دالاسى دارقان قازاق توپىراعىندا ءتۇرلى ەتنوس وكىلى تاتۋ-ءتاتتى ءومىر ءسۇرىپ, ەلدىڭ وركەندەۋى جولىندا ايانباي قىزمەت ەتىپ كەلەدى. بۇگىندە تاريحىن تاعدىر بىرىكتىرگەن حالىقتىڭ مۇددەسى ورتاق, ماقساتى ءبىر. بۇل ءبىر عانا وتانىمىزدىڭ ءتۇتىنىن ءتۇزۋ شىعارىپ, تاۋەلسىزدىگىمىزدى كوزدىڭ قاراشىعىنداي قورعاۋ.
كوكتەمنىڭ العاشقى كۇنىمەن قاتار كەلگەن العىس ايتۋ كۇنى ۇلتتىق ۇلان قاتارىندا ازاماتتىق بورىشىن وتكەرىپ جاتقان مەرزىمدى اسكەري قىزمەتشىلەر ءۇشىن دە قۇندى ءارى تاعىلىمعا تولى. وسى ورايدا «شىعىس» وڭىرلىك قولباسشىلىعىنا قاراستى اسكەري بولىمدەردەگى وزگە ەتنوس وكىلدەرى مەرەيلى مەرەكە اياسىندا پايىمدى پىكىرلەرىمەن ءبولىستى.
5512 اسكەري ءبولىمىنىڭ قاتارداعى جاۋىنگەرى يبراگيم حاكيموۆتىڭ وتباسى وسىدان جيىرما ەكى جىل بۇرىن قازاقستانعا چەشەنستانداعى ازاماتتىق سوعىستان باسساۋعالاپ كەلگەن. «تۋعان ەلىن تاستاپ كەتۋ اتا-انام ءۇشىن وڭايعا سوقپادى. ىشكى قاقتىعىستاردان كۇيى كەتىپ, بەرەكەسى قاشقان ولاردىڭ تىعىرىقتان شىعار باسقا جولى بولماسا كەرەك. نەگە ەكەنىن بىلمەدىم, ەل شىعىسىنداعى سەمەي قالاسىنا قونىس اۋدارىپتى. تاعدىر تاۋقىمەتى تار جول, تايعاق كەشتىرگەنىمەن تامىرىن تەرەڭگە جايعان تاڭسىق ولكەدە تىنىستارى تارىلماعاندارىن وزدەرى ءجيى ايتادى», دەيدى ول. شارۋادا شاشاۋ شىعارمايتىن اكەسى قيۋىن قيىستىرىپ, ءوز ءىسىن دوڭگەلەتىپ اكەتسە كەرەك, كەيىپكەرىمىز كويلەگى كوك, قارىنى توق وتباسىندا ومىرگە كەلگەنىن ايتادى. «سەمەي جۇرتىنا بىردەن باۋىر باسىپ كەتتىك. بۇل كەۋدەمىزدەن يتەرمەي, قۇشاق اشا قارسى العان جەرگىلىكتى جۇرتتىڭ دالاداي كەڭ پەيىلىنەن بولسا كەرەك. سوندىقتان قيىن-قىستاۋ شاقتا قولداۋ تانىتقان سەمەيلىكتەرگە ايتار مەنىڭ دە العىسىم شەكسىز. ءوز بالاسىنان كەم كورمەيتىن قالا تۇرعىندارىنا ريزاشىلىقتان باسقا الىپ-قوسارىم جوق. قورشاعان قاراشانىڭ قايىرىمدىلىعىنان بولار, مەنىڭ دە وتانعا دەگەن ماحابباتىم سونداي ىستىق. سوندىقتان بۇعانام بەكىپ, قابىرعام قاتايعان تۇستا, بەلىمدى بەكەم بۋىپ, ۇلتتىق ۇلان قاتارىندا وتان الدىنداعى بورىشىمدى وتەۋدى ءجون سانادىم. دارقاندىعى دالاسىنان دارىعان قازاق جۇرتىمەن ءبىتىسىپ, بەيبىت ەلدىڭ اسپانىندا مامىراجاي كۇن كەشەيىك», دەپ اعىنان جارىلدى يبراگيم.
5511 اسكەري ءبولىمىنىڭ قاتارداعى جاۋىنگەرى بەكزات شەرماتوۆتىڭ دا قازاق حالقىنا ايتار العىسى شەكسىز. ونىڭ ايتۋىنشا, اتا-اناسى قىرعىز رەسپۋبليكاسىندا تۋىپ-وسكەنىمەن, كەيىن بالا-شاعانىڭ قامىمەن قازاقستانعا قونىس اۋدارىپتى. «اۋىل تۇرعىندارى تابىس تابۋ ءۇشىن ماسكەۋگە سابىلسا, ال ءبىزدىڭ وتباسى قازاقستانداعى پاۆلودار قالاسىنا تابان تىرەدىك. بۇل شەشىمدى اكەم قابىلداپتى. العاشىندا پاتەر جالداپ كۇنەلتتىك. سودان كەيىن ساۋدامەن اينالىستىق. «ەڭبەك ەتسەڭ ەمەرسىڭ» دەمەكشى, ەشكىمدى تانىمايتىن ولكەدەگى توگىلگەن تەر سوڭىندا ءوز جەمىسىن بەردى. بۇگىندە اكە-شەشەم پاۆلودار قالاسىنداعى بىرنەشە كاسىپتىڭ يەسى. ەندى استانا قالاسىنان دا كاسىپ كوزدەرىن اشىپ, ەلورداعا ويىسۋدى جوسپارلاپ ءجۇر», دەيدى جاۋىنگەر. «قازاقستان – مۇمكىندىكتەر مەكەنى» ەكەنىن ايتقان ول: «ەگەر دە ءوزىڭ تالپىنساڭ, مەملەكەت ءاربىر تالپىنىسىڭدى باعالايدى. ەجەلدەن ءبىر-بىرىنە ەتەنە جاقىن قازاق پەن قىرعىز دوستىعى جىل ساناپ ارتىپ كەلەدى. سوندىقتان بىرلىگىمىز جاراسقان جەردە ماعىنالى عۇمىر كەشۋدى اللا ءناسىپ ەتكەندەي. قازاقستان وتباسىمدى اياعىنان نىق تۇرعىزىپ, اكەمدى اتپال ازاماتقا, انامدى ىسكەر ايەلگە اينالدىردى», دەيدى. بوتەنسىپ كەلگەن قىرعىزدى كەڭ قۇشاعىنا سىيدىرىپ, قايىرىمدىلىعى مەن كەڭپەيىلدىگى, دانالىعى مەن قوناقجايلىعىن كورسەتكەن قازاق حالقىنا قۇرمەتى جوعارى ەكەنىن سوزبەن ەمەس, ىسپەن كورسەتىپ جۇرگەن جاۋىنگەر قازىر اۋلەتىنىڭ الەۋەتىن ارتتىرىپ, ءوسىپ-ونگەن ەلدىڭ شەكاراسىن جاۋدان قورعاپ, تىنىشتىعىن كۇزەتىپ ءجۇر.
6699 اسكەري ءبولىمىنىڭ قاتارداعى جاۋىنگەرى يلدار گاينەتدينوۆتىڭ ۇلتى باشقۇرت بولعانىمەن, ءوزى تۇگىلى, اكەسىنىڭ دە كىندىك قانى قازاق توپىراعىندا, ونىڭ ىشىندە ەكىباستۇز قالاسىندا تامعان. باشقۇرت پەن قازاقتىڭ باۋىرلاستىعى عاسىرلار بويى جالعاسىن تاۋىپ كەلە جاتقانىن ايتقان ول: «مىسالى, ۋفاداعى عاليا مەدرەسەسى تالاي قازاق جاستارىنىڭ ساۋاتىن اشقان. بۇل قالا الاشورداعا باس قوسار قۇتتى ورىن بولدى. ءاليحان بوكەيحان ورىنبوردى ورتاق استانا قىلىپ, باشقۇرت-قازاق ءبىرتۇتاس اۆتونومياسىن قۇرماقشى بولعانىن دا بىرەۋ بىلسە, بىرەۋ بىلمەس. تۇركىتىلدەس حالىق بولعان سوڭ تىلەگىمىز ءبىر. سوندىقتان تىلەكتەس ەلدىڭ تۋىن تىك ۇستاۋ – مەن ءۇشىن ۇلكەن ابىروي», دەدى.
بۇگىندە ۇلتتىق ۇلاننىڭ «شىعىس» وڭىرلىك قولباسشىلىعىنا قاراستى 6699 اسكەري بولىمىندە ەل الدىنداعى ازاماتتىق بورىشىن وتكەرىپ جۇرگەن يلداردىڭ جاۋىنگەرلىك مىندەتى – وسكەمەن قالاسىنداعى تۇزەۋ مەكەمەلەرىن كۇزەتۋ. قارۋلاستار اراسىندا دارالانىپ, كەز كەلگەن اسكەري سىناقتان سۇرىنبەي, قويىلعان تاپسىرمالاردى دەر كەزىندە ورىنداۋعا ءاردايىم بارىن سالىپ جۇرگەن ول تۋعان ەلىنە دەگەن شەكسىز قۇرمەتىن وسىلاي دالەلدەپ كەلەدى.