۇنيەگە كەلگەن سايىن قۋانىش سىيلاپ, ءوزىمىزدى باقىتتى سەزىندىك. اۋىل اكىمىنە, بالاباقشا مەڭگەرۋشىسىنە راحمەت, جاعدايىمىزدى سۇراپ كومەك كورسەتتى. قىزداردىڭ ءبىرى 12 جاستاعى سىمباتىمىز دومبىرا ۇيىرمەسىنە قاتىسىپ ءجۇر. ۇلتتىق اسپاپتى مەڭگەرۋىنە جاعداي جاساپ, تەگىن ۇيرەتىپ جۇرگەن فاريزا اپايعا دا ايتار العىسىم شەكسىز. ءۇي الۋعا كەزەكتە تۇرمىز, 134-ءشى ەدىم, قازىر ەكىنشىمىز. اللا ءناسىپ ەتسە, باسپانالى دا بولارمىز. تەك ۇزاققا سوزىلماسا ەكەن. ءۇي السام, اۋلاسىن اباتتاندىرىپ, باۋ-باقشا وسىرسەم دەيمىن. بالالاردى ەڭبەككە باۋلىپ, ءوزىمىزدىڭ كوكونىس, جەمىس-جيدەگىمىزدى جەسەك دەيمىن. ەڭ باستى ارمانىم – باسپانالى بولۋ», دەيدى ج.ءالجانوۆا.
كوپبالالى انانىڭ بارلىق ارمانىنىڭ ورىندالۋىنا تىلەكتەستىك بىلدىردىك. قوشتاساردا ۇل-قىزدارىنىڭ تەگىن سۇراعانبىز. «اتامنىڭ اتىن اتاي المايمىن عوي, قازىر قۇجاتتارىن كورسەتەيىن», دەدى جانار انا. ون ەكى ۇل-قىزدىڭ تەگى – مالىكزات.
تۇركىستان وبلىسى